Ifyo Mufwile Ukulacita pa Kulongana Kwa Imikalile ya Bwina Kristu no Mulimo Tubomba

Ifilimo

1. Ifyebo fili muli ino formu fyakwafwa bonse abakwete imbali mu kulongana kwa Mikalile no Mulimo Tubomba. Abakwete ulubali bafwile ukukonka ifya kucita ifili muli ino formu ifilelanda pa lubali babapeele ululi mu Akatabo ka Imikalile no Mulimo Tubomba, ilyo balepekanya ulo lubali. Koselesheni bakasabankanya bonse ukulaipeelesha ukulandako amalyashi ya basambi. Na bambi abatendeka ukulongana kuti balelandako amalyashi ya basambi nga ca kuti balisumina ifyo Baibo isambilisha kabili balafikonka. Kangalila wa Mikalile no Mulimo Tubomba afwile ukulanshanya no muntu uulefwaya ukulalandako amalyashi ya basambi, nga ca kuti uyo muntu te kasabankanya. Pa numa ya kulanshanya nankwe, kangalila wa Mikalile no Mulimo Tubomba afwile ukweba uyo muntu nga ca kuti nafikapo nelyo iyo. Ilyo balelanshanya, pafwile ukuba uumutungulula isambililo lya Baibo (nelyo umufyashi wakwe uuli ni Nte ya kwa Yehova). Ifyebo kangalila wa Mikalile no Mulimo Tubomba afwile ukubomfya pa kulanshanya, ni filya fine bapitulushamo umuntu uulefwaya ukuba kasabankanya uushabatishiwa.—od icipa. 8 para. 8

AMASHIWI YA KUTENDEKELAPO

2. Mineti imo. Cila mulungu nga mwaimba ulwimbo lwa kwiswila ne pepo, ceyamani wa Ukulongana kwa Imikalile no Mulimo Tubomba akalalanda ifyebo ifikalalenga abantu bafwaisha ukukutika ku fyo balasambilila. Ceyamani afwile ukulanda sana pa fyo icilonganino calanonkelamo.

ICUMA ICABA MU CEBO CA KWA LESA

3. Ilyashi: Amamineti 10. Umutwe na autulaini ya fishinka fibili nelyo fitatu fyakulaba mu Akatabo ka Imikalile no Mulimo Tubomba. Abafwile ukulanda ili lyashi ni baeluda nelyo abatumikila abaishiba ukusambilisha. Nga muletendeka ukubelenga ibuuku lya mu Baibo mu kubelenga Baibo ukwa cila mulungu, mufwile ukutampilapo ukutambisha vidio umo balondolola ifyaba muli ilyo ibuuku. Kalanda kuti alanda pa fyo ifyebo fili muli vidio fikatene no mutwe wa lyashi. Na lyo line, afwile ukushininkisha ukuti ifishinka fyonse ifili mu katabo ka kubomfya pa kulongana muli ili lyashi nafilandwapo. Na kabili, afwile ukubomfya ifikope pa kulanda pa fishinka ifikalamba. Kuti alundapo ne fyebo afwaile mu mpapulo shimbi, cikulu fye nafikatana ne fili muli autulaini.

4. Ukufwayafwaya Icuma Icaba mu Cebo ca kwa Lesa: Amamineti 10. Ili lyashi lya fipusho ne fyasuko, kabili talifwile ukukwata intendekelo nelyo insondwelelo. Uufwile ukulanda ili lyashi ni eluda nelyo umutumikila uwaishiba ukusambilisha. Afwile ukwipusha ibumba amepusho yonse yabili. Na kabili, uukwete ili lyashi kuti amona nga kuti babelenga ilembo lilipo nelyo iyo. Bonse abo basonta ukwasukapo bafwile fye ukwasukapo mu masekondi 30 nelyo ukucepako.

5. Ukubelenga Baibo: Amamineti 4. Uo mufwile ukupeela ili lyashi lya kubelenga Baibo musambi umwaume. Umusambi afwile ukubelenga ifyebo apeelwe ukwabula ukulandapo amashiwi pa kutendeka na pa kulekelesha. Ceyamani wa kulongana akula-afwa abasambi ukulabelenga ukulingana ne filembelwe, ukubelenga ifyaumfwika, ukulongoloka pa kubelenga, ukushimpa amashiwi ayapulilemo, ukwalula ishiwi, ukupemwina apalingile no kulabelenga mu cifyalilwa. Apo amalembo yamo yalalepa e lyo yambi yalaba ayepi, kangalila wa Kulongana kwa Mikalile alingile ukulapeela abasambi amalyashi ukulingana na maka yabo aya kubelenga.

IFYO TWINGACITA PA KUTI TULEBILA BWINO IMBILA NSUMA

6. Amamineti 15. Ulu lubali lulalenga bonse bakwata ishuko lya kwesha ifyo bengalacita ilyo balebila imbila nsuma. Na kabili lulalenga baishibilako ifya kulanshanya na bantu e lyo ne fya kubasambilisha icine icaba mu Baibo. Baeluda nabo limo limo kuti babapeelako amalyashi ya basambi. Umusambi umo na umo afwile ukubombela pe sambililo ilifumine muli broshuwa ya Ukusambilisha nelyo Muletemwa Abantu, iliba ku mpela ye lyashi mu fyakwisalilako mu Akatabo ka Imikalile no Mulimo Tubomba. Inshita shimo pakalaba ilyashi lya kulanshanya ne bumba. Ifi nga e fyo batantika, ninshi eluda nelyo umubomfi utumikila uusambilisha bwino e ufwile ukulanda ilyo lyashi.—Moneni paragrafu 15 nga mulefwaya ukwishiba ifya kucita nga bamupeela ilyashi umuli ukulanshanya ne bumba.

7. Ifyo Mwingatendeka Ukulanshanya: Ulu ulubali kuti bapeela umusambi umwaume nelyo umusambi umwanakashi. Umusambi na kaafwa bafwile ukuba abanakashi beka beka, abaume beka beka nelyo aba mu lupwa lumo lwine. Abasambi nga balefwaya kuti baikala nelyo kuti baiminina.—Nga mulefwaya ukwishibilapo na fimbi pa kwakusanga ifyebo e lyo ne fyakucita pali ulu lubali, moneni paragrafu 12 na 13.

8. Nga Mwabwelelako: Ulu ulubali kuti bapeela umusambi umwaume nelyo umwanakashi. Umusambi na kaafwa bafwile ukuba abanakashi beka beka nelyo abaume beka beka. (km 5/97 ibu. 2) Nga balefwaya kuti baikala nelyo kuti baiminina. Umusambi afwile ukulangilila ifya kulanda nga abwelela ku muntu balanshenye nankwe umuku wafumako.—Nga mulefwaya ukwishibilapo na fimbi pa kwakusanga ifyebo e lyo ne fya kucita pali ulu lubali, moneni paragrafu 12 na 13.

9. Ukulenga Abantu Baba Abasambi: Ulu ulubali kuti bapeela umusambi umwaume nelyo umusambi umwanakashi. Umusambi na kaafwa bafwile ukuba abanakashi beka beka nelyo abaume beka beka. (km 5/97 ibu. 2) Nga balefwaya kuti baikala nelyo kuti baiminina. Umusambi afwile ukulanda ili lyashi kwati natendeka kale isambililo. Talingile ukulanda amashiwi ya kutendekelapo nelyo aya kusondwelela, kano fye nga alebombela pe sambililo ililanda ukuti e fyo afwile ukucita. Ilyo aletungulula, te lyonse engabelenga ifyebo balebomfya, nangu ca kuti ukucita ifi kwaliba fye bwino.

10. Ukulondolola Ifyo Mwasuminamo: Nga ca kuti pali ulu lubali pali ilyashi, ninshi umusambi umwaume e ufwile ukulanda. Lelo nga ca kuti pali icilangililo, ninshi kuti mwapeela umusambi umwaume nelyo umusambi umwanakashi. Umusambi na kaafwa bafwile ukuba abanakashi beka beka nelyo abaume beka beka. Lelo nga baba umwaume no mwanakashi, ninshi bafwile ukuba aba mu lupwa lumo lwine. Umusambi afwile ukwasuka bwino icipusho ico babikilepo ngo mutwe wa lyashi, kabili afwile ukufumya ifyebo mu lupapulo babikilepo. Umusambi nga alefwaya kuti alumbula nelyo ukulanga umuntu ulupapulo umufumine ifyebo.

11. Ilyashi: Umusambi umwaume e ufwile ukupeelwa ili lyashi kabili afwile ukulanda nge lyashi ku cilonganino. Ilyashi nga lifumine pa cishinka cimo mu ifyebo fyalundwako A muli broshuwa itila Muletemwa Abantu, ninshi umusambi afwile ukulanda pa fyo twingabomfya amalembo yalipo ilyo tulebila imbila nsuma. Ku ca kumwenako, umusambi kuti alanda pa nshita twingabomfya ilyo ilembo, umo ilyo ilembo lyalola e lyo ne fyo twingalanshanya no muntu ilyo ilembo. Nomba ilyashi nga lifumine pa cishinka icili mwi sambililo limo muli broshuwa itila Muletemwa Abantu, ninshi umusambi afwile ukubika amano ku kulanda ifyo twingabomfya ico cishinka ilyo tulebila imbila nsuma. Kuti alandako pa ca kumwenako icili mu cishinka 1 mwi sambililo, nelyo kuti alandako pa malembo na yambi ayo balundileko mwi sambililo nga yalekabilwa.

12. Ifyebo Ifilimo: Ifyebo fili muli ino paragrafu e lyo ne ikonkelepo filelanda pa lubali lutila “Ifyo Mwingatendeka Ukulanshanya,” no lutila “Nga Mwabwelelako.” Ico umusambi afwile ukubikako sana amano kulanshanya no muntu icine ca mu Baibo ica-anguka kabili ukulingana no muntu asanga, e lyo no kwishiba ifyo bakalanshanyapo nga abwelelako. Umusambi afwile ukusala ilyashi ililingene ne filecitika kabili ilyo abantu bengatemwa ukumfwa ku ncende mwikala. Umusambi kuti asalapo nampo nga kuti apeela umuntu ulupapulo nelyo ukumutambisha vidio iyaba pa Mpapulo Tubomfya Sana pa Kusambilisha Abantu. Ukucila ukusungila ifyebo fya kulanda, umusambi afwile ukwishiba ifya kucita pa kulanshanya bwino na bantu, pamo nga ukubabikako amano e lyo no kulanda kwati balelanshanya fye.

13. Ifyo Abakulakwata Amalyashi Bakulacita: Umusambi afwile ukucita ifyo balandile mwi lyashi bamupeele kabili ukulingana ne cifulo mubilamo imbila nsuma. Ku ca kumwenako:

(1) Ku ng’anda ne ng’anda: Ifyo umusambi afwile ukucita, kubila imbila nsuma ku ng’anda ne ng’anda, nampo namuya mu kutandalila umuntu, mulebomfya foni nelyo ukulemba amakalata, e lyo no kubwelelako ku muntu mwalanshenye nankwe ilyo mwalebila imbila nsuma ku ng’anda ne ng’anda.
(2) Ubunte bwa mu lyashi: Umusambi afwile ukulanshanya no muntu pa fyaba mu Baibo uo bacilashimika fye nankwe ilyashi. Kuti abomfya ilembo limo pa kulanshanya na bo abomba nabo, abo asambilila nabo, abena mupalamano, abo ali nabo mu motoka nelyo abo akumanya ilyo aleya mu kubomba imilimo ya cila bushiku.
(3) Ubunte bwa ku cintubwingi: Umusambi afwile ukubila imbila nsuma pali ka standi ka mpapulo, ukulanshanya na bantu mu fifulo fya makwebo, mu misebo, mu ma parka, apo bemika imyotoka nelyo konse ukusangwa abantu.

14. Ukubomfya Amavidio ne Mpapulo: Ukulingana ne fyo ifintu fili, umusambi kuti asalapo ukubomfya vidio nelyo ulupapulo. Nga ca kuti mu lyashi umusambi akwete muli na vidio, nelyo nga ca kuti alefwaya ukubomfyako vidio, afwile ukucita kwati aletambisha vidio kabili afwile ukulanshaya no muntu ifyaciba muli vidio, lelo tafwile ukumutambisha vidio.

IFYO FWE BENA KRISTU TULINGILE UKULAIKALA

15. Amamineti 15. Pa numa ya kwimba ulwimbo, muli ulu lubali muba ilyashi limo nelyo yabili ayalanda pa fyo abali mwi bumba bengakonka ifyaba mu Cebo ca kwa Lesa. Mufwile ukupeela aya malyashi kuli baeluda nelyo abatumikila abaishiba ukusambilisha. Nga ca kuti pali ulu lubali pali ukukabila kwa cilonganino, ninshi eluda e ufwile ukulanda ili lyashi. Nga ca kuti ilyashi lya kulanshanya, uuletungulula kuti aipushako ibumba amepusho na yambi mu cipande, ukulunda pa yo babikilemo. Afwile ukulanda fye amashiwi ayanono pa ntendekelo pa kuti asheko inshita ya kulanda pa fishinka fili mu lyashi lyakwe e lyo no kulanshanya ne bumba. Nga ca kuti mu lyashi lyakwe muli no kwipushako bamo, nga kuti bakumanisha kuti cawama baya pa cisebele epo katungulula alebepushisha, ukucila ukulabepusha ninshi nabekala mwi bumba.

16. Isambililo lya Baibo Ilya pa Cilonganino: Amamineti 30. Uufwile ukutungulula ni eluda uwaishiba ukusambilisha. (Mu filonganino umo baeluda bacepa, ababomfi batumikila abaishiba ukusambilisha kuti batungulula.) Baeluda bafwile ukumona abengafikapo ukutungulula Isambililo lya Baibo Ilya pa Cilonganino. Abo ibumba lya baeluda lyasala ukutungulula isambililo balingile ukutungulula bwino sana pa kuti tabapulile mu nshita, kabili balingile ukukomaila pa malembo umuli ifishinka no kwafwa abali mwi bumba ukwishiba ifyo bengabomfya ifyo balesambilila. Kuti baletungulula bwino nga ca kuti balekonka ifyebo ifilanda pa fya kutungulula imbali umwaba amepusho na masuko. (w23.04 ibu. 24, akabokoshi) Nga mwapwa ukulanda pa fishinka fyonse ifili mwi sambililo lya uyo mulungu, tamulingile ukukonkanyapo ukulanda ifyebo na fimbi pa kuti fye mulefye isambililo. Nga cingacitika, aba kutungulula na ba kubelenga tabafwile ukulaba fye bamo bene cila mulungu. Ceyamani wa Ukulongana kwa Mikalile no Mulimo Tubomba nga alanda ukuti isambililo lipifiwe, katungulula e ulingile ukwishiba ifya kulipifya. Nalimo kuti apingulapo ukukanabelenga amaparagrafu yamo.

AMASHIWI YA KUSONDWELELA

17. Amamineti yatatu. Ceyamani wa Kulongana kwa Mikalile No Mulimo Tubomba afwile ukupituluka mu fishinka ifyo basambilila ifingaafwa ibumba kabili afwile ukulanda na pa fyo bakalanshanya mu mulungu uukonkelepo. Nga kucili nshita, kuti aeba abali mwi bumba ukuti balandepo ifishinka basambilile pa kulongana ifyo batemenwe sana. Nalimo kuti alumbula na mashina ya basambi abali na malyashi mu mulungu uukonkelepo, nga ca kuti inshita eko icili. Nga namukwata ifya kubilisha kuti mwabilisha nelyo nga kuli amakalata ya kubelengela icilonganino, ceyamani kuti ayabelenga ilyo alelanda amashiwi ya kusondwelela. Tamulingile ukubilisha pa cisebele ifikumine ukukumana kwa kuya mu mulimo wa mwi bala nelyo ifya kuwamya Ing’anda ya Bufumu, lelo mulingile ukufibika pa cipampa ca fyebo. Nga ca kuti te kuti mubilishe no kubelenga amakalata mu nshita ya kulandamo amashiwi ya kusondwelela, ninshi ceyamani kuti alanshanishisha libela na bamunyinefwe abali na malyashi mu lubali lwa Ifyo fwe Bena Kristu Tulingile Ukulaikala pa kuti bamushilako inshita. (Moneni amaparagrafu 16 na 19.) Ukulongana kwa kulapwa no lwimbo ne pepo.

UKUTASHA NO KUFUNDA

18. Mu lyashi lya basambi limo na limo, ceyamani wa Kulongana kwa Imikalile No Mulimo Tubomba akalakwata mineti imo iya kutasha umusambi no kumufunda ukulingana ne cishinka cili mwi sambililo alebombelapo. Ceyamani akalaita fye umusambi ukwabula ukulanda isambililo alebombelapo. Na lyo line, umusambi nga apwisha ukulanda ilyashi, kuti alanda amashiwi ya kumutasha ayalinga, lyena afwile ukulanda icishinka cili mwi sambililo umusambi acilabombelapo e lyo ne co alandila ukuti umusambi acicita bwino nelyo ico alingile ukubombelapo pali ilyo isambililo. Ceyamani na kabili kuti alanda pa mbali shimbi isha lyashi umusambi acilanda nga amona ukutila kuti fya-afwa umusambi nelyo ibumba. Umusambi nalimo kuti bamufunda ukubomfya ifyebo fyaba muli broshuwa ya Muletemwa Abantu, iya Ukusambilisha nelyo mu citabo ca Nonkelenimo pa numa ya kulongana nelyo pa nshita imbi, kuti bamufunda pe sambililo ilyo mwamupeele nelyo pe sambililo limbi.—Nga mulefwaya ukwishibilapo na fimbi pa mulimo wa kwa ceyamani wa Imikalile no Mulimo Tubomba e lyo no mulimo wa kwa kafunda wa cibili, moneni paragrafu 19, 24 na 25.

INSHITA

19. Bonse abali na malyashi tabafwile ukupula mu nshita, nangu fye ni ceyamani wa Kulongana kwa Imikalile no Mulimo Tubomba talingile ukupula mu nshita. Nangu ca kuti pe lyashi limo na limo mu Katabo ka Mikalile no Mulimo Tubomba palaba inshita, nga mwapwisha ukulanda nelyo ukulanshanya ne bumba ifyebo fili mu lyashi bamupeele e lyo kwashala inshita, tamulingile ukulafwailisha ifyebo pa kuti fye inshita ipelwe kuli ilyo lyashi ikumane. Nga ca kuti kalanda apula mu nshita, ceyamani wa Kulongana kwa Mikalile no Mulimo Tubomba nangu kafunda wa cibili alingile ukufunda uyo kalanda pa mbali. (Moneni paragrafu 24 na 25.) Ukulongana konse, ukubikako fye ne nyimbo na mapepo, kufwile ukupwa mwi awala limo na mamineti 45.

KANGALILA WA MUPUTULE NGA ALEBOMBELA ICILONGANINO

20. Kangalila wa muputule nga alebombela icilonganino, ukulongana kufwile ukuba filya fine kwaba mu Akatabo ka Imikalile no Mulimo Tubomba. Mu kulongana kwa Ifyo fwe Bena Kristu Tulingile Ukulaikala, pa nshita ya Isambililo lya Baibo Ilya pa Cilonganino e pa kulaba ilyashi lya mulimo ilya kwa kangalila wa muputule ilya mamineti 30. Ilyo ceyamani wa Kulongana kwa Imikalile no Mulimo Tubomba talaita kangalila wa muputule ukulanda ilyashi lya mulimo, afwile apituluka mu fishinka fya pali uku kwine kulongana na pa fyo bakasambilila umulungu ukonkelepo, nga kuli ifyo mulingile ukubilisha kuti abilisha no kubelenga amakalata ayalingile ukubelengwa. Ilyashi lya mulimo nga lyapwa, kangalila wa muputule akasondwelela ukulongana no lwimbo ulo umwine asalile. Kuti aita munyinefwe umbi ukwisapepa ipepo lya kwisalila ukulongana. Tamufwile ukukwata imiputule imbi iya basambi ilyo kangalila wa muputule alebombela icilonganino. Mu cilonganino nga mwaliba ibumba ililongana ukubomfya ululimi lumbi, kuti bakwata ukulongana kwa mu kati ka mulungu muli ulo lulimi na mu mulungu wine kangalila alebombela icilonganino. Na lyo line, ibumba lifwile ukulongana pamo ne cilonganino ilyo kangalila wa muputule aletendeka ukulanda ilyashi lya mulimo.

NGA NAMUKWATA UKULONGANA KWA MUPUTULE NELYO UKWA CITUNGU

21. Nga mulelongana umuputule nelyo icitungu takufwile ukuba ukulongana kwa pa cilonganino. Mufwile ukwibukishako icilonganino ukuti, ifyebo mwali no kusambilila muli uyu mulungu bafwile ukufisambilila pa mapepo ya lupwa nangu pa masambililo ya pa lwabo.

UMULUNGU MULELONGANA ICIBUKISHO

22. Tamufwile ukukwata Ukulongana kwa Imikalile no Mulimo Tubomba nga ca kuti Icibukisho cikabako mu kati ka mulungu.

KANGALILA WA KULONGANA KWA IMIKALILE NO MULIMO TUBOMBA

23. Baeluda bafwile ukusala eluda uufwile ukuba kangalila wa Imikalile no Mulimo Tubomba. Umulimo akalabomba wa kushininkisha ukuti uku kulongana na kupekanishiwa no kutungululwa ukulingana ne fyo tulandile ukuti e fyo kufwile ukutungululwa. Afwile ukulalanshanya na kafunda wa cibili. Ilyo mwapokelela fye Akatabo ka Imikalile No Mulimo Tubomba, kangalila wa Imikalile no Mulimo Tubomba afwile ukutantika abakalanda amalyashi yonse mu myeshi yonse ibili. Umu musanshishe na malyashi ya basambi, amalyashi ayashili ya basambi, na bakaba baceyamani abo ibumba lya baeluda lyasala. (Moneni amaparagrafu 3-16 na 24) Ilyo kangalila wa Mikalile aletantika abasambi, afwile ukutontonkanya pa mushinku wa uyo musambi ne fyo aishiba icine, kabili afwile ukumona nga ca kuti uyo musambi muntungwa ukulanda pali ulo lubali. Kangalila wa Mikalile afwile ukutontonkanya pali ifi ilyo aletantinka na malyashi yambi. Bonse bafwile ukupeelwa amalyashi bakalanda ilyo kucili imilungu itatu nelyo ukucilapo. Na kabili pa kupeela abasambi amalyashi mufwile ukubomfya akapepala ka Imikalile ya Bwina Kristu no Mulimo Tubomba—Akapepala ka Kupeelelapo Ilyashi (S-89). Kangalila wa Mikalile alingile ukushininkisha ukuti umutande wa malyashi onse uo apangile baubika pa cipampa ca fyebo. Ibumba lya baeluda kuti lyasala eluda na umbi nelyo umubomfi utumikila uwakwafwa kangalila wa Mikalile. Na lyo line, tamufwile ukupeela umubomfi utumikila ukuti atantike abakulanda amalyashi ayashili ya basambi.

CEYAMANI WA UKULONGANA KWA MIKALILE NO MULIMO TUBOMBA

24. Cila mulungu, eluda akulaba ceyamani pa Kulongana kwa Imikalile no Mulimo Tubomba. (Mu filonganino umo baeluda bacepa, ababomfi batumikila abaishiba ukusambilisha kuti baba ba ceyamani.) Afwile ukupekanya bwino ifyebo fya kulanda pa kwiswila ukulongana na pa kusondwelela. Na kabili akalaita kalanda umo na umo uukwete ilyashi muli uku kulongana, kabili nga ca kuti baeluda banono pa cilonganino, na o akalalandako amalyashi yamo muli uku kulongana, maka maka amalyashi umuli ukutamba vidio, lelo umushili ukulanshanya ne bumba pa numa ya kutamba. Tamufwile ukufusha ifya kulanda pa kutasha uwa landa ilyashi. Ibumba lya baeluda likasala baeluda abengafikapo ukuba baceyamani. Baeluda abo mukasala bakalalekanina ukuba baceyamani. Ukulingana ne mpendwa ya baeluda pa cilonganino, kangalila wa Ukulongana kwa Imikalile no Mulimo Tubomba kuti aleba sana pali buceyamani ukucila baeluda bambi. Nga ca kuti eluda nafikapo ukulatungulula Isambililo lya Baibo Ilya pa Cilonganino, nalimo ninshi kuti afikapo no kuba ceyamani wa uku kulongana. Mukwai tamufwile ukulaba ukuti, eluda uuli ceyamani e ufwile ukutasha nelyo ukufunda abasambi cikuuku cikuuku abacikwata amalyashi nga amona ukuti nacilanga. Ceyamani alingile ukushininkisha ukuti ukulongana kwapwa pa nshita kufwile ukupwilapo. (Moneni paragrafu 17 na 19.) Ceyamani nga alefwaya kuti abomfya icisoselo na cimbi icili pa cisebele ilyo aleita kalanda umo na umo, pa kutila munyinefwe uulelanda ilyashi abomfya icisoselo ca kwa kalanda. Na kabili, ceyamani nga alefwaya kuti aikala pa mupando ne tebulo ifili pa cisebele pa lyashi lya musambi ilya kubelenga Baibo e lyo na pa lubali lwa Ifyo Twingacita pa Kuti Tulebila Bwino Imbila Nsuma. Ukucita ifi kuti kwa-afwa ceyamani ukukanapula mu nshita.

KAFUNDA WA CIBILI

25. Umulimo wa kwa kafunda wa cibili wa kufunda baeluda na batumikila pa mbali nga amona ukuti nacilinga, e kutila ilyo balanda ilyashi ilili lyonse mu Ukulongana kwa Imikalile no Mulimo Tubomba, amalyashi ya ku cintubwingi, ilyo batungulula nangu ukubelenga amaparagrafu pa Isambililo lya Ulupungu lwa kwa Kalinda, nelyo pa Isambililo lya Baibo Ilya pa Cilonganino.—Moneni paragrafu 19.

UMUPUTULE 1 NA 2

26. Nga ca kuti abasambi nabafula, ifilonganino kuti filekwata imiputule na imbi iya basambi. Cila muputule ufwile ukukwata kafunda uwaishiba sana ukusambilisha, kuti cawama mwasala eluda. Nga tapali baeluda aba kubomba uyu mulimo, umutumikila uwaishiba ukusambilisha kuti abombako uyu mulimo. Ibumba lya baeluda e lifwile ukusala umutumikila nelyo eluda uwa kubomba uyu mulimo, kabili elilingile ukupingulapo nga ca kuti balingile ukulalekanina ukubomba uyu mulimo nelyo iyo. Kafunda afwile ukulakonka ifya kucita ifyo tulandilepo mu paragrafu 18. Nga mukalakwata umuputule umbi, mufwile ukweba abasambi ukuya muli uyo muputule nga mwapwisha fye ulubali lwa Ukufwayafwaya Icuma Icaba mu Cebo ca kwa Lesa. Bafwile ukubwela umusambi wa kulekeleshako nga apwisha ukulanda ilyashi.

AMAVIDIO

27. Kukalaba amavidio aya kubomfya pali uku kulongana. Amavidio ya kubomfya pali uku kulongana yakalaba pa JW Library® app kabili kuti mwayakopolola ukubomfya ifintu pamo nga kompyuta, foni nelyo amatabuleti.

S-38-CW 9/25