Ubumi bwa kwa Yesu no Butumikishi

Ukukonkomesha Kwalundwako Ukwa Kushalikapo

YESU na batumwa bakwe bali abaipekanya ku kusha umuputule wa pa mulu. “Ifi fintu nalanda kuli imwe ukuti mwiipununa,” e fintu atwalilila. Lyene apeela ukusoka kwakakala ukuti: “Bakamutamfya mu masunagoge; lelo ikese nshita iya kuti onse uwamwipaya akatila e kubombela Lesa.”

Abatumwa mu kushininkisha bafulunganishiwa mu kushika kuli uku kusoka. Nangu cingati Yesu mu kubangilila alisosele ukuti icalo cali no kubapata, tasosele ukuti bali no kwipaiwa. “Nshasosele kuli imwe [ici] ku kutendeka,” e fintu Yesu alondolola, “ico nali pamo na imwe.” Nalyo line, fintu cili icawama ku kupekanya bene ne fi fyebo pa ntanshi talafumapo!

“Lelo nomba,” e fintu Yesu atwalilila, “ndeya ku wantumine. Kabili takuli pali imwe uulenjipusha, ati, Uleya kwi?” Mu kubangilila ubushiku, balipwishe pa lwa uko aleya, lelo nomba batenkanishiwa pa lwa fintu abeba kabili bafilwa ukwipusha mu kulundapo pa lwa ici. Nga fintu Yesu asosa: “Ubulanda bwaisa mu mitima yenu, ico nalande fi fintu kuli imwe.” Abatumwa balengwa ubulanda te pa mulandu fye baishiba ukuti bakacula ukupakaswa kwabipisha no kwipaiwa lelo pa mulandu wa kuti Shikulwibo alebasha.

E co Yesu alondolola ukuti: “Camuwamino kuti ine nje. Pantu nga nshiile, [kaafwa takese, NW] kuli imwe; lelo nga naya, [nkamutuma] kuli imwe.” Yesu kuti aba fye pa cifulo cimo pa nshita imo, lelo lintu ali mu mulu, kuti atuma kaafwa, umupashi wa mushilo uwa kwa Lesa, ku bakonshi bakwe uko konse kuntu pambi bengaba pe sonde. E co ukufumapo kwa kwa Yesu kukaba ukwa bunonshi.

Umupashi wa mushilo, e fintu Yesu asosa, “[ukashinina] aba pano isonde ulwa lubembu, no lwa bulungami, no lwa bupingushi.” Ulubembu lwa calo, ukufilwa kwa ciko ku kubelesha icitetelelo mu Mwana wa kwa Lesa, lukasansalikwa. Mu kulundapo, ukushinina kwa bulungami bwa kwa Yesu kukalangishiwa ku kunina kwakwe ukuya kuli Wishi. Kabili ukufilwa kwa kwa Satana ne calo cakwe icibifi ku kutoba bumpomfu bwa kwa Yesu bushinino bwa kuti kateka wa calo napingulwa mu kukanasenaminwa.

“Ncili na fyo ifingi ifya kusosa kuli imwe,” e fintu Yesu atwalilila, “lelo te kuti mufyumfwe nomba.” E co Yesu alaya ukuti lintu apongolola umupashi wa mushilo, uwaba maka yabomba aya kwa Lesa, ukabatungulula mu kumfwikisha kwa ifi fintu mu kumfwana na maka yabo aya kwikata fyene.

Abatumwa bafilwa ukumfwikisha ukucilisha ukuti Yesu akafwa kabili lyene ukumoneka kuli bene pa numa abuushiwa. E co baipusha umo no munankwe ukuti: “Cinshi ici atweba, ati, Kwashale nshita inono, e lyo tamwakamone; na kabili inshita imbi inono, e lyo mukamona? kabili, Ico ndeya kuli Tata?”

Yesu aishiba ukuti balefwaya ukumwipusha, e co alondolola ukuti: “Ndemwebe cine cine, nati, mukaloosha no kupumapo imisowa, lelo aba pano isonde bakasekelela; imwe mukaba no bulanda, lelo ubulanda bwenu bukaaluko kusekelela.” Icungulo kasuba cakonkelepo, lintu Yesu aipaiwa, intungulushi sha butotelo isha mu calo shasekelela, lelo abasambi balengwa ubulanda. Ubulanda bwabo bwayalulwa ukuba kusekelela, nangu cibe fyo, lintu Yesu abuushiwa! Kabili ukusekelela kwabo kwatwalilila lintu ababapeela maka pa Pentekoste ku kuba inte shakwe pa kupongolwela pali bene umupashi wa mushilo uwa kwa Lesa!

Ukulinganya imibele ya basambi kuli iyo iya mwanakashi mu kati ka kukalipwa kwa kupaapa, Yesu asosa ukuti: “Umwanakashi ilyo akomwa ne fumo aba no bulanda, ico inshita yakwe naifika.” Lelo nga fintu fye tebukisha na kabili ubucushi bwakwe lintu umwana wakwe afyalwa, Yesu alandapo ukuti: “E fyo na imwe muli no bulanda nomba; lelo nkamumona kabili [lintu nabuushiwa], ne mitima yenu ikasansamuka, no kusansamuka kwenu takuli uukamupoka.”

Ukufika pali ino nshita, abatumwa tababalile abacita ukwipusha mwi shina lya kwa Yesu. Lelo nomba asoso kuti: “Nga mukalombe cintu kuli Tata, akamupeela mwi shina lyandi. . . . Pantu Tata umwine alimutemwa, ico imwe mwalintemwa, no kutetekelo kuti ine nafumine kuli Tata. Nafumine kuli Tata, no kwisa pano isonde; kabili ndefuma pano isonde no kuya kuli Tata.”

Amashiwi ya kwa Yesu yali kukoselesha kukalamba ku batumwa. “Muli ici twatetekela ukuti mwafumine kuli Lesa,” e fintu basosa.

“Bushe, nomba mwatetekela?” e fintu Yesu aipusha. “Moneni, inshita ileisa, kabili naifika, iya kuti mukasalanganiwa umuntu onse ku mwabo, no kunsha neka.” Icishingasuminwa nga fintu cingamoneka, ici cacitika pa ntanshi ubushiku tabulapwa!

“Ifi fintu nalanda kuli imwe, ukuti mukabe no mutende muli ine,” e fintu Yesu asondwelela. “Pano isonde mumono bucushi, lelo tekeni imitima. Ine nincimfya aba pano isonde.” Yesu alicimfishe calo pa kupwishishisha mu busumino ukufwaya kwa kwa Lesa te mulandu ne cili conse cintu Satana ne calo cakwe fyaeseshe ukucita ku kutoba bumpomfu bwa kwa Yesu. Yohane 16:1-33; 13:36.

▪ Kusoka nshi ukwa kwa Yesu kwafulunganya abasambi bakwe?

▪ Mulandu nshi abatumwa bafililwa ukwipusha Yesu pa lwa uko aleya?

▪ Cinshi abatumwa ukucilisha bafilwa ukumfwikisha?

▪ Ni shani fintu Yesu alangilila ukuti imibele ya batumwa ikalulwa ukufuma ku bulanda ukuya ku kusekelela?

▪ Cinshi Yesu asosa abatumwa bakacita mu kwangufyanya?

▪ Ni shani fintu Yesu acimfya icalo?