Yehova Alanda na Samwele

Shimapepo Mukalamba Eli alikwete abana abaume babili abali bashimapepo pe tenti lya mushilo. Amashina yabo ni Hofini na Finehasi. Tabalekonka amafunde ya kwa Yehova, kabili balecusha sana abantu. Abena Israele nga batwala inama sha kutuula kuli Yehova, Hofini na Finehasi balebulapo inama ishisuma. Eli balimwebele ifyo abana bakwe balecita, nomba tapali nangu cimo ico acitilepo. Bushe Yehova ali no kubaleka fye balecita ifyabipa?

Nangu ca kuti Samwele ali mwaice pali Hofini na Finehasi, ena talecitako ifyo balecita. Yehova alitemenwe sana Samwele. Bushiku bumo mu nshita ya bushiku ninshi Samwele nalaala, aumfwile ishiwi lilemwita. Alimine, abutukila kuli Eli no kumweba ati: ‘Ndi pano mukwai!’ Lelo Eli amwebele ati: ‘Awe nshikwitilepo. Bwelelamo kalaale.’ Samwele alibwelelemo mu kulaala. Na kabili aumfwile ishiwi lilemwita. Ilyo Samwele aumfwile ishiwi pa muku walenga butatu, Eli alilwike ukuti uuleita Samwele ni Yehova. E ico aebele Samwele ati, nga waumfwa ishiwi lyakwita na kabili, ulande fye ati: ‘Landeni mwe Yehova. Umubomfi wenu alekutika.’

Awe Samwele alibwelelemo mu kulaala. E lyo aumfwa ishiwi lyamwita ati: ‘Samwele! Samwele!’ E lyo ayasuka ati: ‘Landeni, umubomfi wenu alekutika.’ Yehova amwebele ati: ‘Umwebe Eli ati nkamukanda pamo no lupwa lwakwe. Alishiba ukuti abana bakwe balacita ifyabipa pe tenti lya mushilo, nomba tapali nangu cimo ico acitapo.’ Ulucelo Samwele aliswile ifiibi fye tenti lya mushilo nga filya fine alecita lyonse. Ali no mwenso wa kweba shimapepo mukalamba ifyo Yehova amwebele. Lelo Eli alimwitile no kumwipusha ati: ‘Mwana wandi, finshi Yehova akwebele? Njeba.’ E ico Samwele alyebele Eli fyonse fye ifyo Yehova amwebele.

Yehova alitwalilile ukuba na Samwele ilyo alekula. Abantu bonse mu calo ca Israele balishibe ukuti Yehova alisalile Samwele ukuba shimapepo kabili kapingula.