Ifipusho Ukufuma ku Babelenga

◼ Bushe cili icalinga ku Bena Kristu ukuya mu kulunga nelyo ku bushila?

Ukwankulako kwalekanalekana ku kulunga ilingi line kubimbamo ukuyumfwa kwashika. E co cili icawamisha ku Bena Kristu ukutukusha ku kumfwikisha no kubomfya ukutontonkanya kwa kwa Yehova Lesa pa mulandu nga fintu usangwa muli Baibolo.

Lesa apeele umutundu wa muntu ukuteke nama sha “mpanga” ne “fitekwa.” Pa kubalilapo, abantunse tabapeelwe ulusa kuli Kabumba, kabili napamo tabakwete ukukabila ukuli konse ukwa cine cine, ku kwipaya inama ku kulya. (Ukutendeka 1:24, 29, 30) Ni pa numa fye ya Lyeshi e po Lesa apeele umutundu wa muntu insambu ku kulya umunofu wa nama uyo wapongolwelwemo mu kulinga “umweo wa uko—umulopa wa uko.” (Ukutendeka 9:3, 4) Iyo kuti yaba ni nama napamo ukufuma ku nama sha mu mushi nelyo ku sha mu mpanga.

Abena Isreale balitekele inama, pamo nga impaanga ne ŋombe, ishali no kwipaiwa ku kulya ilyo bafulwike ukulya inama. Na kabili balilungile no kwipaya isabi ku kukwata ifya kulya. (Amalango 12:20-24; 14:4-20) Ici cumfwana no bulondoloshi bwa kwa Lesa ubwa cimpashanya ubwa kuti aali no ‘kutuma abalondo abengi ku kubombela abantu bakwe kabili ababamfi abengi ku kulunga bene.’ (Yeremia 16:16) Pa numa, Yesu asanshishemo abashila be sabi mu batumwa bakwe no kutungulula ubulondo bwine bwine ubwe sabi.—Mateo 4:18-22; 17:27; Luka 5:2-6; Yohane 21:4-7.

Lintu icikolwe Isaki aipwishe ku ca maliila ica nama, umwana umwaume wakwe Yakobo aali uwaitemenwa ku kwipaya abana babili aba mbushi ku kupanga ica maliila kuli wene. Esau, nangu ni fyo, alungile inama ya mpanga ku kukwata inama ya kwa wishi. Moneni ukuti nangu cingati inama ukufuma ku nama sha mu mushi e ko wali, Isaki aipwishe umunofu ukufuma ku nama ya mpanga. Moneni, na kabili, ukuti abana baume bonse babili baipeeye inama iyali no kuba ica kulya, te yabo abene, lelo iya muntu umbi.—Ukutendeka 27:1-19.

Inama pambi kuti shaipaiwa ku milandu imo pa mbali ya kuba ica kulya. Impapa sha shiko kuti shapangwamo ifya kufwala. (2 Ishamfumu 1:8; Marko 1:6; AbaHebere 11:37) Ifya fya kucingilila na fyo fyalipangilwe ukufuma ku mpapa sha nama, nangu fye ni nama shishasanguluka ku kulya ne sho Abena Israele bashalelya.—Ukufuma 39:33, 34; Impendwa 24:7; Abapingushi 4:19; Amalumbo 56:8.

Icifwaikwa ca kwa Lesa ica kuti umulopa wa nama iyaipaiwa upongololwemo cilingile ukucinkulako abalunshi ukuti ubumi bwa nama bwafuma kuli wene na muli fyo bulingile ukumonwa mu mucinshi, te kwipaiwa mu kubulwe funde. (Ubwina Lebi 17:13) Nimrode mu kumonekesha aipayawile inama kabili mu kucitikako ukuitakisha pa kulamuka kwakwe ukwa bulunshi, ubukulu nelyo impendwa ya kwipaya kwakwe, nelyo pa fikombe ifyo pambi fyafumine kuli shene. Aali “mubamfi uwakosa ku cinso ca kwa Yehova.”—Ukutendeka 10:9.

Ukucincimuka kwa musango uyo pa lwa bulunshi nelyo ukwipaye nama, nelyo ukuyobeka mu kwipaye sabi, kuti kwalunduluka mu Mwina Kristu. Abengi umulunshi nelyo umushila uyo uwabebeta umutima wakwe alisanga ukuti alyambukilweko no ‘buseko bwa kwipaya.’ Ukucincimuka kwa musango uyo kwendela pamo no kusuula kwabula ifunde ku bumi bwa nama. E co ilyo tacili icalubana ku kulunga nelyo ukwipaya isabi (lintu ukwipaya nelyo ukwikata kuti kwabomfiwa na umo ku kulya nelyo imifwaile imbi iyalinga), te kuti cibe icishalinga ukucita ifyo nga ca kuti Umwina Kristu akwete umupashi wa kubukulula uwa kwa Nimrode. Lelo kuliko amasanso pa mbali ya kucincimuka kwa kutamfya inama, ukwipaya, nelyo icikombe.

Ulupungu lwa kwa Kalinda ulwa January 15, 1984, lwalanshenye umulandu Abena Kristu tabasendela nelyo ukukwata imfuti ku kubomfya ukulwisha abantunse nelyo ukucingililwa ukufuma kuli bene. (Amabula 23-8) Ukwetetula pali uko kufunda kwalitungulula Inte shimo ku kupimununa cipya cipya ku kukwata fye ne mfuti sha kulungilako. Te banono basobolapo ukupoosa imfuti shabo mu kulangulukapo konse nelyo ukusengauka ukushibika pe drowa no kufikwapo bwangu. Aba Bena Kristu muli fyo tabakapeele itontonkanyo lya kukwata icilumba mu fyanso nelyo ukucetekela muli fyene. Mu kulundapo, ukukanakwata fye ne mfuti sha kulungilako, nelyo ukukanakwata shene ku kufikwapo bwangu, kuti basengauka akayofi. Ifyanso fya kulenge mfwa te kuti fibe mu maboko ya bana abo pambi mu kukanaishiba bengacena nelyo ukwipaya umuntu umbi, nelyo ukukanakwata ifyanso mupepi nga ca kuti umuntu umbi atiinishiwa apakalamba nelyo ukupopomenwa.—Linganyeniko Amapinda 22:3.

Abena Kristu bamo kuti pambi batemwa ukununkila kwa nama ya mpanga imo nelyo isabi, kabili inshila yacilishapo ukubomba ku kukwata ifya kulya fya musango yo kupitila mu kulunga nelyo ukwipaye sabi. Bambi baipakisha umwela no kutukusho mubili ukulundanishiwa no kulunga mu mpanga, nelyo ukusanga ukuti amaawala ya mutalalila aya kwipaye sabi aya kukokolola. Baibolo tailwisha ici, takuli ukukabila kwa kupingula bambi nampo nga balaipakisha ifintu fya musango uyo nelyo iyo. Kabili ica kumwenako ca kwa Isaki na bana baume bakwe cilangilila ukuti takwaba ukukabila kwa kupanga ifikansa fya kuti ni ani akalya inama sha mpanga nelyo isabi.—Mateo 7:1-5; Abena Roma 14:4.

Umutumwa Petro mu kumonekesha alitemenwe ukwipaye sabi. Mu kuba ne sabi mupepi, Yesu wabuushiwa aafwile wene ku kubebeta ukuyumfwa kwakwe kwine pa lwe sabi nelyo ubukwebo bwa kwipaye sabi. Yesu aipwishe ukuti: “Simone, mwana Yona, bushe walintemwa ukucisha aba?”—Yohane 21:1-3, 9-15; moneni Ulupungu lwa kwa Kalinda ulwa November 1, 1988, ibula 31.

Mu kupalako, Umwina Kristu uyo muli kampingu musuma asobolapo ukuya mu kulunga nelyo ku kwipaye sabi alingile ukukwata ifiise ntanshi fyakwe mu muyano. Ku ca kumwenako, nga ca kuti iciputulwa ca nshita ica kulunga nelyo ica kwipaye sabi cili no kubako pa nshita lintu ukulongana kwa cilonganino kwatantikwa, cinshi alingile ukucita? Nelyo bushe ukulanshanya kwakwe kulangisha ukuti alakwata icilumba mu kulamuka kwakwe mu kulunga nelyo mu kwipaye sabi? Fintu cili icawamisha ku Mwina Kristu wakosoka uyo, pa tushita tumo, asobolapo ukulunga nelyo ukwipaya isabi ukuti alanda mu kuba no kushininwa ukuti: “Ee Shikulu, imwe mwaliishiba nalimutemwa [ukucila ifi fikonkelelo].”—Yohane 21:16.