Bushe Umuntu Kuti Abomba Imilimo Iisuma Pe Sabata?

Yesu alibilile sana imbila nsuma ilyo ali mu Galili. Lelo, ilyo alandile ukuti, “na mu misumba imbi ndi no kubila imbila nsuma iya Bufumu bwa kwa Lesa,” Yesu alefwaya ukushimikila na mu fifulo fimbi. E ico aile “aleshimikila mu masunagoge ya mu Yudea.” (Luka 4:43, 44) Ifyo acitile fyali bwino pantu iyi inshita yali muli ba April kabili Ica Kucilila cali mupepi no kubako mu Yerusalemu.

Amabuuku ya Mbila Nsuma yalilanda sana pa fyo Yesu abombele umulimo wa kubila imbila nsuma mu Galili, lelo tayalanda sana pa fyo abombele uyu umulimo mu Yudea. Nangu ca kuti abena Yudea abengi tabamutetekele, Yesu alitwalilile ukushimikila sana e lyo no kucita ifipesha amano konse uko aleya.

Tapakokwele, mu 31 C.E., Yesu aile ku Ca Kucilila ku Yerusalemu, uwali umusumba uukalamba sana mu Yudea. Kwali icishiba ukwali sana abantu icali mupepi ne Mpongolo ya Mpaanga ico baleita ati Betesida. Mu mbali ya ici icishiba mwali umwa kupita apali no mutenge. Abalwele abengi, impofu na balemana baleisa kuli ici cishiba. Cinshi baleilako? Ni co abantu balemona kwati umuntu kuti aundapwa nga bamwingisha mu cishiba nga ca kuti amenshi nayafundaulwa.

Pa bushiku bwe Sabata, Yesu asangile pali ici cishiba umwaume uwalwele pa myaka 38. Yesu amwipwishe ati: “Bushe ulefwaya ukupola?” Umulwele ayaswike ati: “Mukwai, nshakwata uwa kumbika mu cishiba ilyo amenshi yafundauka; pantu ilyo ndefwaya ukwingilamo, ninshi umbi naingilamo kale.”—Yohane 5:6, 7.

Yesu alandile amashiwi ayapapwishe uyu mwaume na bonse abaumfwileko. Atile: “Ima, senda ubutanda bobe, no kwenda.” (Yohane 5:8) Umulwele alicitile ifi fine, alimine no kubuula ubutanda atendeka no kwenda!

Mu nshita ya kusekelela pa co Yesu acitile, abaYuda baile kuli uyu mwaume no kumweba ukuti: “Lelo bushiku bwe Sabata, kabili tacasuminishiwa ukusenda ubutanda.” Lelo abaswike ati: “Uumposeshe e unjebele ati, ‘Senda ubutanda bobe, no kwenda.’” (Yohane 5:10, 11) Balya abaYuda tabatemenwe filya Yesu aundepe umuntu pe Sabata.

Nabo bamwipwishe, abati: “Nani akwebele ati, ‘Senda ubutanda bobe, no kwenda’?” Cinshi bamwipushishe ifi? Ni co Yesu ninshi “nafumako, apo mwali abantu abengi,” kabili umwaume baundepe na o taishibe ishina lya wamundepe ukuti ni Yesu. (Yohane 5:12, 13) Lelo ilyo papitile inshita, uyu mwaume alimonene na Yesu na kabili mwi tempele, ne ci calengele eshibe ukuti kanshi uwamundepe pa cishiba ni Yesu.

Umwaume uo Yesu aundepe alimonene na baYuda abamwipwishe pa wamundepe kabili alibebele ukuti ni Yesu. Ilyo abaYuda baumfwile ifi, baile kuli Yesu. Bushe ico bailiile kuli Yesu kufwaya ukwishiba icalengele alecita ifipesha amano fya musango uyu? Iyo. Balefwaya ukupeela Yesu umulandu pa fintu ifisuma ifyo acitile pe Sabata. E ico batendeke ukumucusha!