Bushe Tufwile Ukuitakisha Pa Cili Conse?

BUSHE ukuitakisha cipilibula cinshi? Bushe walikwishiba?— Pano pali ica kumwenako. Bushe walyeshapo ukucita icili conse ico ushaishiba bwino ukucita? Napamo waeseshe ukupanta umupila. Nelyo waeseshe ukucilauka umwando. Bushe kwali uwalandile ati, “Haa! Haa! Haa! Kuti nakucila ukucite co”?— Uyo muntu aleitakisha.

Bushe uyumfwa shani lintu bambi bacite fyo? Bushe ulatemwa?— Lyene, uletontonkanya ukuti bambi bomfwa shani nga waitakisha?— Bushe cisuma ukweba umuntu ati, “Nalikucila”?— Bushe Yehova alafwaya abantu abacite fyo?—

Kasambilisha Mukalamba alishibe abantu abaleyumfwa ukuti balicila bambi. Baleitakisha, nelyo ukuitutumuna, no kusuula bambi bonse. E co bushiku bumo Yesu abashimikile umulumbe ku kubalanga ifyo ukuitakisha kwabipa. Natukutike.

Uyu mulumbe wa pa muFarise no musangushi. AbaFarise bali ni bakasambilisha ba fya mapepo kabili ilingi balecita kwati balilungama ukucila bambi nelyo ukuti ba mushilo ukucila bambi. UmuFarise wa mu mulumbe wa kwa Yesu aile kwi tempele lya kwa Lesa ku Yerusalemu mu kupepa.

Yesu alandile ati no musangushi aile kwi tempele ku kupepa. Abantu abengi tabatemenwe abasangushi. Baleyumfwa ukuti abasangushi balebaliila indalama. Kabili ca cine ukuti abasangushi abengi tabali aba cishinka.

Pe tempele, uyu muFarise atendeke ukupepa kuli Lesa ati: ‘Mwe Lesa, ndemutootela ico nshili umubembu nga bantu bambi. Nshibeepa abantu nelyo ukucita ifintu fyabipa. Nshaba ngo yu musangushi uuli palya. Ndi muntu uwalungama. Ndeko kulya imiku ibili mu mulungu pa kuti ningakwata inshita ikalamba iya kutontonkanya pali imwe. Kabili mpeela kwi tempele ica bupe ukufuma pali fyonse ifyo nkwata.’ Uyu muFarise atontonkenye ukuti alicilile bambi, bushe te ifyo?— Kabili aebele na Lesa pa lwa ici.

Lelo ulya musangushi te fyo ali. Taloleshe na ku muulu lintu alepepa. Aiminine ukutali nakontama no kukontama. Uyu musangushi alibipilwe pa membu shakwe, kabili ayumine pa cifuba mu bulanda. Taeseshe ukweba Lesa ifyo ali umusuma. Lelo, apepele ukuti: ‘Mwe Lesa, mumbeleleko uluse ne mubembu.’

Pali aba baume babili, nani uletontonkanya asekeshe Lesa? Bushe ali muFarise, uwaletontonkanya ukuti ali muntu musuma? Nelyo bushe ali musangushi, uwayumfwile ubulanda pa membu shakwe?—

Yesu alandile ati umusangushi e wasekeshe Lesa. Mulandu nshi? Yesu alondolwele ati: ‘Ico onse uwesha ukumoneka kwati alicila bambi akasaalulwa. Kabili uuibika pa nshi akabikwa pa muulu.’—Luka 18:9-14.

Lisambililo nshi Yesu alesambilisha mu mulumbe wakwe?— Alesambilisha ukuti calilubana ukutontonkanya ukuti twalicila bambi. Tatwingalanda ukuti tutontonkanya ati twalicila bambi, lelo ku fyo tucita, kuti twalanga ukuti e fyo tutontonkanya. Bushe walibalacitapo ifyo?— Natumone ifyo cali ku mutumwa Petro.

Ilyo Yesu aebele abatumwa bakwe ukuti bonse bali no kumusha lintu bakamwikata, Petro aitakishe ukuti: ‘Nangu bonse bamusha, ine nshakamushe!’ Lelo Petro alilubile. Aliicetekele sana. Alishiile Yesu. Lelo, alibwelele, nga fintu tuli no kusambilila mu Cipandwa 30 ica cino citabo.—Mateo 26:31-33.

Natumone ica kumwenako ca muno nshiku. Tutile iwe na untu usambilila nankwe balemwipusha ifipusho ku sukulu. Kuti wacita shani nga uleasuka bwangu ifyasuko lelo umunobe alefilwa? Kwena, ulatemwa nga nawishiba ifyasuko. Lelo bushe kuti cawama ukuilinganya ku ushileasuka bwangu?— Bushe cisuma ukwesha ukuilenga wamoneka ukuti naumucila no kulenga uyo muntu amoneka kwati wa pa nshi kuli iwe?—

Ifi e fyo umuFarise acitile. Aliitakishe ukuti alicilile ulya musangushi. Lelo Kasambilisha Mukalamba alandile ukuti ulya muFarise alilubile. Ca cine ukuti umuntu umo kuti acita icintu cimo bwino ukucila umbi. Lelo ico tacilepilibula ukuti alimucila icine cine.

E co nga twalishiba ifingi ukucila umuntu umbi, bushe uyo mulandu usuma uwa kuitakishishapo?— Tontonkanyapo. Bushe ni fwe twapangile bongobongo wesu?— Iyo, Lesa e wapeele umo umo uwa ifwe bongobongo. Kabili ifingi ifyo twaishiba, twasambilile kuli umo. Napamo twafibelengele mu citabo. Nelyo umuntu alitwebeleko pali ifi fintu. Nangu twaisambilishe fwe bene, bushe twacishibe shani ico cintu?— Ca cine, ni pa kubomfya bongobongo Lesa atupeela.

Lintu umuntu aibikilishako, icisuma iwe ukucita kulanda ifya kumukoselesha. Mwebe ukuti wacitemwa ifyo acicita. Limbi kuti wamwafwa ukucita bwino. Ifi e fyo wingatemwa abantu ukucita kuli iwe, bushe te ifyo?—

Abantu bamo ba maka ukucila bambi. Ni shani nga ca kuti uli wa maka ukucila abana banobe mu lupwa? Bushe ico cintu ca kuitakishishapo?— Iyo. Ifya kulya tulya e fitupeela amaka. Kabili Lesa e upeela akasuba ne mfula na fyonse ifikabilwa ku kulenga ifya kulya ukukula, bushe te ifyo?— E co, ni Lesa tufwile ukutasha nga twaba na maka.—Imilimo 14:16, 17.

Tapali uufwaya ukumfwa umuntu umbi aleitakisha, bushe te ifyo?— Natwibukishe amashiwi ya kwa Yesu aya kuti: “Ifyo mwatemwa abantu bacite kuli imwe, na imwe baciteni ifyo fine.” Nga twacite fyo, tatwakabe ngo muFarise uwaleitakisha uwa mu mulumbe wa kwa Kasambilisha Mukalamba.—Luka 6:31.

Inshita imo umuntu umo aitile Yesu ati musuma. Bushe Kasambilisha Mukalamba alandile ati, ‘Ee, ndi musuma’?— Iyo. Lelo, alandile ati: “Tapaba musuma kano umo, ni Lesa.” (Marko 10:18) Nangu ca kuti Kasambilisha Mukalamba ali uwapwililika, taitakishe. Lelo, atwele ilumbo lyonse kuli Wishi, Yehova.

E co, bushe kuli uuli onse uyo twingaitakishishapo?— Ee, eko aba. Kuti twaitakishisha pali Kalenga wesu, Yehova Lesa. Lintu twamona ukuwa kwa kasuba ukulemoneka bwino nelyo icintu cimbi ica kupapusha ica bubumbo, kuti twaeba untu tuli nankwe ukuti, ‘Lesa wesu umusuma, Yehova, e wapangile ci!’ Lyonse natuleba abaipekanya ukulanda pa fintu fisuma ifyo Yehova acita kale ne fyo ali no kucita ku ntanshi.