Cinshi Cikacitika Nga Twafwa?

NGA fintu waishiba, abantu lelo balakota, ukulwala, no kufwa. Na bana bamo balafwa. Bushe ufwile ukutiine mfwa nelyo umuntu uwafwa?— Bushe walishiba icicitika nga twafwa?—

Takwaba uuli uwa mweo ilelo uwafwapo no kubuuka no kwisatweba icicitika. Lelo lintu Yesu, Kasambilisha Mukalamba, ali pe sonde, kwali umuntu wa musango yo. Kuti twasambilila pa ficitika ku bafwa lintu twabelenga pali wene. Uyo muntu ali ni cibusa wa kwa Yesu kabili aleikala ku Betani, itauni linono ilyali mupepi na Yerusalemu. Ishina lyakwe ali ni Lasaro, kabili akwete inkashi shibili, umo ali ni Marita na umbi Maria. Natumone ifyo Baibolo ilanda ukuti e fyacitike.

Bushiku bumo Lasaro alwalisha. Pali iyi nshita, Yesu ali ukutali. E co Marita na Maria batuma uwa kuyaeba Yesu ukuti indume yabo, Lasaro, mulwele. Bacite ci pantu nabeshiba ukuti Yesu kuti aisaposha indume yabo. Yesu te dokota, lelo alikwata amaka ukufuma kuli Lesa aya kuposha amalwele yonse.—Mateo 15:30, 31.

Lelo, ilyo Yesu ashilaya mu kumona Lasaro, Lasaro alwalisha no kufwa afwa. Lelo Yesu aeba abasambi bakwe ukuti Lasaro nalaala no kuti Alayamubuusha. Abasambi bafilwa ukumfwikisha ifyo Yesu alepilibula. E co Yesu alandilapo fye ati: “Lasaro nafwa.” Cinshi ici calanga pa lwa mfwa?— Ukuti yaba kwati tulo utukalamba. Tulo utukalamba sana ica kuti umuntu taloota no kuloota.

Yesu nomba aleya mu kumona Marita na Maria. Ifibusa ifingi ifya ulu lupwa na bo nabafika kale. Beshile mu kusansamusha aba bana nkashi pantu indume yabo naifwa. Lintu Marita aumfwa ukuti Yesu aleisa, aya mu kumukumanya. Tapakokwele Maria na o aya mu kumona Yesu. Ali no bulanda sana kabili alelila, kabili awa pa makasa yakwe. Ifibusa fimbi abakonkele Maria na bo balelila.

Kasambilisha Mukalamba aipusha uko babikile Lasaro. Ilyo line, abantu batungulula Yesu ku ninga uko babikile Lasaro. Lintu Yesu amona abantu bonse balelila na o atendeka ukulila. Alishiba ifyo cikalipa lintu uwatemwikwa afwa.

Pa ninga pali cilibwe, e co Yesu atila: “Fumyenipo ilibwe.” Bushe bafwile ukufumyapo ilibwe?— Marita taletontonkanya ukuti cili bwino ukucite co. Atila: “Mwe Shikulu, nomba alenunka; pantu lelo e bwalenga shine.”

Lelo Yesu amweba ati: “Bushe nshisosele kuli iwe, nati, Nga watetekela ulemono bukata bwa kwa Lesa?” Yesu alepilibula ati Marita ali no kumona icingaleta umucinshi kuli Lesa. Cinshi Yesu alacita? Ilyo bafumyapo ilibwe, Yesu apepa ne shiwi likalamba kuli Yehova. Lyena Yesu abilikisha ati: “We Lasaro, fumina kuno nse.” Bushe alafuma? Bushe kuti afuma?—

Bushe kuti wabuusha umuntu uleele?— Ee, nga wabilikisha kuti abuuka. Lelo bushe kuti wabuusha umuntu uleele mu mfwa?— Iyo. Te mulandu ne fyo wabilikisha, uufwile te kuti omfwe. Tapali ico iwe nelyo ine nelyo umuntu umbi pano isonde engacita ku kubuusha abafwa.

Lelo Yesu taba nga ifwe. Akwata amaka yaibela ukufuma kuli Lesa. E co lintu Yesu aita Lasaro, icintu ca kupapusha cacitika. Umuntu uwali nafwa pa nshiku shine afuma mu ninga! Abuushiwa! Atendeka ukupeema, ukulanda no kwenda na kabili! Cine cine, Yesu abuusha Lasaro ku bafwa.—Yohane 11:1-44.

Nomba tontonkanyapo: Cinshi cacitike kuli Lasaro lintu afwile? Bushe icintu cimo muli wene—e kutila umweo nelyo umupashi—califumine muli wene no kuya kumbi? Bushe umweo wa kwa Lasaro waile ku muulu? Bushe ali uwa mweo pa nshiku shine ku muulu na Lesa na bamalaika ba mushilo?—

Iyo. Ibukisha, Yesu atile Lasaro ali nalaala. Bushe ciba shani nga naulaala? Nga uponene mu tulo tukalamba, tawishiba ifilecitika, bushe te ifyo?— Kabili lintu wabuuka, tawishiba ubukulu bwa nshita waciba mu tulo mpaka wamona pa nkoloko.

E fyo caba na ku bantu abaafwa. Tabaishiba nangu cimo. Tabomfwa icili conse. Kabili tabengacita icili conse. E fyo cali kuli Lasaro ilyo afwile. Imfwa yaba ngo tulo tukalamba umo umuntu ashibukisha nangu cimo. Baibolo itila: “Lelo abafwa bantu abashaishiba kantu nangu kamo.”—Lukala Milandu 9:5, 10.

Tontonkanya na pali ci: Nga ca kuti Lasaro aali ku muulu pa nshiku shine, bushe nga talandile ifili fyonse pali ci?— Kabili nga ca kuti aali ku muulu, bushe Yesu nga alimubweseshe pe sonde ukumufumya ku ncende yawame fyo?— Iyo!

Lelo, abantu abengi batila twalikwata umweo, kabili batila uyu mweo taufwa lintu umuntu afwa. Batila umweo wa kwa Lasaro tawafwile, waile kumbi. Lelo Baibolo te fyo ilanda. Itila Lesa apangile umuntu wa kubalilapo Adamu “icibumbwa ca mweo.” Adamu ali mweo. Baibolo itila lintu Adamu abembwike, alifwile. Aishileba “umubili wa mufwe,” kabili abwelele ku lukungu uko afumine. Baibolo isosa no kuti abana ba kwa Adamu bonse bapyene ulubembu ne mfwa.—Ukutendeka 2:7; 3:17-19; Impendwa 6:6; Abena Roma 5:12.

E co, caumfwika ukuti tatwakwata umweo uushaba ulubali lwa mubili. Umo umo uwa ifwe tuli myeo. Kabili apo abantu balipyana ulubembu ku muntu wa kubalilapo, Adamu, Baibolo itila umweo ulafwa.—Esekiele 13:19.

Abantu bamo balatiina abafwa. Tabapalama ku nshishi pantu batontonkanya ati abafwa balikwata imyeo iifuma mu mubili iingacita icabipa ku bali no mweo. Lelo bushe umuntu uwafwa kuti acita icabipa ku muntu uuli no mweo?— Iyo.

Abantu bamo basumina no kuti abafwa kuti babwela nge mipashi ku kutandalila aba mweo. E co balabikila abafwa ifya kulya. Lelo abantu bacite fyo tabasumina ifyo Lesa alanda pa bafwa. Nga twasumina ifyo Lesa alanda, tatwakatiine abafwa. Kabili nga tulatasha Lesa icine cine pa mweo wesu, tukalange co pa kucita ifintu Lesa asuminisha.

Lelo kuti waipusha ati: ‘Bushe Lesa akabuusha abaice abafwa? Bushe alafwaya ukucite co?’ Ico e co tuli no kulandapo.