Wikaba Umupuupu!

BUSHE balikwibilapo icintu?— Bushe wayumfwile shani pali co?— Uwakwibile ali mupuupu, kabili takwaba uwatemwa umupuupu. Bushe uletontonkanya ukuti umuntu asanguka shani umupuupu? Bushe e fyo afyalwa?—

Ni nomba line fye twasambilile ukuti abantu bafyalwa no lubembu. E co ifwe bonse tatwapwililika. Lelo takwaba uufyalwa umupuupu. Umupuupu kuti afuma ku lupwa ulusuma. Abafyashi bakwe, bamunyina, na bankashi yakwe kuti baba bantu ba cishinka. Lelo ukufwaya ifintu pamo nge ndalama ne fyo engashitamo kuti kwalenga umuntu aba umupuupu.

Kuti watila uwabalilepo ukuba umupuupu ali ni ani?— Natutontonkanyepo. Kasambilisha Mukalamba alishibe uyo muntu lintu ali ku muulu. Uyo mupuupu ali ni malaika. Lelo apo Lesa apangile bonse bamalaika abapwililika, uyo malaika aishileba shani umupuupu?— Nga fintu twasambilile mu Cipandwa 8 ica cino citabo, alefwaya icishali cakwe. Bushe ico cintu ulecibukisha?—

Lintu Lesa apangile umwaume wa kubalilapo no mwanakashi, uyo malaika alefwaya balemupepa. Takwete insambu sha kuti balemupepa. Lesa e wakwete insambu sha kupepwa. Lelo uyo malaika aibile isho nsambu! Pa kuleka Adamu na Efa balemupepa, uyo malaika asangwike umupuupu. Aishileba Satana Kaseebanya.

Cinshi cilenga umuntu ukuba umupuupu?— Kukumbwa ifishili fyakwe. Ulu lunkumbwa kuti lwakosa sana ica kuti kuti lwalenga na bantu abasuma ukucita ifintu fyabipa. Inshita shimo, abantu abasanguka abapuupu tabalapila no kutendeka ukucite fisuma na kabili. Umo ali mutumwa wa kwa Yesu. Ishina lyakwe ali ni Yuda Iskariote.

Yuda alishibe ukuti cali icabipa ukwiba pantu asambilishiwe Amafunde ya kwa Lesa ukufuma ku bwaice. Alishibe ukuti inshita imo Lesa alandile ukufuma ku muulu no kweba abantu bakwe ati: ‘Mwilaiba.’ (Ukufuma 20:15) Lintu Yuda akulile, akumene na Kasambilisha Mukalamba no kwisaba umusambi wakwe. Ku ntanshi, Yesu asalile na Yuda ukuba umo uwa batumwa bakwe 12.

Yesu na batumwa bakwe baleendela pamo. Baleliila pamo. Kabili indalama shonse isho ili bumba lyalekwata shalebikwa mu kabokoshi. Yesu apeele Yuda ukusunga kalya kabokoshi. Kwena, indalama tashali sha kwa Yuda. Lelo bushe walishiba ico Yuda atendeke ukucita ilyo papitile nshita?—

Yuda atendeke ukusenda indalama mu kabokoshi ukwabula insambu. Alesendamo indalama lintu bambi bashilemonako, kabili aeseshe no kusangako inshila sha kukwatilamo indalama na shimbi. Atendeke ukutontonkanya pa ndalama inshita yonse. Natumone ifyo ulu lunkumbwa lwabipa lwamulengele ukucita ilyo kwashele fye inshiku shinono ukuti Kasambilisha Mukalamba epaiwe.

Maria, nkashi kwa cibusa wa kwa Yesu, Lasaro, abuulile amafuta yasuma no kusuba Yesu ku makasa. Lelo Yuda aliilishanya. Bushe walishiba umulandu?— Atile ni pa mulandu wa kuti yalya mafuta nga balishitishe ne ndalama bapeela abapiina. Lelo alefwaya fye ukuti mu kabokoshi mube indalama ishingi pa kuti ebe.—Yohane 12:1-6.

Yesu aebele Yuda ukuleka ukucusha Maria, uyo wali ne cikuuku. Yuda tatemenwe lintu Yesu amwebele fyo, e co aile kuli bashimapepo bakalamba, abali abalwani ba kwa Yesu. Balefwaya ukwikata Yesu, lelo balefwaya ukucite co ubushiku pa kuti abantu bebamona.

Yuda aebele aba bashimapepo ati: ‘Nalamweba ifyo mwingekata Yesu nga mwampeela indalama. Ni shinga mwalampeela?’

Bashimapepo bamwaswike ati: ‘Twalakupeela indalama sha silfere 30.’—Mateo 26:14-16.

Yuda asendele isho ndalama. Cali fye kwati aleshitisha Kasambilisha Mukalamba kuli balya bantu! Bushe kuti watontonkanya ati kuti kwaba uwingacite cabipa umusango yu?— Ica musango yu e cicitika lintu umuntu asanguka umupuupu no kulaiba indalama. Alatemwa indalama ukucila ifyo atemwa abantu bambi no kucila ifyo atemwa na Lesa wine.

Napamo kuti watila, ‘Nshakatemwe icintu ukucila ifyo natemwa Yehova Lesa.’ Cisuma ukuti e fyo uyumfwa. Lintu Yesu asalile Yuda ukuba umutumwa, ifyo napamo e fyo Yuda aleyumfwa. Bambi abaishileba abapuupu napamo na bo e fyo baleyumfwa. Natulande pali bamo.

Umo ali mubomfi wa kwa Lesa uwaleitwa ati Akani, uwaliko kale sana ilyo Kasambilisha Mukalamba talafyalwa. Akani amwene insalu iisuma, ululimi lwa golde ne ndalama sha silfere. Tafyali fyakwe. Baibolo itila fyali fya kwa Yehova pantu fyasendelwe ku balwani ba bantu ba kwa Lesa. Lelo Akani alefwaisha ifyo ica kuti aibile ifi fintu.—Yoshua 6:19; 7:11, 20-22.

Pano pali ica kumwenako na cimbi. Kale sana, Yehova asalile Davidi ukuba imfumu ya bena Israele. Bushiku bumo, Davidi atendeke ukutamba umwanakashi uwayemba Batisheba. Atwalilile ukulolekesha Batisheba no kutontonkanya pa kumusenda ku mwakwe ngo mukashi wakwe. Lelo, ali mukashi wa kwa Uria. Cinshi Davidi alekabila ukucita?—

Davidi alekabila ukuleka ukutontonkanya pali Batisheba. Lelo tacitile fyo. E co Davidi amusendele ku ng’anda. Kabili aipaishe na Uria. Mulandu nshi Davidi acitile ifi fintu fyabipa?— Pantu atwalilile ukufwaya umwanakashi uwali wa muntu umbi.—2 Samwele 11:2-27.

Pa mulandu wa kuti Davidi alilapiile, Yehova alimulekele atwalilila ukuba no bumi. Lelo nomba Davidi alikwete amafya ayengi. Umwana wakwe Abishalomu alefwaya ukupoka Davidi ubufumu. E co lintu abantu baisa mu kumona Davidi, Abishalomu alebakumbatila no kubafyompa. Baibolo itila: “Abishalomu aibile imitima ya bena Israele.” Alengele abo bantu batendeka ukufwaya ukuti wena abe imfumu ukucila Davidi.—2 Samwele 15:1-12.

Bushe walibala aufwaishapo icintu, nga Akani, Davidi, na Abishalomu?— Nga ca kuti ico cintu ca muntu umbi, ukusenda ukwabula ukupeelwa kwiba. Bushe uleibukisha ico umupuupu wa kubalilapo, Satana alefwaya?— Alefwaya abantu ukulamupepa ukucila ukulapepa Lesa. E co Satana aleiba lintu alengele Adamu na Efa ukumumfwila.

Ilyo umuntu akwete icintu, alikwata insambu sha kusala uwingacibomfya. Ku ca kumwenako, kuti waya mu kwangala na bana bambi mu ng’anda mu mwabo. Bushe kuti caba bwino ukusenda icintu mu ng’anda no kutwala ku mwenu?— Kano nga ca kuti bawishi nelyo banyina bakweba ati senda. Nga wasenda icintu ukufuma kwa bene ukwabula ukwipusha, ninshi waiba.

Mulandu nshi pambi wingatunkilwa ukwiba?— Pantu ulefwaya icintu icishili cobe. Nangu ca kuti umuntu umbi takumwene wasenda, ni ani uumona?— Yehova Lesa. Kabili tufwile ukwibukisha ukuti Lesa alipato kwiba. E co ukutemwa Lesa na banobe kukakwafwa ukukanaba umupuupu.