Cinshi Umwaka Wa 1919 Wacindamina?

Amasesemo ya mu Baibo e lyo ne fyacitike kale filanga ukuti Yesu atendeke ukuteka ku muulu mu 1914, kabili ifi filangilila ukuti e lyo inshiku sha kulekelesha isha cino calo ca kwa Satana shatendeke. Finshi Yesu acitile ilyo bamubikile fye pa Bufumu? Bushe ilyo line fye alilubwile ababomfi bakwe pano isonde muli Babiloni Mukalamba umo bali bankole? Bushe alisontele “umusha wa cishinka kabili uwashilimuka” mu 1914 no kutendeka umulimo uukalamba uwa kulobolola?—Mat. 24:45.

Ukwabula no kutwishika ifi te fyo acitile. Ibukisheni ukuti Lesa alengele umutumwa Petro ukwiluka ukuti ubupingushi bwali no kutendekela “mu ng’anda ya kwa Lesa.” (1 Pet. 4:17) Kasesema Malaki na o alisobele pa nshita ilyo Yehova ali no kwisa pamo ne “nkombe ya cipangano,” e kutila Umwana wakwe ku ng’anda yakwe iya mapepo. (Mal. 3:1-5) Ilya yali no kuba ni nshita ya kulopololwa no kweshiwa. Bushe ifyacitike kale fyalilingana ne fyo aya amasesemo yalanda?

Ee fyalilingana! Ukutendekela mu mwaka wa 1914 ukufika ku kutampa kwa mwaka wa 1919, yali ni nshita iya-afya, iya kwesha kabili iya kulopolola Abasambi ba Baibo, nga fintu baleita Inte sha kwa Yehova pali ilya nshita. Mu 1914 abantu ba kwa Lesa abengi pano isonde balyumfwile sana ububi pantu impela ya cino calo tayaishile nga fintu bale-enekela. Mu 1916 balicililemo ukumfwa ububi ilyo ba Charles T. Russell abaletungulula abantu ba kwa Lesa bafwile. Bamo abatemenwe sana Munyinefwe Russell, balikeene ukulaumfwila ba Joseph F. Rutherford abapyene pali ba Russell. Mu 1917 mu cilonganino mwaishileba amalekano kabili kwashele fye panono icilonganino nga calyakanikene. Lyena mu 1918 bashimapepo balilengele Munyinefwe Rutherford na bamunyinefwe bambi 7 babalubulwishe mu cilye, babapeele imilandu ya bufi no kubakaka. Amaofesi yakalamba mu Brooklyn baliyesele. Ukwabula no kutwishika, abantu ba kwa Lesa bali tabalafuma muli Babiloni Mukalamba!

Na lyo line finshi fyacitike mu 1919? Ifintu fyalyalwike bwangu sana! Mu kutampa kwa uyu mwaka, ba Rutherford na bamunyinefwe bambi balibafumishe mu cifungo. Kabili ilyo line fye balitendeke ukubomba! Mu nshita fye iinono balipekenye ukulongana kwa citungu ukwali ukwacindama sana apo bali no kufumya ulupapulo ulo baleita ukuti, The Golden Age (pali ino nshita twita ulu ulupapulo ukuti Loleni!). Ulu ulupapulo ulupya balupangile pa kuti balelubomfya ilyo balebila imbila nsuma ku cintubwingi. Na kabili, mu cilonganino cimo na cimo balisontele kangalila uwaleangalila umulimo wa kubila imbila nsuma. Muli ulya wine mwaka, balifumishe ulupapulo baleita ukuti Bulletin (pali ino nshita twita ulu ulupapulo ukuti Akatabo ka Kubomfya pa Kulongana kwa Imikalile ya Bwina Kristu no Mulimo Tubomba) pa kuti balelubomfya pa kupekanya ifya kubila imbila nsuma.

Finshi fyacitike? Ukwabula no kutwishika Kristu alifumishe abantu bakwe muli Babiloni Mukalamba umo bali bankole. Alisontele umusha wakwe uwa cishinka kabili uwashilimuka. Umulimo wa kulobolola wali mu kutendeka. Ukutula muli ulya mwaka uwali uwacindama uwa 1919, umulimo wa kulobolola wilako fye pa ntanshi.