Ukwikatana Kwalishininkishiwa Ukupitila Muli Kristu

Ifishinka Fikalamba Ukufuma mu Abena Efese

MU KUBANGILILA mu 52 C.E., umutumwa Paulo ashimikile mu Efese. Uyu musumba wa makwebo uwafumba uwa Asia Minor na o wali cifulo ca pa kati ica butotelo bwa bufi. Lelo ubuKristu bwalitemfwime mulya pa numa Paulo abwelele ku Efese, nakalimo mu mupepo wa 52/53 C.E. Apeele amalyashi ya cila bushiku mu cibansa ce sukulu no kucitilo bunte ukufuma ku ŋanda ne ŋanda mu kati ka kwikala kwakwe kumo ukwa myaka itatu.—Imilimo 19:8-10; 20:20, 21, 31.

Lintu aali umufungwa mu Roma mupepi na 60-61 C.E., Paulo alembele ku Bena Kristu ba mu Efese. Ukwikatana kabili ukupitila muli Yesu Kristu e mutwe wa kalata yakwe. Na kuba, yakwatamo ifya kuloshako 13 ifya ‘muli Kristu,’ ukucila pali kalata iili yonse intu Paulo alembele. Ukupala abena Efese, kuti twamwenamo mu mashiwi ya kwa Paulo pa lwa lubali lwa kwa Kristu, ukusengauka bucisenene no kucincintila ifimipashi fya bubifi.

Ukwikatana Mifwaile ya kwa Lesa

Ica kubalilapo, Paulo alondolwele ifyo Lesa aali no kuletako ukwikatana ukupitila muli Kristu. (1:1-23) Yehova afwaile ukulonganika ifintu fyonse mu mulu na pe sonde capamo na kabili ukupitila mu “mitekele” (NW) (inshila ya kutungulwilamo imilandu). Ukupitila muli Kristu, Lesa aali no kuikatanya umwine na abo abasalilwe ku bumi bwa mu mulu na bambi abali no kwikala pe sonde. Ilelo, Lesa alikatanya abasubwa ne “bumba likalamba,” no ‘kusonkanya ifintu fyonse pe sonde’ kukatwalilila ukufikila abo ababa mu nshishi sha cibukisho baumfwa ishiwi lya kwa Yesu no kufumamo. (Ukusokolola 7:9; Yohane 5:28, 29) Tulingile ukuba aba kutasha pa lwa ici, nge fyo Paulo fye apepele ukuti abena Efese bali no kutasha ukupayanya kwa kwa Lesa kuli bene.

Ukusakamana mu kukonkapo kwalungatikwe ku Bena Kristu Abena fyalo, abali inshita imo abafwa mu lubembu. (2:1–3:21) Ukupitila muli Kristu, Amalango yalifumishiwepo ne citendekelo calimikwe ku baYuda na Bena fyalo ukuba abaikatana no kube tempele lya kwa Lesa ilya kwikalamo umupashi. Ukulashikwa kwa kwa Paulo kwali no kwishibisha inkama yashila iya kuti Abena fyalo bali no kwisa mu kwikatana muli Kristu, ukupitila muli wene bengatununuka Lesa mu kupama. Paulo na kabili apepele abena Efese, iyi nshita ukulomba ukuti Yehova abalenge abaikashiwa mu kushangila ku citetekelo no kutemwa.

Ifya Kusangwilako Ifisumbulo Kwikatana

Paulo alangile ukuti Lesa alipeela ifya kusangwilako fikatanya. (4:1-16) Pa kati ka ifi paba umubili wa bumupashi umo uuli cilonganino. Uyu mubili ubomba mu kwikatana pe samba lya bumutwe bwa kwa Kristu. Kabili alapayanya ifya bupe mu bantu ku kwaafwa bonse kuli buumo bwa mu citetekelo.

Yehova na kabili alalenga ukucitikako ku kulangisha imibele ya Bwina Kristu iyo isumbulo kwikatana. (4:17–6:9) Pa kuba nabafwalo “buntu bupya,” Abena Kristu basengauka ukubulwa bukapepa kwa musango yo pamo nge milandile ya bucisenene. Benda mano mano, balanga umucinshi kuli Kristu, kabili balangisha ukunakila kwalinga.

Mu kulundapo, Lesa alenga Abena Kristu ukucincintile fimipashi fya bubifi ififwayo konaula ukwikatana kwesu. (6:10-24) Ifya bulwi fya ku mupashi ukufuma kuli Lesa fipayanya ukucingilila kwa musango yo. E co lekeni tufibomfye no kupepa mu mukoosha, ukusanshako abasumina banensu mu kupaapaata kwesu.

We kufunda kusuma Paulo apeele ku abena Efese! Shi natukumfwile pa kusengauka bucisenene no kucincintila ifimipashi fya bubifi. Kabili shi natutesekeshe mu kushika ukwikatana tuipakisha ukupitila muli Yesu Kristu.

[Akabokoshi ne Cikope pe bula 24]

Imifwi ya Mulilo: Ifya bulwi fya ku mupashi fisanshamo “inkwela ya citetekelo” iya kushimishako, nelyo ukutalalika ‘imifwi ya mulilo’ iya kwa Satana. (Abena Efese 6:16) Imifwi imo iyabomfiwe na bena Roma yali matete yafukulwa mu kuba ne ca kubikamo ica cela icaisushiwemo no musango wa mafuta yaleaka. Yasukwiswe ukufuma mu buta bwanenuka ku kusengauka ukushimyo mulilo, kabili ukuyashimpa mu menshi kwaingilisheko fye ubukulu bwa lubingu. Lelo inkwela ishikalamba shacingilile abashilika ukufuma ku mifwi ya musango yo, nge fyo icitetekelo muli Yehova cilenga ababomfi bakwe ‘bashimye mifwi yonse ya mulilo iya mubifi.’ Ee, icitetekelo citwaafwa ukucincintila ifintu fya musango yo pamo ngo kusanswa ku mipashi ibifi capamo na matunko ku kucite calubana, ku kusupile nshila ya bumi iya kutemwe fimoneka, no kunakila ku mwenso no kutwishika.