ICIPUSHO 3
Finshi Ningacita pa Kuti Ndelanshanya na Bafyashi Bandi?
BUSHE KUTI WACITA SHANI?
Tontonkanya pali ici: Ni pali Citatu icungulo. Geoffrey uuli ne myaka 17, apwisha ukubomba imilimo, kabili alefwaya ukutuusha! Ayasha TV kabili aikala pa cipuna ico atemwa sana ukwikalapo.
Cilya fye aikala, amona bawishi baingila ninshi nabafulwa, e lyo bamweba abati:
“Geoffrey! Cinshi ulepoosela inshita ukutamba TV mu nshita ya kuti wafweko umwaice obe ukusanga ifyo babapeele ku sukulu? Taufwaya ukumfwa ifyo nkweba!”
Geoffrey ailishanya ninshi na bawishi baleumfwa ati, “Batata nabo!”
Bawishi bakontamako panono e lyo bamweba abati, “Auti shani?”
Geoffrey aisha icefu kabili alolesha mu mbali, e lyo atila, “Tapali ifyo nandile.”
Bawishi bafulwa sana kabili bamweba bukali bukali abati, “Nine uleeba ifyo?”
Nga cali niwe, finshi wingacita pa kuti taupusene na bafyashi bobe?
TALA TONTONKANYA!
Ukulanshanya na bafyashi bobe kuti twakupashanya ku kwensha motoka. Nga ca kuti wasanga nabesala umusebo, kuti wafwaya inshila imbi uko wingapita.
KU CA KUMWENAKO:
Leah atile: “Cilangafya ukulanda na batata. Limo kuti ulebeba fimo e lyo baisalanda abati, ‘Auti shani? Nshumfwile ifyo ulelanda’”
LEAH KUTI ACITAPO CIMO PALI IFI FITATU.
Ukootokela bawishi.
Leah asasuka ati: “Umfweni, ifyo ndelanda naficindama!”
Ukuleka ukulanda na bawishi.
Leah aleka ukweba bawishi pa bwafya akwete.
Ukulolela inshita isuma iya kulanda na bawishi.
Leah alanda na bawishi inshita imbi, nelyo abalembela fye kalata pa bwafya akwete.
Ni cili kwi pali ifi fitatu ico ulemona ukuti e cingawama ukuti Leah acite?
TONTONKANYA PALI ICI: Bawishi ba kwa Leah baletontonkanya pali fimbi, ne ci calenga ukuti beishiba ukuti nakalipa. Kanshi Leah nga acita Ica Kubalilapo, bawishi te kuti beshibe umulandu aotokela. Ukootoka nalimo te kuti kulenge bawishi ukufwaya ukumfwa ifyo alelanda, kabili kuti kwalanga fye ukuti tabacindika. (Abena Efese 6:2) Kanshi iyi nshila te kuti ipwishe ubwafya.
Nga filya fine wingafwaya inshila imbi ukwakupita nga ca kuti nabesala umusebo, e fyo wingafwaya ne nshila imbi iya kulaumfwaninamo na bafyashi bobe
Nangu ca kutila Icalenga Bubili e cinganguka ukucita, te cisuma iyo. Mulandu nshi? Pantu pa kuti Leah apwishe ubwafya akwete, afwile ukulanda na bawishi, kabili pa kuti bamwafwe balingile ukwishiba ubwafya akwete. Ukwikala fye tondolo takupwisha ubwafya.
Nomba Leah nga acita Icalenga Butatu, ninshi afumyapo ubwafya ubwaciba no kubapo. E ico asalapo ukulanda nabo inshita imbi, kabili nga asalapo ukulembela bawishi kalata, nalimo kuti aumfwako bwino.
Ukulemba kalata na kabili kuti kwayafwa Leah ukulondolola filya fine fye aciba no kweba bawishi. Bawishi nga babelenga kalata, kuti baishiba ifyo Leah acilafwaya ukubeba kabili kuti baishiba bwino no bwafya akwete. Kanshi ukucita Icalenga Butatu kuti kwayafwa Leah na bawishi. Kanshi ukulanda na bawishi nelyo ukubalembela kalata, kuti kwaumfwana sana na filya Baibolo ilanda ukuti, “natulecita ifingaleta umutende.”—Abena Roma 14:19.
Finshi fimbi Leah engacita?
Lemba ifyo engacita ne fingafumamo.
WILALEKA BAUMFWILA MUMBI IFYO ULELANDA
Uleibukisha ukutila abafyashi bobe ilingi line kuti baumfwila mumbi ifyo walanda.
KU CA KUMWENAKO:
Tutile abafyashi bobe bakwipusha umulandu ushisansamukile, e lyo wabasuka ati, “Tapali.”
Kuti bamona kwati ulebeba ati: “Nshamucetekela kabili te kuti imwebe ifilencusha. Nalaebako abanandi pali ubu bwafya, te imwe iyo.”
Elenganya ukuti naukwata ubwafya ubukalamba kabili abafyashi bobe batila balefwaya ukukwafwa. Nomba nga watila: “Mwisakamana. Ninjishiba ifya kucita.”
Abafyashi kuti bakumona shani?
Kuti wabasuka bwino shani?