ISAMBILILO 8

Kaaneni Ukupepa kwa Bufi; Pepeni Ukupepa kwa Cine

1. Cinshi abantu balingile ukusala lelo ukukuma ku kupepa?

YESU atile: “Uushili pamo na ine, ninshi apusana na ine.” (Mateo 12:30) Twaba ku lubali lwa kwa Yehova nelyo ku lubali lwa kwa Satana. Abantu abengi batontonkanya ukuti balebombela Lesa ifyo afwaya, lelo Baibolo itila Satana ‘alelufya bonse abaikala mu calo conse.’ (Ukusokolola 12:9) Abantu iminshipendwa basumina ukuti bapepa Lesa, nomba babombela Satana Kaseebanya! Abantu lelo bafwile ukusala pali ifi: Bafwile ukubombela Yehova, “Lesa wa cishinka,” nelyo Satana, “wishi wa [bufi].”—Amalumbo 31:5; Yohane 8:44.

Fumeni ku Kupepa kwa Bufi

2. Ni nshila nshi imo Satana eseshamo ukulesha abantu ukupepa Yehova?

² Ukusala ukubombela Yehova e kusala kwa mano, kabili kusala ukulenga Lesa ukwanga. Lelo Satana tatemwa onse uubombela Lesa; alaleta amafya pa babombela Lesa. Inshila imo acitilamo ifi kuleta ukupumya no kukaanya ukufuma kuli bambi, nalimo fye ne fibusa na balupwa. Yesu asokele ati: “Kabili aba mu ng’anda yakwe e bakaba abalwani ba muntu.”—Mateo 10:36.

3. Nga aba mu lupwa lwenu nelyo ifibusa balemulesha ukupepa Lesa, cinshi mukacita?

³ Bushe ici nga camucitikila, mukacita shani? Abantu abengi balishiba ukuti ukupepa kwabo kwa bufi, nomba balashingashinga ukufumako. Batila ukucite fyo kuti kwaba kupondokela ulupwa. Bushe ici cisuma? Nga mwaishibe ukuti balupwa wenu balebomfya imiti ikola iyabipisha, bushe teti mubasoke ukuti iyo miti kuti yabaletela amafya? Bushe na imwe kuti mwatendeka ukubomfya iyo miti ikola?

4. Cinshi Yoshua asosele ku bena Israele ukukuma ku kupepa kwaliko mu nshiku shakwe?

⁴ Yoshua akoseleshe abena Israele ukuleka imisango ne myata ya mipepele yabipa iya bashibo. Atile: “Nomba beleni Yehova akatiina, no kumubombela muli bumpomfu na mu cishinka; fumyeni ne milungu iyo bashinwe babombeele kwi shilya lya Mulonga na mu Egupti, no kubombela Yehova.” (Yoshua 24:14) Yoshua ali uwa cishinka kuli Lesa, kabili Yehova alimupaalile. Nga twaba aba cishinka kuli Yehova, akatupaala na ifwe.—2 Samwele 22:26.

Ifisambilisho fya Mipepele Ifya Cine ne fya Bufi

Balesa Batatu: Imipepele iingi isambilisha kuti Lesa abamo Batatu. Batila “Tata ni Lesa, Umwana [Yesu] ni Lesa, no Mupashi wa Mushilo ni Lesa, lelo tababa balesa batatu lelo ni Lesa umo.”

Baibolo tailumbula na mashiwi ya kuti “Balesa Batatu,” kabili taisambilisha ukuti Yehova muntu umo uwabamo batatu. Yehova eka e Lesa. Pali 1 Abena Korinti 8:6 patila: “Kuli ifwe kwaba Lesa umo fye.” Yehova e Wapulamo. Yesu te Lesa, lelo “Mwana wa kwa Lesa.” (1 Yohane 4:15) Umupashi wa mushilo na o te Lesa. Umupashi wa mushilo wene te muntu na kuba. Maka yabomba aya kwa Lesa.—Imilimo 1:8; Abena Efese 5:18.
Umweo: Imipepele iingi isambilisha ukuti umweo cintu cimo icaba mu muntu icishifwa. Baibolo isambilisha ukuti umweo e muntu wine, kabili, umuntu alafwa.—Ukutendeka 2:7; Esekiele 18:4.
Umulilo wa pe: Imipepele ya bufi isambilisha ukuti imyeo ya babifi ilalungulushiwa umuyayaya mu mulilo wa pe. Baibolo itila abafwa “bantu abashaishiba kantu nangu kamo.” (Lukala Milandu 9:5) Baibolo kabili isambilisha ukuti “Lesa kutemwa.” (1 Yohane 4:8) Yehova, Lesa wa kutemwa, teti alungulushe bambi mu mulilo.

Akabokoshi: Cinshi Baibolo isambilisha ukukuma kuli Balesa Batatu, umweo, no mulilo wa pe?

Pooseni Ifintu Ifibomfiwa mu Kupepa kwa Bufi

Umwanakashi aleoca ifya buloshi ifyo alebomfya

5. Cinshi tulingile ukonawila ifinkolonkolo ifibomfiwa ku malele?

⁵ Ukufuma ku kupepa kwa bufi kwalola mu kuti tufwile no konaula ifinkolonkolo fyonse ifyo twakwata ifibomfiwa ku malele, pamo nga ifipuuta, inindaminwe ne fikosa fya malele, e lyo na fimbi ifyaba nge fi. Ukucite fi kwalicindama pantu kulanga ukuti twacetekela Yehova umupwilapo.

6. Cinshi Abena Kristu aba kubalilapo bacitile ku mabuuku yabo ayalelanda pa malele?

⁶ Moneni ico Abena Kristu bamo aba kubalilapo bacitile ilyo basalile ukupepa kwa cine. Baibolo itila: “Na bengi ba mu balecita amalele, pa kulonganya amabuuku yabo, bayocele pa menso ya bonse.”—Imilimo 19:19.

7. Cinshi twingacita nga ifiwa fyatucusha?

⁷ Bamo abatendeka ukubombela Yehova kabili abo kale bacitile ubuloshi na malele kuti balacushiwa ku fiwa. Ica musango yo nga cacitika, pepeni kuli Yehova mu kupongomoka, ukulumbula ishina lyakwe. Akamwaafwa.—Amapinda 18:10; Yakobo 4:7.

8. Bushe Abena Kristu bamona shani ifilubi, ifipasho, ne fikope ifibomfiwa mu kupepa kwa bufi?

⁸ Abalefwaya ukubombela Yehova tabafwile kusunga nelyo ukubomfya ifilubi, ifipasho, nelyo ifikope fyonse ifya kupepa kwa bufi. Abena Kristu ba cine ‘bendela mu kutetekela, te mu kumona.’ (2 Abena Korinti 5:7) Balicindika ifunde lya kwa Lesa ilikaanya ukubomfya ifimpashanya pa kupepa.—Ukufuma 20:4, 5.

Bishanyeni na Bantu ba kwa Yehova

Umwanakashi no mwana wakwe balepekanya ifya kulya

9. Kupanda mano nshi Baibolo ipeela ukukuma ku kuba uwa mano?

⁹ Baibolo itila: “Enda na ba mano e lyo ukubo wa mano.” (Amapinda 13:20) Nga tulefwaya ukuba aba mano, tufwile ukwenda, nelyo ukubishanya, ne Nte sha kwa Yehova. E bantu abaleenda mu nshila iitwala ku mweo.—Mateo 7:14.

10. Bushe Inte sha kwa Yehova kuti bamwaafwa shani ukubombela Lesa?

¹⁰ Inte cine cine balasakamana abantu. Umulimo wabo wa kwaafwa abantu abafumacumi ukumfwikisha icine ca mu Baibolo icitungulula ku mweo wa muyayaya. Kuti bamwaafwa pa kusambilila Baibolo na imwe, ukwabula ukumulipilisha. Bakaasuka amepusho yenu no kumulanga ifya kubomfya ukwishiba kwa mu Baibolo mu mikalile yenu.—Yohane 17:3.

11. Bushe ukulongana kwa Bwina Kristu kukamwaafwa shani?

¹¹ Pa kulongana kwabo, ilingi line ukubela pa Ng’anda ya Bufumu, mukasambilila ifingi pa mibele ya kwa Yehova. Mukakoshiwa mu kufwaisha kwenu ukwa kupepa ukupepa kwa cine. Kabili mukasambilila ne fya kwaafwa bambi ku kusambilila icine ca mu Baibolo.—AbaHebere 10:24, 25.

Aba mu cilonganino balelongana pa Ng’anda ya Bufumu

12. Bushe ipepo kuti lyamwaafwa shani ukubombela Lesa?

¹² Ilyo mulesambilila ifingi pa kufwaya kwa kwa Yehova, mukomfwikisha no kutasha inshila shakwe ishisuma. Kabili mufwile no kulunduluka mu kufwaisha ukucita ifimutemuna no kukanacita ifimukalifya. Muleibukisha ukuti kuti mwalanda na Yehova mwi pepo ku kumulomba ukumwafwa ukucita icalungama no kutaluka ku cabipa.—1 Abena Korinti 6:9, 10; Abena Filipi 4:6.

Aba mu lupwa balebelengela Baibolo pamo — Kuti mwacita shani pa kuba mu cilonganino ca mapepo ica cine?

13. Kuti mwalenga shani umutima wa kwa Yehova ukusamwa?

¹³ Mu kupita kwa nshiku, ilyo mulelunduluka lwa ku mupashi, mukeluka ukuti mulingile ukuba Inte ya kwa Yehova uwaipeela kabili uwabatishiwa. Nga mwaba pa bantu ba kwa Yehova, mukalenga umutima wa kwa Yehova ukusamwa. (Amapinda 27:11) Mukaba pa bantu ba nsansa abo Lesa atila: “Nkekala muli bene no kwendaendamo; kabili nkaba Lesa wabo, na bo bakaba abantu bandi.”—2 Abena Korinti 6:16.

Nalubwike ku Fiwa

Bushiku bumo ilyo nalele pa busanshi na balume bandi, naumfwile umuntu anjita imiku itatu. Lyene namwene mu mutenge mwaisuka, kabili icintu cabulungana camponene pa mala. Kwena, abalume bandi bene tabalemona ifi. Nomba, naleumfwa ukukaba apakalamba pa myeshi iingi.

Ilyo papitile imyeshi 6, naumfwile ili shiwi na kabili. Apo pene fye namwene kwati ing’anda yonse ili mu menshi. Ulusato ulukalamba lwafumine mu menshi no kwenda panono panono pa kuboko kwandi. Nalyeseshe nga nshi ukulutamfula. Naletiina. Lyene amenshi ne cisoka fyalekele ukumoneka, kabili napooselwe pa nshi icabipisha. Nafwile umutombo pa maawala ayengi. Lyene ishiwi lyanjebele ukubwelela kwi tempele lya mipashi uko bondapila mu mushi. Ilyo naipwishe uyu mupashi ishina lya uko, walandile ishina ilipilibula “umukankaala lelo uushakwata mwana.” Walaile ukuncita umukankaala pa kumpeela amaka ya kuundapa.

Abalwele baleisa kuli ine ukufuma mupepi no kutali. Ilyo bashilafika pa ng’anda pa mwandi, balemoneka mu cilola caibela. Lyene, ilyo umo afika, nalemuposha, kabili apo pene fye ubulwele nelyo ubwafya ne fya kubupwisha fyalesokololwa kuli ine. Umupashi kabili walenjeba indalama abantu balekabila ukulipila.

Indalama ne fya bupe ifingi fyaleisa pantu abantu naleundapa balepola. Nasangwike “umukankaala,” lelo naishibe no mwalolele amashiwi ya kuti “uushakwata mwana.” Lyonse ilyo nafyala umwana, ninshi umukalamba wakwe alafwa. Ici calenenga ubulanda apakalamba. Imyaka 12 nabombele uyu mupashi, abana bandi 6 balifwile.

Natendeke ukupepa kuli Lesa ukuti angafwe. Nalepepa sana. Bushiku bumo Inte sha kwa Yehova baishile pa mwandi. Nangu ca kuti nalebatamfya ilingi, buno bushiku nafwaile ukukutika kuli bene. Ilyo twalelanshanya, nasambilile ukuti nalebombela iciwa! Napingwilepo ukuleka ukupupe mipashi.

Ilyo naebele umupashi ico napingwile ukucita, walinsokele ukukanacita ifyo. Lelo, natile: “Nakubombela pafula.”

Naocele fyonse ifyo nalebomfya mu kubuka. Nasambilile Baibolo ne Nte, ukuba umubomfi wa kwa Yehova, no kubatishiwa mu 1973. Nomba nalikwata abana basano abakosa. Umulume wandi na o ni Nte uwabatishiwa.”—Ili lyashi lyashimikwe na baJosephine Ikezu.

Akabokoshi: Bushe umwanakashi umo alubwike shani ku fiwa?