Rahabu Afisa Abaume Abaile mu Kumona Icalo

Ilyo abaume abena Israele baile mu musumba wa Yeriko mu kumona ifyo wali, baikele mu ng’anda ya kwa Rahabu. Ilyo imfumu ya Yeriko yaishibe, yatumine abashilika ku ng’anda ya kwa Rahabu. Rahabu afishile aba baume babili pa mutenge. Aebele abashilika ukuti abaume nabaya no kuti babakonke. Lyena aebele abaume babili abo afishile ati: ‘Nalamwafwa pantu ninjishiba ukuti Yehova alemwafwa kabili mukapoka cino calo. Layeni ukuti tamwakepaye ulupwa lwandi.’

Aba baume baebele Rahabu ati: ‘Twakulaya ukuti takwakabe nangu umo mu lupwa lobe uukafwa.’ Bamwebele no kuti: ‘Nga wakaka intambo iyakashika pe windo, ulupwa lobe talwakafwe.’

Rahabu alikiishe aba baume pe windo ukubomfya intambo. Baile ku mpili no kufisama pa nshiku shitatu, e lyo baya kuli Yoshua. Lyena abena Israele ba-abwike Umumana wa Yordani kabili bali-ipekenye ukupoka icalo. Umusumba wa Yeriko e o babalilepo ukucimfya. Yehova abebele ukushinguluka umusumba umuku umo cila bushiku pa nshiku 6. Lyena pa bushiku bwalenga 7 bashingulwike umusumba imiku 7. Pa numa, bashimapepo balishishe intandala shabo kabili abashilika nabo balipundile sana. Ifibumba fya musumba fyalibongolweke! Lelo ing’anda ya kwa Rahabu yena tayabongolweke. Rahabu no lupwa lwakwe balipuswike pantu Rahabu alicetekele Yehova.