Ni kwi Kufuma Indalama Tubomfya mu Mulimo wa mwi Sonde Lyonse?

Fwe Nte sha kwa Yehova tulapulinta amaBaibolo na mabuuku ayengi sana cila mwaka no kupeela abantu ukwabula ukubashitisha. Tulakuula Amayanda ya Bufumu na maofeshi ya musambo no kulawamya ifileonaikako. Tulasakamana ababombela pa Bethel na bamishonari abengi, kabili tulapeela abaponenwe akayofi ifyo balekabila. E ico kuti mwaipusha amuti, ‘Bushe indalama shibomfiwa kuli ifi fyonse shifuma kwi?’

Tatulipilisha indalama, tatupoka ica pe kumi, nelyo ukupishamo imbale sha mutuulo. Nangu ca kuti indalama shifwaikwa pa kuti tubombe umulimo wa kushimikila shingi, tatulombelesha indalama. Ifi e fyo na Ulupungu lwa kwa kalinda ulwa bubili ukufuma, lwasosele imyaka ukucila 100 iyapita. Lwatile, apo Yehova alatutungilila, “tatwakatale atulombelesha nangu ukupaapaata abantu ukuti batupeeleko indalama,” na cine tatwalombeleshapo indalama!—Mateo 10:8.

Indalama tubomfya shifuma ku baitemenwa fye ukupeela ubupe. Abantu abengi balitemwa umulimo wa kusambilisha abantu Baibolo uo tubomba, e ico balatupeela ubupe bwa kwafwilisha uyu mulimo. Ba Nte nabo balaitemenwa ukubomfya inshita yabo na maka, ne ndalama e lyo ne fintu fimbi ifyo bakwata ku kucita ukufwaya kwa kwa Lesa mwi sonde lyonse. (1 Imilandu 29:9) Pa Mayanda ya Bufumu, palaba utubokoshi umo abalefwaya ukupeela ubupe bengabika indalama. Nelyo kuti bapeela ubupe ukubomfya webusaiti yesu iya jw.org.Indalama ishingi shifuma ku bantu abashili bakankaala, ababa nga mukamfwilwa umupiina uo Yesu atashishe, uwapoosele utundalama tubili utwacepesha mu cipao. (Luka 21:1-4) Kanshi uuli onse kuti “alepaatulapo fimo” ifya kupeela ukulingana no “mo apangile mu mutima wakwe.”—1 Abena Korinti 16:2; 2 Abena Korinti 9:7.

Tatutwishika ukuti Yehova akula-afwa abafwaya ‘ukumucindika ku fyuma fyabo’ ukuti baletwalilila ukutungilila umulimo wa Bufumu, pa kuti ukufwaya kwakwe kulecitwa.—Amapinda 3:9.

• Bushe Inte sha kwa Yehova bapusana shani ne mipepele imbi?

• Bushe imipepele yesu ibomfya shani indalama isho tupeela mu kuitemenwa?