Ukwiminina Abashangila mu Buntungwa bwa Bwina Kristu!

Ifishinka Fikalamba Ukufuma mu Abena Galatia

YEHOVA ni Lesa wa buntungwa. (2 Abena Korinti 3:17) Umwana wakwe, Yesu Kristu, asosele ukuti: “Mukeshibe cine, ne cine cikamulenga abantungwa.” (Yohane 8:32) Kabili mu kupashanya Kristu, umutumwa Paulo ashimikile imbila nsuma iya buntungwa.—Abena Roma 6:18; 8:21.

Pa kubilisha ubo bukombe bwa buntungwa, Paulo aimike ifilonganino mu Galatia (icitungu ca ciRoma mu Asia Minor) mu kati ka lwendo lwakwe ulwa kubalilapo ulwa bumishonari (47-48 C.E.). Abena Galatia balishibe ulwa kupingulapo kwe bumba litungulula ukwa kuti ukusembululwa takufwaikwa ku Bena Kristu. (Imilimo 15:22-29) Lelo abasangulo buYuda balefwaya ukubabika mu busha pa kupampamina ukuti basembululwe. E co Paulo akomaile pa buntungwa bwa Bwina Kristu muli kalata intu alembele ku Abena Galatia ukufuma ku Korinti nelyo Suria wa ku Antioke mupepi na 50-52 C.E. Ku ca kumwenako, asosele ukuti: “Buntungwa . . . Kristu atulubwilile; e ico shangileni, no kwikatwamo kabili mwi koli lya busha iyo.”—Abena Galatia 5:1.

Paulo Acingilila Ubutumwa Bwakwe

Paulo mu kubalilapo alangile ukuti ubutumwa bwakwe bwali ukupitila “kuli Yesu Kristu, na Lesa.” (1:1–2:14) Pa mulandu wa kusokolola, Paulo (mu kuba na Barnaba na Tito) baile ku Yerusalemu ukukuma ku cipusho ca kusembululwa. Kulya Yakobo, Kefa (Petro), na Yohane bapokelele ukuti apeelwe amaka ya kuba umutumwa ku nko. Kabili ilyo Petro pa numa aipaatwile ukufuma ku Bena fyalo abasumina pa Antioke pa mulandu wa kuti aletiina Abena Kristu abaYuda ukufuma ku Yerusalemu, Paulo alimwebawile.

Ukubilishiwa Uwalungama mu Nshila Nshi?

Umutumwa na kabili apeele icishinka ca maka ukuti ni ku citetekelo fye muli Yesu Kristu uuli onse engabilishiwa uwalungama. (2:15–3:29) Abena Galatia bapokelele umupashi wa kwa Lesa, te pa mulandu wa milimo ya malango, lelo pa mulandu wa kupokelela imbila nsuma mu citetekelo. Ca cine abana baume aba kwa Abrahamu balikwate citetekelo, lelo abantu umo umo abesha ukuishinina ukuba abalungama mu “kubombe fisosa Amalango bena citiipu.” Mulandu nshi? Pa mulandu wa kuti te kuti basunge Amalango mu kupwililika. Mu cituntulu, Amalango yalengele bumpulamafunde ukumoneka kabili yali “kafundisha . . . ukufika na kuli Kristu.”

Ukwiminina Abashangila!

Ukupitila mu mfwa yakwe, Kristu ‘akakwile abo abali pe samba lya malango.’ Lelo abakonshi bakwe bafwile ukwiminina abashangila mu buntungwa bwa Bwina Kristu. (4:1–6:18) E co abena Galatia bakabile ukucincintila uuli onse uwaleesha ukubabelelekela ku kupokelela ikoli lya busha. Mu kulundapo, tabali na kubomfya bubi bubi ubuntungwa bwabo lelo bali no kusuula “imilimo ya bumubili” no kulangisha ifisabo fya mupashi wa kwa Lesa. Abo abalefwaya ukubengisha mu busha ku Malango “bafwayo kutakishisha mu mubili,” ukusengauka ukupakaswa, kabili ukukwate ca kuitakishishapo. Nangu cibe fyo, Paulo alangile ukuti nangu kusembululwa nelyo kukanasembululwa te cintu. Kano, “ukulengwa cipya cipya.” Apepele umutende ne nkumbu ukuba pali Israele wa ku mupashi, abo aba uko kulengwa cipya cipya.

Kalata ya kwa Paulo ku Abena Galatia ya baafwile ukucincintila abo balefwaya ukubabika mu busha lwa ku mupashi. Shi naitwaafwe na ifwe ukulangisha ifisabo fya mupashi no kwiminina abashangila mu buntungwa bwa Bwina Kristu.

[Akabokoshi ne Cikope pe bula 23]

Inembo: “Umuntu nangu umo empamfya,” e fyalembele Paulo, “pantu ine inembo sha kwa Yesu nyenda na sho shashutikwa mu mubili wandi.” (Abena Galatia 6:17) Pa kati ka basenshi ba pa kale, abasha bashutikwe inembo ku kwishibisha bashikulwibo. Ifilembo fyalekanalekana fyaleocewa nelyo ukushutikwa mu mubili wabo. Ukwabulo kutwishika, ukucenwa kwa ku mubili ukwabipisha ukwabikilwe pa mubili wa kwa Paulo pa mulandu wa mulimo wakwe uwa Bwina Kristu kwashile ifibala fimo, ukucitilo bunte ku kutunga kwakwe ngo musha wa busumino uwa kwa Kristu, umo uwapakeswe pa mulandu Wakwe. (2 Abena Korinti 11:23-27) Ifi pambi fyali “inembo” Paulo alosesheko, nelyo kuti pambi aleibukisho ubumi aikele ngo Mwina Kristu, ukulanga ifisabo fya ku mupashi ifya kwa Lesa no kubomba ubutumikishi bwakwe.

[Icikope]

Abasha abena Roma bapatikishiwe ukubombela bashikulwibo, lelo Paulo aali musha waitemenwa uwa nsansa uwa kwa Yesu Kristu