Balipondokele Yehova

Ilyo abena Israele baali mu matololo, Kora, Datani, Abiramu, pamo na bantu 250 balyalukile Mose. Bamwebele abati: ‘Tatulekufwaya. Cinshi ulingile ukubela intungulushi yesu e lyo Aarone na o aba shimapepo mukalamba? Bonse tuli bantu ba kwa Yehova, te imwe fye mweka.’ Yehova tatemenwe ifi bacitile. Alemona ukuti e o bapondokele!

Mose aebele Kora na abo ali nabo ati: ‘Mailo mukese kwi tenti lya mushilo, mukalete ififutumwino mukabikemo no bubani. Yehova akatulanga umuntu uo asala.’

Ubushiku bwakonkelepo Kora na baume 250 baliile kwi tenti lya mushilo ukwali Mose. Ilyo bali pe tenti lya mushilo balyocele ububani kwati nabo bali ni bashimapepo. Lyena Yehova aebele Mose na Aarone ati: ‘Fumeni ukuli Kora na bantu bakwe.’

Nangu ca kuti Kora na Mose baalile kwi tenti lya mushilo, Datani, Abiramu ne ndupwa shabo bena balikeene ukuyako. Yehova aebele abena Israele ukutaluka ku matenti ya kwa Kora, Datani na Abiramu. Bwangu bwangu abena Israele balicitile ifyo Yehova abebele. Datani, Abiramu ne ndupwa shabo baiminine kunse ya matenti yabo. Ilyo line fye umushili walilepwike no kubamina! Kabili umulilo walifumine ku muulu no koca Kora na baume 250 abo ali nabo pe tenti lya mushilo.

Lyena Yehova aebele Mose ati: ‘Poka inkonto ku ntungulushi sha mikowa yonse, kabili pa nkonto imo imo ulembepo ishina lya ntungulushi ukufumine iyo nkonto. Lelo pa nkonto ya mukowa wa kwa Lebi pena ulembepo ishina lya kwa Aarone. Ubike ishi nkonto mwi tenti lya mushilo, kabili inkonto ya muntu iikabalula amaluba ninshi e o nasala.’

Ubushiku bwakonkelepo, Mose alifumishe inkonto no kulanga intungulushi. Inkonto ya kwa Aarone yalibalwile amaluba kabili kwali ama-almonde ayapya. Ifi Yehova acitile alangile ukuti asalile Aarone ukuba shimapepo mukalamba.