Ukusansalika “Umuntu wa Bupulumushi”
“Fumenimo muli wene, mwe bantu bandi, epali mwawilako mu membu shakwe, epali mwakumako ku fikunka fyakwe.”—UKUSOKOLOLA 18:4.
1, 2. (a) Ni shani umuntu wa bupulumushi engeshibikwa? (b) Mimwene nshi iya kwa Lesa iya abo abatunga ukumubombela lelo abakwata umulandu wa mulopa? (Mateo 7:21-23)
ICEBO ca kwa Lesa casobele ukwisa kwa “muntu wa bupulumushi.” Na kabili casobele ukuti uyu musango wa bupulumushi wali no ‘konaulwa no kuusangule ca fye’ kuli Kaputunkanya wa kwa Lesa uwa mu mulu, Kristu Yesu. (2 Abena Tesalonika 2:3-8) Nga fintu ifipande fibangilileko filangile, ulya muntu wa bupulumushi ni bashibutotelo ba Kristendomu. Kale sana balekele icine ca Cebo ca kwa Lesa no kupokelela ifisambilisho fya cisenshi, pamo nga Bulesa Butatu, umulilo wa helo, na bumunshifwa bwa mweo. Mu kulundako, baleteleko imilimo iyacilana na mafunde ya kwa Lesa. Ukupala balya bantu Paulo asokeleko Tito, “basosa, abati, Twaishiba Lesa, lelo ku milimo yabo bamukaana pa kuba aba muselu, kabili bacintomfwa, kabili ifinangwa ku mulimo onse usuma.”—Tito 1:16.
2 Yesu atile: “Cenjeleni kuli bakasesema wa bufi, abeshila kuli imwe mu fya kufwala fya mpaanga, lelo mu kati mimbulu ya kutaakanya. Mukabeshibila ku fisabo fyabo.” Bakasesema ba bufi baali no kutwale “fisabo ifyabipa.” (Mateo 7:15-17) Ubushininkisho bwa fisabo fyabipa ifya bashibutotelo buli mulandu wabo uwa mulopa uwakulisha. Pa myanda ya myaka balyafwilisha inkondo sha mushilo, ukulubulwisha kwa butotelo, ne nkondo isho ishasumyo mulopa wa mamilioni. Balipepelela no kupaala imbali shonse shibili mu nkondo umo ifilundwa fya mabutotelo yabo yene fyaipaya umo no munankwe. Mu kucilana, umutumwa Paulo aali na maka ya kulondolola ukuti: “Ndi wa kaele ku mulopa wa [bantu bonse, NW].” (Imilimo 20:26) Bashibutotelo tabali aba kaele. Ku ba musango uyo Lesa abilisho kuti: “Kabili apo mufusho kupepa ine nshumfwa. Iminwe yenu yaisulamo imilopa.”—Esaya 1:15, 16.
3. Fya kuponako nshi ifya kucindama kwa mu cibulungwa conse filepalamina lubilo lubilo?
3 Inshita ya kwa Lesa iya kuputunkanyo bupingushi bwakwe pa muntu wa bupulumushi ilepalamina lubilo lubilo. Mu kwangufyanya, nga fintu Yesu asobele, “kukabo bucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) Ilya nshita ishatala aibako iya bwafya ikatendeka no kuputunkanishiwa kwa Babiloni Mukalamba, ubuteko bwa calo ubwa butotelo bwa bufi, ubusanshamo amabutotelo ya Kristendomu. Ifibombelo fya bupolitiki “fikamupomona, no kumucito bwamba; fikalya no mubili wakwe, no kumulungulushisha mu mulilo.” (Ukusokolola 17:16) Ubucushi bukalamba bukapwa mu kuba no konaulwa kwa fyashala ifya calo ca kwa Satana pa Armagedone, “ukulwa kwa bushiku bukalamba bwa kwa Lesa wa maka yonse.”—Ukusokolola 16:14, 16; 19:11-21.
Abakakililwako ku Kutemwa Bambi
4. Cinshi cintu abo abapepa Lesa “mu mupashi na mu cine” bafwile ukusunga mu muntontonkanya?
4 Apantu ifi fya kuponako fya kutenshe calo fili apepi no kwisa pa baikala pe sonde, kukakililwako nshi kwaba pa ‘bapepa Tata mu mupashi na mu cine’? (Yohane 4:23) Ku cintu cimo, bafwile ukusunga mu muntontonkanya cintu Yesu asoselele ukuti: “Nga mwabaka amafunde yandi, mwakulaikala mu kutemwa kwandi; ifyo ine nabaka amafunde ya kwa Tata, no kwikala mu kutemwa kwakwe. . . . Ili e funde lyandi, ilya kuti mutemwane, ifyo natemwa imwe. Takuli untu akwato kutemwa ukwacila pali uku, ukwa kuti umuntu apoosele ababiye umweo wakwe. Ni mwe banandi, nga mwacite fyo imweba.”—Yohane 15:10-14; 1 Yohane 5:3.
5, 6. (a) Cinshi cintu Yesu akambishe abasambi bakwe ukucita ico icali no kubeshibisha? (b) Ni mu mano nshi ici cali ifunde lipya?
5 Abena Kristu ba cine muli ifyo baliba abakakililwako ku kutemwa abantu bambi, ukucilisha bamunyinabo na bankashi ba Bwina Kristu mu fyalo fyonse. (Imilimo 10:34; Abena Galatia 6:10; 1 Yohane 4:20, 21) Mu cine cine, Abena Kristu banensu bafwile ukuba “abacincila mu kutemwana.” (1 Petro 4:8) Uyo musango wa kutemwa pa cipimo ca cibulungwa conse wishibisha bene nga bakapepa ba cine, pantu Yesu atile: “Ifunde lipya ndemupeela, lya kuti muletemwana: ifyo namutemenwe, na imwe mutemwane. Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:34, 35.
6 Cinshi cali cipya pa lwa lilye funde? Bushe abaYuda abali pe samba lye Funde lya kwa Mose tabapeelwe ifunde lya kuti, “Uletemwo mubiyo nga we mwine”? (Ubwina Lebi 19:18) Ee, lelo Yesu alangilile icintu cimo icalundwapo lintu atile, “Ifyo namutemenwe.” Ukutemwa kwakwe kwasanshishemo ukupeela kwakwe ubumi bwakwe pa mulandu wa bambi, kabili abasambi bakwe balingile ukuitemenwa ukucita cimo cine. (Yohane 15:13) Ico cali cipimo cacilapo kusumbuka ica kutemwa, apantu ilembo lya musango uyo talyali ilyafwaikwa kwi Funde lya kwa Mose.
7. Butotelo nshi bwanakila ifunde lya kutemwa muli uno mwanda wa myaka?
7 Mu mwanda wesu uwa myaka, butotelo nshi bwanakila ili funde lya kutemwa? Mu kushininkisha te mabutotelo ya Kristendomu, pantu balipayana ukufika ku makumi ya mamilioni mu nkondo shibili isha calo no kulwishanya kumbi. Ni Nte sha kwa Yehova e banakila ili funde lya kutemwa mu kusalala kwe sonde. Balisungilila ukushibuulamo lubali kwakosa mu nkondo sha nko, pantu Yesu asosele ukuti abakonshi bakwe tabafwile ukuba “ba pano isonde.” (Yohane 17:16) Muli ifyo, kuti basosa, nge fyasosele Paulo, ukuti bali aba “kaele ku mulopa wa bantu bonse.” Pamo nge ca kumwenako, mona ulubali lwa kwiswila ulwa kusuminishanya kwakosa ukwapokelelwe na babomfi ba kwa Yehova pe bungano lya pa Washington, D.C., pa November 27, 1921:
“Pamo nga Bena Kristu abaleibikilishako mu mukoosha ukukonka ifisambilisho fya kwa Kristu Yesu Shikulwifwe na Batumwa bakwe, tulanguluka: ukuti inkondo ni benye wa kukanatumpuluka, ca konaula imibele isuma kabili museebanya ku bantu na bantu aba Bwina Kristu; ukuti ifishinte fyasambilishiwe na Shikulu Yesu Kristu filafumyako Abena Kristu bashishiwa ukufuma ku kwingila mu nkondo, ukusumyo mulopa nelyo ulukakala mu musango uuli onse.”
8. Cinshi cintu icalembwa ca mu lyashi lya kale cisosa pa lwa Nte sha kwa Yehova mu kati ka Nkondo ya Calo iya II?
8 Ni shani fintu iyo mimwene yabomfiwe mu kati ka Nkondo ya Calo iya II? Muli ilya nkondo yacilishapo kubipa mu lyashi lya kale lyonse ilya buntunse, abantu bamo amamilioni 50 balipaiwe. Lelo takuli uwaipaiwe na umo uwa Nte sha kwa Yehova! Ku ca kumwenako, mupepi na bashibutotelo bonse aba mu Germany mu kucincila nelyo buyefyabuyefya baafwilishe ubuNazi. Mu kucilana, Inte sha kwa Yehova pe samba lya kuteka kwa ciNazi basungilile ukushibuulamo lubali kwakosa kabili bakeene ukwawila Hitler nelyo ukuba ulubali lwa cibombelo cakwe ica fita. E ico, tabaipeye uuli onse uwa bamunyinabo ba ku mupashi aba mu fyalo fimbi, nelyo uuli onse umbi muli uko kuloshako. Kabili Inte sha kwa Yehova mu fyalo fyonse fimbi batwalilile aba kukanabuulamo lubali na bo bene.
9. Cinshi cacitike ku Nte sha kwa Yehova mu Germany na mu Austria pe samba lya kuteka kwa ciNazi?
9 Abengi aba Nte sha kwa Yehova balipoosela ababiye umweo wabo mu kunakila ifunde lya kutemwa. Ukupitulukamo kwa citabo ca Kirchenkampf in Deutschland (Ukulwa kwa Macalici mu Germany), ica kwa Friedrich Zipfel, cisosa ukulosha ku Nte ukuti: “Amaperesenti amakumi pabula na cinelubali aya filundwa fya ili bumba linono ilya butotelo baali finakabupalu fya kupakasa kwa [ciNazi] ya National Socialist. Kamo aka muli fitatu aka bene balipaiwe, atemwa ku kuputunkanishiwa, ku ncitilo shimbi isha lukakala, ku nsala, ukulwala nelyo ku kucululuka kwa busha. Ukutapata kwa uku kunashiwa takwali ukwatangilileko kabili kwali ca kufumamo ca citetekelo ca kukanasuusukako icishali no kumfwana ne cisambilisho ca National Socialist.” Mu Austria, 25 peresenti iya Nte sha kwa Yehova baliputunkanishiwe, ukuumwa ukufika ku mfwa, nelyo ukufwa ku bulwele nelyo ukufunshika mu nkambi sha ciNazi.
10. Kucetekela nshi kuntu balya abafwile pa mulandu wa kunakila ifunde lya kutemwa bakwete?
10 Abo abafwilile cisumino pa mulandu wa kunakila ifunde lya kutemwa baali abacetekela ukuti “Lesa tali uushalungama; takalabe umulimo [wabo], no kutemwa uko [balangile] kwi shina lyakwe.” (AbaHebere 6:10) Balishibe ukuti “pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.” (1 Yohane 2:17) Balikwete isubilo lyashininkishiwa ilya kubuushiwa mu kuba no bumi bwa ciyayaya mu cilolwa.—Yohane 5:28, 29; Imilimo 24:15.
11. Ni mu nshila nshi ababomfi ba kwa Yehova babela abaibela, kabili busesemo nshi bulefikilishiwa muli bene?
11 Ababomfi ba kwa Yehova baliba abaibela mu kunakila ifunde ilyalandilwe na Petro na batumwa bambi ku cilye ca pa mulu ukuti: “Tuli no kunakila Lesa ukucilo kunakila abantu.” (Imilimo 5:29) Pa mulandu wa kuti Inte sha kwa Yehova balacite ci, balatuninkishiwa no “mupashi wa mushilo, uyo Lesa apeele ku bamunakila [nga kateka, NW]” (Imilimo 5:32) Ayo e maka ayabafwilisha ukufikilisha ubusesemo bwa pali Esaya 2:2-4. Bwasobele ukuti mu nshita yesu ukupepa kwa cine kwali no kwimikwa cipya cipya no kuti abantu ukufuma mu nko shonse na mabutotelo baali no kukonkolokelako. Ica kufumamo cimo cali no kuba ca kuti: “Bakasuke abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.” Pa mulandu wa kuti ababomfi ba kwa Yehova baleipekanya ku bumi mu calo cipya ica mutende, tabakasambilile na kabili ubulwi. Balasambilila ifunde lya kutemwa.—Yohane 13:34, 35.
12. Cinshi cintu abo abalenakila ifunde lya kutemwa bafwile ukucita kuli bambi?
12 Apantu ukutemwa kwa Bwina Kristu kupilibula na kabili ‘ukutemwa umwina mupalamano nga we mwine,’ ababomfi ba kwa Lesa te kuti babe aba kaso pa lwa cintu baishiba. (Mateo 22:39) Kuciliko abengi na bambi abengatemwa ukubombela Lesa no kwikala mu calo cakwe icipya. Ilintu kuciliko inshita, aba na bo bene balekabila ukusambilila pa lwe funde lya kutemwa ne cine cimbi icingi icayampana kuli Mulopwe wa Kubumbwa Konse, Yehova Lesa. Bafwile ukusambilishiwa ukuti Yehova eka e wawaminwa ukupepa kwesu na fintu uko kupepa kuli no kucitwa. (Mateo 4:10; Ukusokolola 4:11) Abo abasambilila kale ifi fintu bali pe samba lya kukakililwako ku kwebako bambi pa lwa fyene pa kuti na bo bene bengesa mu kusenamina kwa kwa Yehova.—Esekiele 33:7-9, 14-16.
Ukusansalika Umuntu wa Bupulumushi
13. Pamo ngo lubali lwa bunte bwesu ubwa mu kusalala kwa calo, cinshi tufwile ukulengo kwishibikwa, kabili mulandu nshi?
13 Yesu asosele ukuti “imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Pamo ngo lubali lwa ubu bunte bwa mu kusalala kwa calo, ababomfi ba kwa Lesa baba pe samba lya kukakililwako ku kulenga ukwishibikwa ubupingushi bwakwe ku kulwisha ubutotelo bwa bufi, ukucilisha bashibutotelo ba Kristendomu. Aba balicilapo ukutungwa akabi mu menso ya kwa Lesa pantu batunga ukuba Abena Kristu. Bafwile ukusansalikwa pa kuti abo abalefwayo kubombela Lesa kuti balubulwa ukufuma ku kusonga kwabo kabili kuti babuule ntampulo shalinga ku kupusunsuka. Nga fintu Yesu asosele ukuti: “Icine cikamulenga abantungwa.”—Yohane 8:32.
14. Bukombe nshi ubwaumfwika ubufwile ukubilishiwa ukulosha ku butotelo bwa bufi?
14 Muli ifyo, Inte sha kwa Yehova bafwile ukulenga kwishibikwa ubu bukombe bwapuutwamo ukulosha ku butotelo bwa bufi ubwa kuti: “Fumenimo muli wene, mwe bantu bandi, epali mwawilako mu membu shakwe, epali mwakumako ku fikunka fyakwe: pantu imembu shakwe nashilundikana ukufika na mu mulu, na Lesa naibukishe fibi fyakwe. . . . Fikesa mu bushiku bumo ifikunka fyakwe, imfwa, no kuloosha, ne cipowe: mu mulilo e mo akalungulila; ico [Yehova, NW] Lesa uwamupingula alikosa.”—Ukusokolola 18:4-8.
15. Ni shani fintu umwaka wa 1914 wabombele ulubali mu kutantika kwa nshita ukwa kwa Yehova, kabili cinshi cafuminemo pa numa ya Nkondo ya Calo iya I?
15 Amasesemo ya Baibolo yalango kuti “inshiku sha kulekelesha” isha ino micitile ya fintu shatendeke mu mwaka wakakala 1914. (2 Timote 3:1-5, 13; Mateo 24:3-13) Ukutula muli ulya mwaka twikala mu “nshita ya ku mpela.” (Daniele 12:4) Pa numa fye ya Nkondo ya Calo iya I, mu kumfwana no kutantika kwa nshita ukwa kwa Yehova, ababomfi bakwe batendeke mu maka ukutanununa ukubilisha kwabo ukwa Bufumu bwa kwa Lesa nga fintu casobelwe pali Mateo 24:14. Na kabili batendeke ukusansalika ubutotelo bwa bufi mu kukoselako, ukucilisha ikalasi lya bupulumushi ilya bashibutotelo ba Kristendomu ba busangu.
16. Ni shani fintu ukusansalikwa kwa muntu wa bupulumushi kwalonganika umulalo ukalamba ukucila pa myaka 70?
16 Ukucila pa myaka 70 nomba, mu kuba na maka yakulilako lyonse, ababomfi ba kwa Lesa balisoka abantu ku mibombele ya longolo iya muntu wa bupulumushi. Kwaliko Inte amakana fye yanono abalecite ci pa numa ya Nkondo ya Calo iya I. Lelo nomba basanguka “uluko lwakosa” ulwa batumikishi bacincila ukucila pa mamilioni yatatu na citika abateyanishiwa mu filonganino ukucila pali 60,000 ukupulinkane sonde lyonse. (Esaya 60:22) Pa cipimo ca kutanunuka, ababomfi ba kwa Lesa mu kupimpa balebilisha Ubufumu bwa kwa Lesa nge subilo fye lyeka ku mutundu wa muntu kabili, pa nshita imo ine, balesansalika bashibutotelo pa mulandu wa cintu baba—umuntu wa longolo uwa bupulumushi.
Mulandu Nshi Kwabela ukwa Maka Ifyo?
17. Mulandu nshi ababomfi ba kwa Yehova basansalikila mu maka umuntu wa bupulumushi?
17 Mulandu nshi ababomfi ba kwa Yehova basansalikila mu maka umuntu wa bupulumushi iyi yonse myaka? Pantu amamilioni ye bumba likalamba ilya mpaanga sha kwa Yehova abali kale kale pa nshila ya kwi pusukilo bafwile ukucingililwa ukufuma ku calo ca kwa Satana no butotelo bwa ciko ubwa bufi. (Yohane 10:16; Ukusokolola 7:9-14) Ukulundako, kano nga ca kuti bashibutotelo basansalikwa, abantu ba mitima yafumaluka abashilati babe ulubali lwa mukuni wa kwa Lesa te kuti beshibe ifya kusengauka inshila yalubana. E co bafwile ukwebwa, pamo fye nga fintu Yesu aebele abantu lintu asosele ukukuma ku ntungulushi sha butotelo isha bumbimunda isha mu kasuba kakwe ukuti: “Ni ntungulushi mpofu; lelo nge mpofu itungulule mpofu, shonse shibili shikawila mu cilindi.”—Mateo 15:14; moneni na kabili 2 Abena Korinti 4:4; 11:13-15.
18. Cinshi cintu bakafwaya ba cine bakabila ukwishiba?
18 Bashibutotelo bali ulubali lwa calo ca kwa Satana. (Yohane 8:44) Lelo cili calo ico Lesa mu kwangufyanya akashonaula ukucifumyapo. (2 Petro 3:11-13; 1 Yohane 2:15-17) E co Icebo ca kwa Lesa cisoko kuti: “E ico uyo afwayo kuba bucibusa ne calo aicito mulwani kuli Lesa.” (Yakobo 4:4) Bashibutotelo balasuulako uko kusoka no kutwalilila ukuyobeka mu milandu ya bupolitiki. Beba abakonshi babo ukuti icalo cawaminako cikesa ukupitila mu kubombesha kwa bapolitishani. Lelo ilyo lili lisubilo lya bufi, apantu ici calo icaba pe samba lya kwa Satana cili pa nshila ya ciko ku kufumapo. E co abantu abalolesha kuli ici calo kwi subilo balelufiwa. Balekabila ukwebwa icine pa lwa kuntu icalo cilelola ne cikapyana pali cene.—Amapinda 14:12; 19:21; Mateo 6:9, 10; Ukusokolola 21:4, 5.
19. Ni shani fintu imibele ya ku calo iya bashibutotelo bamo yasansalikwa mu fya kusabankanishishamo amalyashi mu nshita sha nomba line?
19 Imibele ya ku calo iya bashibutotelo bamo yalisansalikwa nelyo fye mu fya kusabankanishishamo amalyashi mu nshita sha nomba line, pamo nga ku ca kumwenako imisango ya bumi bwa bucisenene ne ya kuipakisha iya bashibutotelo bamo aba pa TV. Kalemba wa nyimbo umo uwa muno nshiku ashikile ulwimbo lwa mutwe wa kuti: “Bushe Yesu Kuti Afwala Rolex [inkoloko] ya [$10,000] pa Bulangisho Bwakwe Ubwa pa Televisioni?” Ulwimbo lutwalilila ukusoso kuti: “Bushe Yesu kuti abo wa bupolitiki nga ca kuti Wene abwelele kwi sonde, ukukwata iŋanda Yakwe iya bubili mu Palm Springs iya [kuipakisha] no kwesha ukufisa ukulinga Kwakwe?” Mu kulundako, bashibutotelo bafulilako balatekelesha nelyo balabelesha ukulalana kwa ba bwamba bumo bwine. Nelyo fye ni nomba Icalici lya ciKatolika mu United States lilelipila amamilioni ya madola mu fya konaula ku kufuuta pa milandu ya bashimapepo iya kucenda abana.—Abena Roma 1:24-27; 1 Abena Korinti 6:9, 10.
20. Mulandu nshi ababomfi ba kwa Lesa bafwile ukutwalilila ukusansalikila umuntu wa bupulumushi?
20 Incitilo yalubana iya musango uyo te kuti isulweko fye ku babomfi ba kwa Lesa lelo ilingile ukusansalikwa ku kumwenamo kwa bambi. Ibumba likalamba ilya mpaanga shimbi lifwile ukucingililwa ukufuma kuli abo abengesha ukubatungulula ku kutoba amafunde ya kwa Lesa. Kabili abo “abateta no kulila pa fya muselu fyonse ifilecitwa” balekabila ukusapikwa no kulonganikwa ku kutungulula kwabamo kucingilila ukwa kwa Kacema Mukalamba, Yehova Lesa, na “kacema musuma,” Kristu Yesu.—Esekiele 9:4; Yohane 10:11; Amapinda 18:10
21. Cinshi cintu Inte sha kwa Yehova bakatwalilila ukubilisha?
21 E ico, abantu ba kwa Lesa tabakashimbe ukubilisha icilandushi cakwe ku kulwisha bonse aba calo ca kwa Satana, ukusanshako umuntu wa ciko uwa bupulumushi, bashibutotelo ba Kristendomu. Bakabilisha na maka ubukombe bwa bumalaika ubwa pa Ukusokolola 14:7 ubwa kuti: “Tiineni Lesa, no kumupeelo mucinshi, pa kuti naiise nshita ya bupingushi bwakwe.” Kabili bakasansha muli uku kubilisha ukusoka kwe pamfya ukwa pa Ukusokolola 18:4 ukulosha ku butotelo bwa bufi ukuti: “Fumenimo muli wene, mwe bantu bandi, epali mwawilako mu membu shakwe, epali mwakumako ku fikunka fyakwe.”
Ifipusho fya Kupitulukamo:
◻ Cinshi cikabe shamo lya muntu wa bupulumushi, kabili mulandu nshi?
◻ Kukakililwako nshi ababomfi ba kwa Yehova bakwata ukulosha kuli bambi?
◻ Ni shani fintu abantu ba kwa Yehova baisunga aba kaele ukufuma ku mulopa wa bantu bonse?
◻ Cinshi tufwile ukucita ukulosha kuli Babiloni Mukalamba?
◻ Mulandu nshi tukatwalilila ukubilisha ubukombe bwesu ubwa maka ukulosha ku muntu wa bupulumushi?
[Icikope pe bula 23]
Abatumwa baebele icilye ca pa mulu ukuti: “Tuli no kunakila Lesa ukucilo kunakila abantu”
[Icikope pe bula 24]
Abantu ba bufumacumi balekabila ukwishiba uko icalo na mabutotelo ya ciko filelola