AKABOKOSHI KA KUTWAFWA UKUSAMBILILA 19B
Amenshi Ayalekonkoloka Fye Yaba Umumana Uukalamba!
Esekiele aleya alekonka akamana akalekonkoloka ukufuma mu ncende ya mushilo iya kwa Yehova, kabili ilyo aendele fye amakilomita nalimo yabili, mu cisungusho aka akamana kaile kaleshika mpaka kaba no mumana uukalamba! Mu mbali shonse shibili isha uyu mumana, amonamo ifimuti ifisuma ifitwala ifisabo fya kulya ifisuma kabili ifyakwata amabuula ya kundapilako. Bushe ifi fyonse fyalola mwi?
Umumana Ulalenga Abantu Bapaalwa
KALE: Ilyo bankole babwelelemo ku calo cabo, Yehova alebapaala ilyo balebombako umulimo wa kubwesha ukupepa kwasanguluka pe tempele
MUNO NSHIKU: Mu 1919 Yehova alibweseshe ukupepa kwasanguluka. Ici calengele alepaala ababomfi bakwe aba cishinka ukucila na pa fyo alebapaala na kale
KU NTANSHI: Pa numa ya Armagedone, Yehova akatupaala mu nshila ishingi. Ku ca kumwenako, akalenga tukapwililike kabili akatusambilisha icine icipya
Amenshi Ayalenga Ifintu Fyaba no Mweo
KALE: Yehova alepaala sana abantu bakwe aba cishinka, na lintu baleya balefulilako, ica kuti takwali nangu cimo icalelenga balefilwa ukumupepa ukulingana ne fyo afwaya
MUNO NSHIKU: Muli paradaise ya ku mupashi iiya ilekulilako fye, abantu abengi nga nshi abesamo balanonkelamo mu mapaalo ya kwa Yehova ayaya yalefulilako fye, kabili balailunda ku bamupepa ukulingana ne fyo afwaya
KU NTANSHI: Abantu abengi nga nshi abakabuushiwa bakailunda ku bakapusuka Armagedone, kabili amapaalo ya kwa Yehova yakaba ayengi ica kuti yakakumana abantu bonse
Ifimuti Ifitwala Ifisabo fya Kulya Kabili Ifyakwata Amabuula ya Kundapilako
KALE: Yehova alisambilishe abantu bakwe icine, kabili alilengele balamupepa ukulingana ne fyo afwaya ilyo babwelelemo ku calo cabo; kabili alibafwile pa kuti baleke ukupepa ifilubi nelyo ukucita ifyakumine ukupepa kwa bufi
MUNO NSHIKU: Ifya kulya fya ku mupashi ifingi ifyo Yehova atupeela filenga abantu baba ne cishinka kuli ena, baleka ukucita imembu ishikalamba kabili bataluka ku mibele yabipa iyaseeka muli cino calo
KU NTANSHI: Kristu na ba 144,000 abo akateka nabo bakaafwa abantu bonse abakaba ne cumfwila pa kuti bakabe abapwililika kabili bakabe no bumi ubusuma na maka ayengi nga nshi umuyayaya!