Sungilileni Icitetekelo Muli Lesa na Kristu
Ifishinka Fikalamba Ukufuma mu Abena Kolose
ICITETEKELO muli Yehova Lesa na Yesu Kristu calibe cacindama kwi pusukilo. Lelo ukusungilila icitetekelo ca musango yo caliba kusonsomba. Ifyo e fintu cali ku Bena Kristu mu Kolose, umusumba wabela ku kabanga ka Efese mu Asia Minor. Mulandu nshi? Pa mulandu wa kuti bakasambilisha ba bufi kulya mu cilubo baikatilile ukuti ipusukilo lyashintilile pa kusembululwa, cintu umo aliile, no kusungilila ifya kubaka fimo.
Mu kumfwika, lyene, umutumwa Paulo aali uwayangwako pa lwa busuma bwa ku mupashi ubwa Bena Kristu ba mu Kolose, kabili mu kushininkisha afwaile bene ukusungilila icitetekelo cabo muli Lesa na Kristu. E co ukulola ku mpela ya kubikwa mu cifungo ukwa kubalilapo ukwa mutumwa mu Roma (mupepi na 60-61 C.E.), alembele Abena Kolose kalata uwali no kulwisha imimwene yalubana no kukuulilila icitetekelo cabo. Natumone ifyo na ifwe twingamwenamo ukufuma ku mashiwi yakwe ayabamo ukutemwa.
Tesekesha Icifulo ca kwa Kristu
Mu kubangilila muli kalata yakwe, Paulo aebekeshe ukutesekesha ku cifulo ca kwa Yesu. (1:1–2:12) Atashishe abena Kolose ku citetekelo cabo mu kulundana na Kristu no kutemwa kwabo ku basumina banabo. Paulo alumbwile ukusumbuka kwa kwa Kristu nga Umo ukupitila muli wene ifintu fyonse fimbi fyabumbilwe, Umutwe wa cilonganino, kabili libeli ukufuma ku bafwa. Ukuwikishiwa kuli Lesa kulacitikako ukupitila muli Kristu, muli wene ifyuma fyonse ifya mano no kwishiba fyafiswa. Mu cilolwa ca fyonse ifi, Abena Kristu balingile ukutwalilila ukwenda mu kwikatana na Kristu kabili tabalingile ukuleka umo ukubapumbula nge citeyo ukupitila mu mano ya buntunse.
Ukupitila muli Kristu, Lesa afumishepo Amalango mu nshila. (2:13-23) Yapopelwe mu mampalanya pa cimuti apo Yesu afwilile. Ifikabilwa fya Malango fyali “cinshingwa fye ca fikesapona; lelo [ifya cine cine fyali fya, NW] kwa Kristu.” Pa kwikatilila kuli Kristu, tabali nakuleka umuntu ukubapusula icilambu ca bumi bwa bumunshifwa mu myulu.
Tesekesha Lesa na Kristu
Paulo mu kukonkapo acincisha abena Kolose ukufwala ubuntu bupya no kuinashisha ku bulashi bwa kwa Yesu Kristu. (3:1-17) Pa kubika imintontonkanya yabo pa fintu fili mu mulu, bali no kupeela amabuseko ya ku mupashi intanshi mu bumi. Ici cakabile ukufumyapo imibele yalubana ne milandile. Ifyo bali no kuba abapaalwa nga baifwikile abene ne mibele ya musango yo pamo nge cililishi, ubupete, no kutemwa! Umutende wa kwa Kristu wali no kulama imitima yabo nga ca kuti bacitile icili conse mwi shina lya kwa Yesu, ukutootela Lesa ukupitila muli wene.
Ukutesekesha Yehova Lesa na Yesu Kristu kulingile na kabili ukusonga ukwampana kwa Mwina Kristu na bambi. (3:18–4:18) Abakashi, abalume, abana, abasha, na bashikulwibo bali no kufikilisha imilimo yabo mu kuba na katiina ka kuli Lesa na mu kwishiba pa lwa kwa Kristu. Kabili ifyo cabe cakabilwa ukukoselela mu kupepa no kwendela mu mano!
Kalata wa kwa Paulo ku Abena Kolose kuti yatwaafwa ukusengauka ifisambilisho fya bufi ifyo fingatupusula icilambu ca bumi. Ukukomailapo kwa mutumwa pa kwishiba ubulashi bwa kwa Yehova no Mwana wakwe kuti kwakwata ukusonga kusuma mu mibombele yesu na bambi. Kabili amapaalo yafumba yalyebekeshiwa pali ifwe nga twasungilila icitetekelo cesu muli Lesa na Kristu.
[Akabokoshi ne Cikope pe bula 26]
Kalata ku Laodikea: “Ilyo kalata uyu akabelengwa muli imwe,” e fyalembele Paulo ku Abena Kolose, “lengeni abelengwe na mu [cilonganino ca, NW] bena Laodikea; kabili kalata wa mu Laodikea mubelenge na imwe.” (Abena Kolose 4:16) Laodikea wali musumba wafumba ku masamba ya Asia Minor, uwasuntinkanishiwe ne misebo mu kuba ne misumba pamo nga Filadelfia na Efese. Mu kupalishako, umulimo wa kwa Paulo pa Efese watanunwike ukufika fye na ku Laodikea, nangu cingati tatumikile kulya. Atumine kalata ku Bena Kristu abena Laodikea, nangula abasambilila bamo basumina ukuti yali ni kope uwa uyo alembele ku Abena Efese. Kalata ku Laodikea tasangwa muli Baibolo, nakalimo ni pa mulandu wa kuti takwetemo ifyebo twingakabila ilelo, nelyo nakalimo yabwekeshepo ifishinka ifyo mu kulinga fyafimbilwe mu makalata yambi aya kufunda.
[Icikope]
Ifitantala pa Laodikea