Ifishinka Fikalamba Fyapulamo

FINSHI fiba ifishinka fikalamba ifya lyashi? Ifi tafili fye fyebo ifyo mwingalanda fye mu lupita. Fyaba fyebo fyacindama ifilandwapo pa nshita yalepako. Fyaba fyebo fyacindama ifimwafwa ukufika pa buyo bwenu.

Icingamwafwa ukulenga ifishinka fikalamba ukupulamo fyebo musalile ne fyo mufiteyenye mano mano. Nga mwasapika ifya mu lyashi lyenu, mukasanga ifyebo ifingi ukucila ifyo mwingabomfya. Kuti mwaishiba shani ifyebo fingalinga ukusanshamo?

Ica kubalilapo, tontonkanyeni pe bumba lyenu. Bushe abengi tabaishiba nangu cimo pa lwa mulandu mulelandapo, nelyo bushe baliwishiba sana? Bushe abengi balisumina ifyo Baibolo isosa pa lwa uyo mulandu, nelyo bushe bamo balatwishika? Mafya nshi bapitamo mu mikalile ilyo baleesha ukubomfya fintu Baibolo isosa pa lwa uyo mulandu? Ica cibili, shininkisheni ukuti namwishiba bwino bwino ubuyo bwenu ilyo mulelanda ilyashi lyenu kuli ilyo ibumba. Ukubomfya ifi fibili ifya kumutungulula, lingululeni ifyebo mukwete kabili bomfyeni fye ifyampene sana ku lyashi lyenu.

Nga namupeelwa autulaini ukwete umutwe ne fishinka fikalamba apa kufumye lyashi, mufwile ukukonka sana ifilipo. Lelo, ifyebo fyenu fikacindaminako nga ca kuti muleibukisha ifi fibili tulandilepo ilyo mulelanda icishinka cimo na cimo. Nga tamupeelwe autulaini, cili kuli imwe ukusala ifishinka fikalamba.

Ilyo mwaishiba bwino bwino ifishinka fikalamba kabili mwateyanya ifya kulandapo, cikamwangukila ukulanda ilyo lyashi. Ibumba nalyo likanonkelamo nga nshi.

Inshila Shalekanalekana Isha Kuteyanishishamo Ifyebo Fyenu. Kwaba inshila shalekanalekana isha kuteyanishishamo ifyebo fye lyashi lyenu. Ilyo mulebelesha ishi nshila, mukasanga ukuti kwaba ishingi ishingabomba bwino, cili fye ku buyo bwenu.

Inshila ingabomfiwa umwingi yaba ya kwakanya ifilelandwapo. (Icishinka cikalamba cimo na cimo cilakabilwa pantu cilafwa bakomfwa ukumfwikisha ilyashi nelyo ukumwafwa ukufika pa buyo bwa lyashi lyenu.) Inshila imbi yaba ya kutantika ifyebo umo fyacitikile. (Ku ca kumwenako, ifyacitike pa ntanshi ya Lyeshi, kuti fyakonkwapo ne fyacitike ilyo Yerusalemu talaonaulwa mu 70 C.E., e lyo ukukonkwapo ne filecitika muno nshiku.) Inshila ya butatu kulanda icilenga ne cifumamo. (Ici kuti calandilwa mu nshila shonse shibili. Ku ca kumwenako, kuti mwatampa ne filecitika nomba, ififumamo, ne calenga, atemwa ukutampa ne calenga, ififumamo, ne filecitika nomba.) Inshila yalenga bune ya kucilanya. (Kuti mwacilanya ubusuma no bubi.) Inshita shimo ilyashi kuti lyakabila inshila ishingi.

Ilyo Stefani abepeshiwe pa ntanshi ya cilye ca baYuda ica Sanhedrini, alandile na maka ukukonka umo ifintu fyacitikile. Ilyo mulebelenga Imilimo 7:2-53, moneni ukuti Stefani aleibukisha ubuyo bwakwe pa kusala ifishinka. Intanshi alilondolwele bwino bwino ukuti aleshimika ifyacitike kale ifyo ibumba lyakwe lishingasuusha. Lyene alondolwele ati nangula Yosefe akeenwe kuli bamunyina, Lesa e mo apishishe ubulubushi. Mu kukonkapo, alondolwele ati abaYuda tabaumfwilile Mose, untu Lesa alebomfya. Na mu kusondwelela akomaile pa mibele yali na balya baYuda ba ku nkulo shapita, e mibele yali na balya abaipaishe Yesu Kristu.

Mwifusha Ifishinka Fikalamba. Te fingi sana ifikabilwa pa kulanda ilyashi ilili lyonse. Ilingi line, ifishinka fikalamba taficila fisano, nampo nga mulelanda pa maminiti 5, 10, 30, nelyo ukucilapo. Mwiesha ukulenga ifishinka ifingi sana ukupulamo. Ibumba lyenu kuti lyaumfwa fye ifishinka fya mpendwa mu lyashi limo. Kabili ilyashi lyenu nga lyalepa, e lyo ifishinka fikalamba fifwile ukukomailwapo sana no kulondololwa bwino icine cine.

Te mulandu ne mpendwa ya fishinka fikalamba mwalanda, shininkisheni ukuti cimo na cimo mwacilanda ukufika pa kashongotwelo. Peeleniko ibumba inshita ya kubebeta icishinka cikalamba cimo na cimo pa kuti ciikale mu mintontonkanya yabo.

Ilyashi lyenu lifwile ukumfwika ukuti nalyanguka. Te lyonse ici cishintilila pa bwingi bwa fyebo mukwete. Nga ca kuti mwatantika ifishinka fyenu bwino mu tumitwe twa kupenda fye no kufilandapo cimo na cimo, ilyashi lyenu likanguka ukukonka kabili cikanguka ukulibukisha.

Lengeni Ifishinka Fikalamba Fipulemo. Nga ca kuti ifyebo fyenu nafiteyanishiwa bwino, tacakaanshe ukukomaila pa bupilibulo bwa fishinka fyenu ifikalamba ilyo mulelanda ilyashi.

Inshila ikalamba iya kulenga ifishinka fikalamba ukupulamo yaba kulanda pa bushininkisho, pa malembo, na pa fyebo fimbi mu nshila ya kuti fyatonta pa cishinka cikalamba no kucilondolola bwino. Ifishinka fyonse ifinono finono filingile ukulenga icishinka cikalamba ukumfwika, ukushinina ukuti ico cishinka ca cine, nelyo ukucilondolola bwino. Mwilundako ifishinka fishilingile pantu fye nafimusekesha. Ilyo mulelanda ifishinka finono finono, londololeni bwino bwino ifyo fyampene ne cishinka cikalamba ico filetungilila. Mwilekela ibumba ati lyalaisangila ifyo fyampene. Ukwampana kuti kwalondolwelwa mu kubwekeshapo amashiwi yapulilemo ayalelanga icishinka cikalamba nelyo mu nshita mu nshita ukubwekeshapo icicindememo mu cishinka cikalamba mulelandapo.

Bakalanda bamo balenga ifishinka fikalamba ukupulamo ukupitila mu kufipeela amanambala. Nangula iyi ni imo iya nshila sha kulenga ifishinka fikalamba ukupulamo, tailingile ukupyana pa kusala bwino ifishinka no kulanda ifyebo mu nshila ya mano.

Napamo kuti mwasala ukulanda icishinka cikalamba ica lyashi lyenu pa mubalo fye ilyo mushilalanda ifyebo filecitungilila. Ici cikafwa ibumba ukutesekesha ubucindami bwa fili no kukonkapo, kabili cili no kukomaila pa cishinka cikalamba. Kuti mwakomaila pa cishinka nga mwacisupawila pa numa ya kucilondolola bwino.

Mu Butumikishi bwa mwi Bala. Ifishinte filandilwepo pa muulu filabomba ku malyashi ya kwi bumba e lyo na ku kulanshanya kwa mu butumikishi bwa mwi bala. Pa kupekanya, tontonkanyeni pa fikalamba fikalamba ifyo abantu mu cifulo mushimikila baletontonkanyapo. Saleni umutwe wa kulanshanyapo uwingalenga mwabalondolwela ifyo isubilo lyaba mu Baibolo lingabafwa ukupwisha ubo bwafya. Saleni ifishinka fikalamba nangu fibili ifya kutungilila uyo mutwe. Fwayeni amalembo mwingabomfya pa kutungilila ifyo fishinka. Lyene teyanyeni ifyo muli no kutampa ukulanshanya kwenu. Ukupekanya kwa musango yo kuti kwalenga mwayalula nga cakabilwa, pantu e fyo cifwaikwa pa kulanshanya. Cikamwafwa no kulanda icintu ico abene mayanda bashakalabe.