Bakabilisha ba Bufumu Bacita Lipoti

“Ku Mupashi Mube Ababilima” mu Mexico

“ICALO conse cimoneka ukuba icabilima no kucincimushiwa ne mibombele.” Ifyo e fyalemba iofesi lya musambo ilya Watch Tower Society mu Mexico, kabili ifyo uko kulandapo kwaba ukwa cine! Imibombele yacincimushiwa muli ilya mpanga ilamoneka mu kuti ukufika mu June, kwaliko ifipimo fya pa mulu ifyakonkana 70 ifya cila mweshi ukufika muli bakasabankanya 277,436. Mu kulundapo, ukucila pa masambililo ya Baibolo 400,000 yalicitilwe lipoti, na basangilwe ku Cibukisho umwaka wapwile bafikile kuli 1,046,291. We citendekelo cawamisha ku kukula kwa ku nshita ya ku ntanshi!

Icapulilemo mu 1989 cali kwaluka mu mibele ya Nte sha kwa Yehova mu Mexico. Pamo nge ca kufumamo, Baibolo yali no kubomfiwa mu mulimo wa kushimikila uwa ku ŋanda ne ŋanda pa muku wa kubalilapo, no kulongana kwali no kwiswilwa ne pepo. Ici cakwete ica kufumamo ca mu kwangufyanya. Mu myeshi ibili, impendwa ya bakasabankanya yacilwike na bacila pali 17,000.

Ubuseko bwa bamunyina pali uku kulundulukako bulemonwa mu kulandapo kwabo. Umo alembele ukuti: “Lintu kalata yabelengelwe ku cilonganino, yalicilimwe imiku ibili ku kutoota kwa kufuma ku mutima. Cali ica kucincimusha!” Umbi asosele ukuti: “Twaliponeshe ifilamba fya buseko. Ifya kufumamo fyalimoneka mu kusunge nshita kwawaminako. Uuli onse afwaya ukusangwapo kwi pepo lya kwiswila.”

“Mu cifulo cesu,” e fyasosele Nte umbi, “umwanakashi uwaba uwacincila muli programu we sambililo lya Baibolo uwe Calici lya ciKatolika alandilepo ukuti: ‘Nga ca kuti mu kubangililako mu kuba fye no kulandapo kwabo na bamagazini babo, [Inte] batushile ababulo kulanda, nomba apo baleisula Baibolo pa minshi, capwa fye!’”

Inte sha kwa Yehova mu Mexico na kabili bebekesha ukucitilo bunte bwa mu lyashi mu kuba na Baibolo. Nkashi umo atununwike umwanakashi uwaipwishe cintu aletontonkanya pa lwa kuponya amafumo. Nte ayaswike ukuti: “Ico ntontonkanya tacili icacindama nga cintu Baibolo isosa.” Pa numa ya kubelenga amalembo yafulilako, nkashi apelulwile ukuti: “Kuli Kabumba ubumi bwalicindama nga nshi, nangu fye bumi bwa abo abashilafyalwa.”

Umwanakashi lyene asumine ukuti aleenekela akanya kakwe aka kubalilapo, lelo ukubebeta kwa fya cipatala kwatubulwile ukuti akanya kakaba akalemana. Dokota wakwe afwaile wene ukuponya ifumo, no mulume wakwe alisumine, lelo namayo umwine tali uwashininkisha. Kasabankanya apelulwile nankwe mu kulundapo ukufuma muli Baibolo, amupeele ishina lyakwe, kabili lyene balipatukene.

Imyaka isano pa numa pe bungano lya citungu, abaupana babili no mwana wa myaka ine iya bukulu balefwaya ukumona nkashi no mulume wakwe. Aali mwanakashi umo wine! Cinshi cacitike? Pa numa ya kulanshanya na Nte, umwanakashi apingwilepo ukufyala akanya kakwe. Dokota wakwe alikeene ukumumona na kabili, kabili nelyo umulume wakwe alitiinishe ukumusha nga ca kuti akanya kafyelwe no bulema. Lintu inshita yaishile kuli wene iya kupaapa, aile fye ku kufwaya ukwaafwa kuli dokota wa kubalilapo untu aali na maka ya kusanga.

Mu kwangufyanya pa numa akanya kafyelwe, dokota asosele ukuti: “Samalale, mayo! Naukwata umukashana umunono uwayemba.” Kwati taumfwile, amwipwishe ukubebeta akanya mu kusakamanishisha. Lyene amushimikile ilyashi lyakwe. Dokota aali fye no kusosa ukuti: “Ici cipesha amano.” Umwanakashi aali uwacankwa pa kuti alikwete ukushipa ku kucindika imimwene ya kwa Yehova iya kushila kwa bumi, kabili ainike akanya kakwe akayemba, akatuntulu ishina lya kwa nkashi. Bwangu bwangu fye lintu akosele mu kulinga, asapike Inte no kutendeka isambililo lya Baibolo na bene. Ilyo umwaka taulapwa, wene no mulume wakwe balibatishiwe.

Umutumwa Paulo acincishe ukuti “Ku [mupashi, NW] mube ababilima; kuli [Yehova, NW] mube abapyunga.” (Abena Roma 12:11) Inte sha kwa Yehova mu Mexico, ukupala Abena Kristu ba cine ukuli konse, balankulako kuli uku kukonkomesha no mutima wabo onse. Uyo e mulandu cilya calo conse cili icabilima no kucincimuka ne mibombele ya ku mupashi. Fintu Yehova apaala mu kufumba aba busumino bakwe!