Ifyo Yesu Alekula Mu Nasarete

Yesu akuliile mu Nasarete. Uyu musumba wali uunono kabili tawali uwacindama. Wabelele ku kapinda ka kuso aka Yudea, mu citungu ca mpili ica Galili, ku masamba ya ci bemba icikalamba ico beta ati Bemba wa Galili.

Ilyo Yesu ali ne myaka nalimo ibili, Yosefe na Maria bafumine ku Egupti no kuya nankwe ku Nasarete. Pali iyi nshita Yesu e mwana fye uo bakwete. Pa numa Yosefe na Maria balikwete abana abaume na banakashi. Amashina ya bana abaume ni Yakobo, Yosefe, Simone, na Yuda. Kanshi abaice ba kwa Yesu, bonse pamo, abaume na banakashi balifikile 6, nalimo no kucilapo.

Yesu alikwete ba lupwa lwakwe na bambi. Bamo abo twaishiba ni Elisabete no mwana wakwe, Yohane, uwaleikala ku kapinda ka ku kulyo aka Yudea apali amakilomita ayengi. Salome, nkashi inankwe ya kwa Maria, nyina wa kwa Yesu aleikala mu Galili, mupepi na paleikala ulupwa lwa kwa Yosefe. Umulume wa kwa Salome ali ni Sebede. Abana babo abaume babili, Yakobo na Yohane, bafwile bali ni ba lupwa lwa kwa Yesu. Tatwaishiba nga ca kuti ilyo Yesu ali umwaice aleba nabo sana, na lyo line ilyo bakulile baleumfwana sana kabili baishileba abatumwa ba kwa Yesu.

Yosefe alebombesha pa kuti alesakamana ulupwa lwakwe ulwalekulilako. Aali ni kabasa. Yosefe alekusha Yesu ngo mwana wakwe, ne ci calengele Yesu balemwita ukuti “umwana wa kwa kabasa.” (Mateo 13:55) Yosefe alisambilishe Yesu umulimo wa bukabasa, kabili Yesu alishibe bwino sana uyu mulimo ica kuti mu kuya kwa nshita abantu balemwita ati: “Kabasa.”—Marko 6:3.

Ulupwa lwa kwa Yosefe lwalibikile sana amano ku kupepa Yehova. Yosefe na Maria balekonka Amafunde ya kwa Lesa, e ico balesambilisha abana babo pali Lesa ‘ilyo bekele mu mayanda na lintu bale-enda mu musebo na pa kulaala na pa kubuuka.’ (Amalango 6:6-9) Mu Nasarete mwali isunagoge, uko Yosefe no lupwa lwakwe baleya lyonse mu kupepa. Baibolo itila Yesu aingile mwi sunagoge “nge fyo atemenwe ukucita pa bushiku bwe Sabata.” (Luka 4:16) Ulupwa lwa kwa Yosefe lwalitemenwe ukuya kwi tempele lya kwa Yehova ku Yerusalemu.