Insondwelelo

1, 2. Mulandu nshi tufwile ukukwatila icitetekelo pali nomba? Langilileni.

ICITETEKELO. Ili ishiwi lisuma sana kabili lilanda pa mibele iisuma nga nshi. Lelo nga twaumfwa ili ishiwi tufwile ukutontonkanya na pe shiwi na limbi. Ne li ishiwi, ni “angufyanyeni!” Nga tatwakwata icitetekelo, tufwile ukwangufyanya ukucikwata. Kabili nga twalikwata icitetekelo, tulingile ukwangufyanya ukucicingilila no kucita ifingacikosha. Mulandu nshi?

² Elenganyeni ukuti mule-enda mu ciswebebe icikalamba kabili mulefwaisha amenshi. Nga mwayasanga mufwile ukuyasunga bwino kabili ilyo muleya mufwile ukulatapilamo na yambi aya kuyamufisha uko muleya. Twikala mu ciswebebe ca mampalanya, mu calo umo abantu bashakwata icitetekelo ca cine. Kanshi nga twakwata icitetekelo tufwile ukucicingilila no kulacita ifingalenga cakosa nga filya fine twingasunga bwino amenshi nga tuli mu ciswebebe. Tufwile ukubika amano ku kukwata icitetekelo pantu nga filya fine tushingaba no mweo nga tatukwete amenshi, te kuti tube ifibusa fya kwa Yehova nga tatukwete icitetekelo.—Rom. 1:17.

3. Finshi Lesa atucitila pa kutwafwa ukukwata icitetekelo kabili fintu nshi fibili ifyo tufwile ukwibukisha ukulacita?

³ Yehova alishiba ukuti tulafwaya sana ukukwata icitetekelo, kabili alishiba no kuti calyafya ukukwata icitetekelo no kucisunga. E mulandu wine atupeelela abantu aba kupashanya. Yehova aebele Paulo ukulemba ukuti: “Mube abapashanya abo abapokelele ifyalaiwe pantu balitetekele kabili balitekenye.” (Heb. 6:12) Kabili e co ukuteyanya kwesu kutwebela ukubika sana amano ku kupashanya abaume na banakashi aba citetekelo, pamo nga aba tulandilepo muli cino citabo. Nomba finshi tufwile ukulacita pali ino nshita? Tufwile ukwibukisha ukulacita ifintu fibili: (1) Tulingile ukulakosha icitetekelo cesu; (2) Tulingile ukulatontonkanya pe subilo lyesu.

4. Bushe cinshi cilanga ukuti Satana mulwani wa citetekelo cesu, lelo mulandu nshi uo tushifwile ukulamwena kwati te kuti tube ne citetekelo cakosa?

⁴ Twalilileni ukukosha icitetekelo cenu. Satana mulwani umukalamba uufwaya ukonaula icitetekelo. Uyu kateka wa cino calo alilenga abantu ukukanakwata icitetekelo. Alikwata sana amaka ukutucila. Lelo bushe tufwile ukulamona kwati te kuti tukwate icitetekelo no kucikosha? Awe! Yehova ni Cibusa uwafwa sana abantu bonse abafwaya ukukwata icitetekelo ca cine. Alitweba ukuti nga ali na ifwe, kuti twacimfya Kaseebanya no kuleka afulumuka kuli ifwe! (Yako. 4:7) Kuti twamukaana nga ca kuti cila bushiku tulecitako ifingakosha icitetekelo cesu. Finshi ifyo fine?

5. Bushe abaume na banakashi aba citetekelo abo Baibolo yalandapo, balecita shani pa kuti bakwate icitetekelo? Londololeni.

⁵ Nga fintu tumwene, abaume na banakashi abo Baibolo yalandapo, tabafyelwe fye ne citetekelo. Ifyo balecita e filanga ukuti umupashi wa mushilo uwa kwa Yehova e ulenga abantu ukuba ne citetekelo. (Gal. 5:22, 23) Balepepa kuli Lesa pa kuti abafwe kabili Yehova alitwalilile ukukosha icitetekelo cabo. Na ifwe e fyo tulingile ukulacita. Tatufwile ukulaba ukutila Yehova alapeela umupashi wakwe bonse abamulomba kabili abacita ifintu ukulingana ne fyo balepepelapo. (Luka 11:13) Bushe kuli na fimbi ifyo twingacita?

6. Finshi fingatwafwa ukusambililako ifingi ku bantu ba citetekelo abo Baibolo yalandapo?

⁶ Muli ici citabo twalandako fye pa bantu abanono abali ne citetekelo sana. Kwaliba na bambi abengi sana abo tushilandilepo! (Belengeni AbaHebere 11:32.) Nga twabikako amano, fingi twingasambilila kuli aba abantu ba citetekelo. Lelo nga tulebelenga fye pali aba bantu lubilo lubilo, tatwakakoshe icitetekelo cesu. Pa kuti tukasambilileko ifingi kuli aba bantu, tufwile ukumfwikisha ifyalecitika ne fyo ifintu fyali pali iyo nshita. Nga tuleibukisha ukuti balya abaume na banakashi bali ‘fye bantu nga ifwe bene,’ tukalafwaya ukubapashanya. (Yako. 5:17) Kuti twabalangulukilako nga twaelenganya ifyo baleumfwa ilyo balekwata amafya ayo na ifwe tukwatako.

7-9. (a) Bushe abaume na banakashi aba citetekelo bamo abo Baibolo yalandapo nga baumfwile shani abakwata ishuko lya kupepa Yehova nge fyo tumupepa? (b) Mulandu nshi tufwile ukukosesha icitetekelo cesu ku fyo tucita?

⁷ Ifyo tucita na fyo kuti fyakosha icitetekelo cesu. Pantu na kuba, ‘icitetekelo icabula imilimo califwa.’ (Yako. 2:26) Tontonkanyeni pa fyo abaume na banakashi abo tulandilepo bengatemwa nga ca kuti babapeele umulimo uo Yehova atweba ukubomba pali lelo!

⁸ Ku ca kumwenako, bushe Abrahamu nga acitile shani abamweba ukuti, ukucila ukupepela Lesa pa fipailo fya mabwe ifyali mu matololo, alepepa Yehova pamo na bantu bakwe mu Mayanda ya Bufumu ayasuma na pa kulongana kukalamba, uko amalayo ayo amwenene fye “ukutali” yalandwapo no kulondololwa bwino bwino? (Belengeni AbaHebere 11:13.) Inga Eliya, bushe aali no kucita shani abamweba ukuti mu nshita ya kubomba umulimo wa kwipaya bakapepa ba kwa Baali mu nshiku sha kuteka kwa mfumu iibi iyapondokele Yehova, alebomba umulimo wa kutandalila abantu no kubeba ubukombe bwa kubasansamusha no kubapeela isubilo? Bushe abaume na banakashi ba citetekelo nga tabasumine fye bwangu bwangu ukulapepa Yehova nge fyo tupepa pali lelo?

⁹ E ico natutwalilile ukulacita ifingakosha icitetekelo cesu. Nga twacita ifyo, twakulakonka ifyo abaume na banakashi ba citetekelo abalembwa mu Cebo ca kwa Lesa baalecita. Nga fintu tulandile mu mashiwi ya ntendekelo, twakulabatemwa sana kabili bakulaba fye nge fibusa. Lelo mu calo cipya, tuli no kuba nabo kabili bali no kuba ifibusa fyesu ifya cine cine.

10. Finshi fikatuletela insansa mu Paradaise?

¹⁰ Muletontonkanyapo sana pe subilo mwakwata. Isubilo ilyo Lesa atupeela lyalekosha sana abaume na banakashi ba citetekelo. Bushe na imwe lilamukosha? Ku ca kumwenako, elenganyeni ifyo cikaba ilyo mukamonana na babomfi ba kwa Lesa aba citetekelo abakabuuka ilyo kukaba “ukubuuka kwa balungama.” (Belengeni Imilimo 24:15.) Mepusho mwingatemwa ukwisabepusha?

11, 12. Mu calo cipya, mepusho nshi mwingatemwa ukwisaipusha (a) Abele? (b) Noa? (c) Abrahamu? (d) Ruti? (e) Abigaili? na (f) Estere?

¹¹ Ilyo mukamonana na Abele, bushe mukafwaya sana ukumwipusha ifyo abafyashi bakwe baali? Nelyo bushe mukafwaya ukumwipusha amuti: “Bushe walyeseshe ukulandako na bakerubi abalelonda inshila yaile mu Edeni? Bushe balyaswike?” Inga Noa ena? Bushe te kuti mutemwe ukwisamwipusha amuti: “Bushe abaNefili walebatiina? Bushe wacitile shani pa kusunga bwino inama shonse ishali mu bwato pa mwaka umo?” Nga mwakumanya Abrahamu kuti limbi mwaisamwipusha amuti: “Bushe mwalimonenepo na Shemu? Ni nani wakusambilishe pali Yehova? Bushe calikwafishe ukufuma mu Uri?”

¹² E lyo tontonkanyeni na pa mepusho yambi ayo mwingatemwa ukwisaipusha abanakashi ba citetekelo abakabuuka. “Ruti, cinshi calengele ube kapepa wa kwa Yehova?” “Abigaili, bushe walitiinine ukweba Nabali ifyo wayafwile Davidi?” “Estere, cinshi cacitike kuli iwe na Mordekai pa numa ya filya Baibolo yalandapo?”

13. (a) Mepusho nshi nalimo abakabuushiwa bakafwaya ukwisamwipusha? (b) Mumfwa shani nga mwatontonkanyapo pa fyo cikesaba nga mwaisamonana na baume na banakashi aba citetekelo?

¹³ Abaume na banakashi aba citetekelo nalimo nabo bakakwata ifipusho ifingi ifya kumwipusha. Cikawama sana ukubebako pa fyo inshiku sha kulekelesha shali na pa fyo Yehova alepaala abantu bakwe mu nshiku ishayafya! Ukwabula no kutwishika bakafwaya sana ukwishiba ifyo Yehova afikilishe amalayo yakwe yonse. Mu calo cipya, tatwakale-elenganya fye ifyo ababomfi ba kwa Lesa abalandwapo mu Baibolo baali. Tukaba nabo mu Paradaise! E ico mulebikako sana amano ku kwishiba aba bantu ba citetekelo kabili twalilileni ukubapashanya ilyo mulebombela Yehova pantu bakesaba ifibusa fyenu umuyayaya!