AKABOKOSHI KA KUTWAFWA UKUSAMBILILA 16B
Ukuteta no Kulilishika, Ukushila Akashilwa, Ukutobaula—Ni Lilali Fikacitika Kabili Fikacitika Shani?
Icimonwa icaba mwi buuku lya kwa Esekiele icipandwa 9, cilafikilishiwa na muno nshiku. Nga twaishiba bwino ifyo ifyaba mu cimonwa fikalacitika, ninshi tatwakatiine ilyo impela ya cino calo ikesa
“Ukuteta no kulilishika”
NI LILALI KUKACITIKA: Mu nshiku sha kulekelesha ilyo ubucushi bukalamba bushilatendeka
KUKACITIKA SHANI: Ababa ne mitima iisuma balalanga mu fyo balanda na mu fyo bacita ukuti balipata sana ifyabipa ificitika muli cino calo. Abantu ba musango uyu, balakutika imbila nsuma, balatwalilila ukwaluka pa kuti babe ne mibele nga iyo Kristu akwete, balabatishiwa pa kuti balange ukuti bali-ipeela kuli Yehova kabili balatungilila bamunyina ba kwa Kristu no kuba ne cishinka ilyo balebatungilila
“Ukushila akashilwa”
NI LILALI KUKACITIKA: Mu bucushi bukalamba
KUKACITIKA SHANI: Umwaume uwakwata ako kalemba abikamo inki, emininako Yesu Kristu ilyo akesa mu kupingula inko shonse. Aba mwi bumba likalamba bakabapingula bwino nelyo bakabashila akashilwa aka kulangilila ukuti ni mpaanga, pa kulanga ukuti bakapusuka Armagedone
“Ukutobaula”
NI LILALI KUKACITIKA: Ilyo kukaba inkondo ya Armagedone
KUKACITIKA SHANI: Yesu Kristu na bashilika bakwe aba ku muulu, umwaba bamalaika na ba 144,000 abo akateka nabo, bakonaula cino calo cabipa no kupususha ababa mu kupepa kwasanguluka kabili bakabengisha mu calo cipya umukaba ubulungami