Bushe Uleibukisha?

Bushe walisanga ishafumine isha nomba line isha Ulupungu lwa kwa Kalinda ukuba isha mutengo ubomba kuli iwe? Lyene mulandu nshi te kwesha umuntontonkanya obe ne fyakonkapo?

◻ Cinshi tufwile ukucita nga tuli no kumona ukumfwana no mutende pa kati ka mishobo yonse iya bantu ifyamwenwa libela pali Esaya 2:4?

Ica ntanshi, tufwile ukupokelelo kuti Kabumba wesu, Yehova, alikwata insambu ku kutufunda pa lwa “mibele yakwe.” Ica cibili, tufwile ukukwata ukufwaisha kwaswatuka ku kulinga ku mafunde ya kwa Lesa pa kusoso kuti: ‘tukenda mu nshila shakwe.’ (Esaya 2:2, 3)—12/15, amabula 5, 6.

◻ Mulandu nshi Inte sha kwa Yehova tabafuupulwa no kulufye subilo ku lupato lwa mu kusalala kwa calo no kukaanya?

Yesu asobele ukuti ukukaanya kwa musango yo no lupato fyali no kuba cishibilo ca bakapepa ba cine cine. (Yohane 15:20, 21; 2 Timote 3:12) E co bakabilisha ba mbila nsuma balyebekeshiwa ukuti balikwata ukusuminisha kwa bulesa. Mu kulundapo, Inte sha kwa Yehova balishiba ukuti balikwata ukutungilila kwa kwa Lesa Wapulamo, Yehova.—1/1, ibula. 12.

◻ Fifwaikwa nshi fimo ifya kutendekelako ifyo tufwile ukukumanisha nga ca kuti amapepo yesu yali no kwasukwa?

Tufwile mu kufumaluka ukusumina ukuti Lesa e ko aba. Tufwile ukuba “abamufwayafwaya,” ukucetekela ukuti akalambula abo abacite fyo. (AbaHebere 11:6) Na kabili, tulingile ukutununuka Yehova ukupitila muli Yesu Kristu kabili wene eka. (Yohane 14:6, 14)—1/15, amabula 4, 6.

◻ “Ukuipeelesha kwa bukapepa” cinshi? (1 Timote 3:16)

Ukuipeelesha kwa bukapepa kushinshimuna, ukupepa, no mulimo kuli Lesa, mu kuba na bucishinka kuli bumulopwe bwa mu bubumbo bonse.—1/15, ibula 11.

◻ Ni ani aba “umuntu wa bupulumushi” uo Paulo aloshako pali 2 Abena Tesalonika 2:3?

Paulo talelanda pa lwa muntu umo, apantu alondolola ukuti uyu “muntu” ali uwamonekesha mu kasuba ka kwa Paulo kabili akatwalilila ukubapo ukufikila Yehova amonaula pa mpela ya ino micitile. E co, “umuntu wa bupulumushi” ni numbwilo ya cimpashanya. Ubushinino bulanga ukuti aba libumba lya bashibutotelo ba Kristendomu aba cilumba, abaibililika, abo pa myanda ya myaka baimika nge funde ku bene bene.—2/1, ibula 11.

◻ Ni shani ukufunuka kwingafumishiwapo?

Ukufunuka pa kati ka bantunse kuti kwafumishiwapo fye ukupitila mu kusambilila kwalungama no kukansha, mu kuba ne mitande ya kukonka, nelyo amafunde ya myendele, ukukonkwa. Ukufunda kwa musango yo kufwile ukutendeka ku ntulo iyo yaba iine iyalubukako ku kufunuka. Ni Lesa eka e wingapayanya uyu musango wa kusambilisha, kabili usangwa mu citabo cakwe icalembwa, Baibolo wa Mushilo.—2/15, ibula 5.

◻ Nga ca kuti isambililo lya pa lobe lili no kufumamo ukuipeelesha kwa bukapepa, cinshi isambililo lilingile ukusanshamo?

Ubuyo bwe sambililo lya pa lobe te kuti bube fye kufimba amabula ya fyebo kabili muli ifyo ukwisusha umuntontonkanya ne fyebo. Mu cifulo ca ico, lintu ulubali lwa Cebo ca kwa Lesa lwabelengwa, inshita ifwile ukusendwako ku kubelebesha pa fyebo ku kupima ico cisambilisha pa lwa mibele ya kwa Yehova ne nshila pa kuti umusambi kuti apala Yehova ukucilapo muli ishi mbali.—3/1, ibula 13.

◻ Mulandu nshi isambililo lya pa lobe ilya Baibolo lilingile ukusanshako ukubelenga kwa lyonse ukwa calembwa ce Landwe lya kwa Yesu?

Ica kumwenako ca kwa Yesu citwaafwa ukulundulula ukuipeelesha kwa bukapepa. Yesu alishibe Wishi mu kuwaminako ukucila uuli onse umbi, e co kuti mu kupalamisha apashanya inshila sha kwa Yehova ne mibele. E ico, atwimikile ica kumwenako capwililika ica kuipeelesha kwa bukapepa. (Yohane 1:18; 14:9; Abena Roma 13:14)—3/1, ibula 18.

◻ Mu cilangililo ca kwa Yesu ica matalanti, cinshi capilibwilwe ku kubika amatalanti mu kubomba? (Mateo 25:19-23)

Ukubika amatalanti mu kubomba capilibwile ukubomba mu busumino nge nkombe sha kwa Lesa, ukupanga abasambi, no kusalanganya icine ca ku mupashi ku ba ŋanda ya kwa Lesa. (Mateo 24:45; 28:19, 20; 2 Abena Korinti 5:20)—3/15, ibula 13.

◻ Ni mu mbali nshi shitatu umo Baibolo yabela iyaibela ukulinganishiwa ku ntulo shimbi shonse isha kufunda?

Ica ntanshi, ukufunda kwa iko kwaliba lyonse ukwa kunonsha. (Ilumbo 93:5) Ica cibili, Baibolo yalicimfya amesho ya nshita. (Esaya 40:8; 1 Petro 1:25) Ica citatu, ukufunda kwalekanalekana ukwa Baibolo te kuti kulinganishiweko. Te mulandu ni mpika nshi nelyo ukupingulapo twalolenkana na ko, mwaliba amano muli Baibolo ayo ayengatwaafwa.—4/1, ibula 13.

◻ Ni nshila nshi shibili isha bushinino ishilangilila ukuti Baibolo Cebo ca kwa Lesa, te ca muntu?

Amano yashingalinganishiwako aya Baibolo na maka ya iko ku kwalula abantu. (Amapinda 2:1, 5, 6; AbaHebere 4:12)—4/1, ibula 21.