Ubumi bwa kwa Yesu no Butumikishi

Lintu Kritu Afika mu Maka ya Bufumu

YESU acili na basambi bakwe pa Lupili lwa Miolife. Mu kwasuka ku kwipusha kwabo ku cishibilo ca kubapo kwakwe ne ca kusondwelela kwa micitile ya fintu, nomba abeba ica kulekelesha mu kukonkana kwa filangililo fitatu. “Ilyo Umwana wa muntu akesa mu bukata bwakwe, na bamalaika bonse pamo nankwe,” e fyo Yesu atendeka, “e lyo akekala pa cipuna ca bukata bwakwe.”

Abantunse te kuti bamone bamalaika mu bukata bwabo ubwa mu mulu. E co ukufika kwa Mwana wa muntu, Yesu Kristu, na bamalaika bakwe kufwile ukuba ukushimoneka ku menso ya buntunse. Ukufika kucitika mu mwaka wa 1914. Lelo ku mifwaile nshi? Yesu alondololo kuti: “Ne nko shonse shikalonganikwa ku cinso cakwe; kabili akabapaatukanya, ifyo umucemi apaatukanye mpaanga ku mbushi, no kubike mpaanga ku kulyo ne mbushi ku kuso.”

Ukulondolola icikacitika kuli abo abapaatulwa ku lubali lwasenaminwa, Yesu asosa ukuti: “E lyo Imfumu ikeba aba ku kulyo kwa iko, ikatila, Iseni, mwe bapaalwa ba kwa Tata, kwateni ubufumu ubwateyanishiwe imwe ukufuma pa kulengwa kwa pano isonde.” Impaanga tashakateke na Kristu mu mulu lelo shikapyana Ubufumu mu mano ya kuba abatekwa ba buko aba pe sonde. “Ukulengwa kwa pano isonde” kwaliko lintu Adamu na Efa mu kubalilapo bafyele abana abaali no kumwenamo ukufuma ku kupayanya kwa kwa Lesa ku kulubula umutundu wa muntu.

Lelo mulandu nshi impaanga shapaatulwilwa ku kwa kulyo ukwasenaminwa ukwa Mfumu? “Pantu nali ne nsala,” e fyo imfumu yaasuka, “na imwe mwampeele ukulya; nali ne cilaka, na imwe mwalinwenseshe; nali umweni, na imwe mwalinsekelele; nali ubwamba, na imwe mwalimfwikile; nalilwele, na imwe mwalimpempwile; nali mu cifungo, na imwe mwaliishile kuli ine.”

Apantu impaanga shaba pe sonde, balefwaya ukwishiba ifyo baali na maka ya kucita iyo milimo yawama ku Mfumu yabo iya mu mulu. “Mwe Shikulu, bushe ni lilali twamumwene muli ne nsala, no kumulela?” baipusha, “nalimo muli ne cilaka, no kumunwensha? Kabili ni lilali twamumwene muli umweni, no kumusekelela? nalimo uwa bwamba, no kumufwika? Kabili ni lilali twamumwene umulwele nalimo mu cifungo, no kwisa kuli imwe?”

“Ndemwebe cine cine, nati,” Imfumu yaasuka, “apo ponse mwacitiile umo wa muli aba bamunyinane abacepesha, mwacitiile ine.” Bamunyina ba kwa Kristu baba ni abo abashalapo pe sonde aba muli ba 144,000 abakateka na wene mu mulu. Kabili ukucita icisuma kuli bene, Yesu asosa ukuti, cili cimo cine no kucita icisuma kuli wene.

Mu kukonkapo, Imfumu yalanda ku mbushi ukuti: “Fumeni pano, mwe batiipwa, kabiyeni ku mulilo wa muyayaya uwateyanishiwa Kaseebanya na bamalaika bakwe. Pantu nali ne nsala, na imwe tamwampeele kulya; nali ne cilaka, na imwe tamwanwenseshe; nali umweni, na imwe tamwansekelele; nali ubwamba, na imwe tamwamfwikile; nali umulwele, na mu cifungo, na imwe tamwampempwile.”

Imbushi, nangu cibe fyo, shailishanya ukuti: “Mwe Shikulu, bushe ni lilali twamumwene muli ne nsala, nalimo muli ne cilaka, nalimo umweni, nalimo uwa bwamba, nalimo umulwele, nalimo mu cifungo, no kumupyungila iyo?” Imbushi shapingulwa mu kubipisha pa cishinte cimo cine apo impanga shapingwilwa mu kusenaminwa. “Apo ponse tamwacitiile umo uwa muli aba abacepesha [uwa bamunyinane],” Yesu ayasuka, “tamwacitiile nangu ine.”

E co ukubapo kwa kwa Kristu mu maka ya Bufumu, pa ntanshi fye ya mpela ya iyi micitile ibifi iya fintu mu bucushi bukalamba, ikaba ni nshita ya bupingushi. Imbushi “bakaya ku kulimunwa kwa muyayaya; lelo abalungami [impaanga] bakaya ku mweo wa muyayaya.” Mateo 25:31-46; Ukusokolola 14:1-3.

◆ Mulandu nshi ukubapo kwa kwa Kristu kufwile ukubela ukushimoneka, kabili mulimo nshi untu acita pali iyo nshita?

◆ Ni mu mano nshi impaanga shiila mu Bufumu?

◆ Ni lilali lintu “ukulengwa kwa pano isonde” kwacitike, kabili mulandu nshi lilya?

◆ Ni pa cishinte nshi pantu abantu bapingwilwa atemwa nge mpaanga nelyo nge mbushi?