Abasambi Bapokelela Umupashi wa Mushilo

Ilyo papitile inshiku 10 ukutula apo Yesu abwelelemo ku muulu, abasambi bakwe balipokelele umupashi wa mushilo. Cacitike pa Pentekoste mu mwaka wa 33, ninshi abantu ukufuma mu ncende ishalekanalekana baile ku Yerusalemu mu kusefya umutebeto. Kwali abasambi ba kwa Yesu nalimo 120 abalongene mu muputule wa pa muulu uwa ng’anda. Kwali icacitike mu kupumikisha fye. Ifyapala umulilo fyaishile pa mitwe ya basambi bonse, kabili bonse batendeke ukulanda indimi ishalekanalekana. Mu ng’anda mwaleumfwika icongo kwati cimwela icikalamba.

Abaile ku Yerusalemu ukufuma mu fyalo fimbi baumfwile icongo mu ng’anda kabili balibutukileko pa kuti bamone ifyalecitika. Balipapile ilyo baumfwile abasambi balelandila mu ndimi shimbi. Batile: ‘Aba bantu bena Galili. Baishiba shani ukulanda indimi shesu?’

Lyena Petro na batumwa bambi baiminine pa ntanshi ya bantu. Petro aebele abantu pa fyo cali pa kuti Yesu bamwipaye, no kuti Yehova alimubuushishe. Petro atile: ‘Pali ino nshita Yesu ali ku muulu ku kuboko kwa ku kulyo ukwa kwa Lesa kabili natupeela umupashi wa mushilo uo atulaile ukutupeela. E co mwamwena no kumfwa ifi fipesha mano.’

Abantu balitemenwe ifyo Petro alandile, e ico baipwishe abati: “Cinshi tufwile ukucita?” Na o abebele ati: ‘Lapileni ku membu shenu kabili mubatishiwe mwi shina lya kwa Yesu. Na imwe mwalapokelela umupashi wa mushilo.’ Pali bulya bushiku, abantu nalimo 3,000 balibatishiwe. Ukutula lilya line abasambi balefulilako fye mu Yerusalemu. Umupashi wa mushilo walebafwa ica kuti abatumwa balipangile ifilonganino ifingi pa kuti balesambilisha abasambi fyonse ifyo Yesu abebele.