Yehova Alitekanishishe Yona

Mu musumba wa Ninebe uwali mu calo ca Asiria, mwaleikala abantu abalecita ifyabipa. E ico Yehova aebele kasesema wakwe Yona ukuya ku Ninebe mu kusoka abantu ukuti baleke ukucita ifyabipa. Lelo Yona alibutukiile ku cifulo cimbi. Ailenina ubwato ubwaleya ku Tarshishi, e fyo abutwike.

Ilyo ubwato bwali pali bemba, kwaishile umwela uukalamba kabili abale-ensha ubwato balyumfwile umwenso. Balipepele kuli balesa wabo no kubepusha ati: ‘Cinshi kwabela umwela uukalamba?’ Yona asukile abeba ati: ‘Nine nengele. Ndebutuka Yehova pantu nshilefwaya ukucita ifyo anjebele. Mpooseni muli bemba, no mwela walaleka.’ Abale-ensha ubwato tabalefwaya ukupoosa Yona muli bemba, lelo alibapatikishe ukuti bamupoosemo. Ilyo bamupoosele muli bemba, umwela uukalamba walilekele.

Yona alemona kwati alafwa. Ilyo aleilako fye panshi ya bemba, alipepele kuli Yehova. Lyena Yehova atumine icisabi icikalamba, icamuminine, lelo tacamwipeye. Ilyo Yona ali mu nda ya cisabi, apepele kuli Lesa ati: ‘Namulaya ukuti nakulacita fyonse ifyo mwakulanjeba.’ Yehova alicingilile Yona mu nda ya cisabi pa nshiku shitatu, kabili alengele icisabi cayamulukila kunse ya bemba.

Bushe ifi Yehova apuswishe Yona, calolele mu kuti Yona tali na kuya ku Ninebe? Awe. Yehova na kabili aebele Yona ukuti aye kuli uyu musumba. Uno muku wena Yona takeene. Aliile ku Ninebe no kuyaeba abantu abalecita ifyabipa ati: ‘Mu nshiku 40, Ninebe ili no konaulwa.’ Lelo kwalicitike icintu ico ashale-enekela, abaleikala mu musumba wa Ninebe balyumfwile ilyo Yona abasokele kabili balilekele ukucita ifyabipa. Imfumu ya mu Ninebe yaebele abantu ati: ‘Lilileni kuli Lesa kabili lapileni. Nalimo tatonaule.’ Ilyo Yehova amwene ukuti abantu nabalapila, taonawile umusumba wa Ninebe.

Yona alifulilwe pantu Lesa taonawile umusumba. Taleni tontonkanyeni: Yehova alitekanishishe Yona kabili alimubelele uluse, lelo Yona ena taumfwilile uluse abantu abaleikala mu Ninebe. Lelo aikele kunse ya musumba mu cintelelwe ca lungu ninshi nafulwa. Nomba ilyo lwaumine, Yona alikalipe sana. E ico Yehova amwebele ati: ‘Waumfwila ici cimenwa uluse lelo abekala mu Ninebe taubomfwilile uluse. Nimbabelela uluse, kabili nshibonawile.’ Cinshi Yehova alefwaya ukusambilisha Yona? Alefwaya amusambilishe ukuti abaleikala mu Ninebe balicindeme sana ukucila ifimenwa.