Ifipusho Ukufuma ku Babelenga

◼ Mulandu nshi ukupilibulwa kwa kwa 2 Petro 1:19 muli New World Translation of the Holy Scriptures kwapusanina ukufuma ku maBaibolo yambi?

Ukwebekesha umutengo wa cebo capuutwamo ica kwa Lesa, umutumwa Petro alembele ukuti: “E ico twakwate cebo ca kupeelako busesemo icacilapo kwikushiwa; kabili mulecita bwino mu kusakamana kuli cene nga ku nyali iilebalika umwafita, busuke buce ubushiku no lutanda lwa kasuba lutule, mu mitima yenu.”—2 Petro 1:19, NW.

Moneni ukuti ilongo lya mashiwi “busuke buce ubushiku no lutanda lwa kasuba lutule” lyaimikwa na makoma. Amabupilibulo ayengi aya Baibolo tayacita ici.

Ku ca kumwenako, Dr. James Moffatt apilibula ulubali lwa kulekelesha ulwa ici cikomo ukuti: “. . . cibalika ukupale nyali mu kati na nkati ka ncende ya mfifi; busuke buce Ubushiku no lutanda lwa kasuba lutule mu kati na nkati ka mitima yenu.” Ubupilibulo kupalo bu butungulula ku mimwene ya kuti ukutula kwa lutanda lwa kasuba kucitika mu kati na nkati ka mitima ya basumina, pamo nga ilyo lintu bakumanya umusango umo uwa kubuutushiwa kwa ku mupashi.

Nangu cibe fyo, nangu fye ni ku numa mu kasuba ka kwa Mose, kwaliko ukulangilila kwa kuti ‘ulutanda ukufuma muli Yakobo’ lwaali no kwima. (Impendwa 24:17; linganyeniko Ilumbo 89:34-37.) Yesu mu kulengama aishibisha umwine nga ubo “Ubufyashi bwa kwa Davidi, Ulutanda ulubalika ulwa lucelo.”—Ukusokolola 22:16.

Uku kwishibikwa kwa “ulutanda lwa kasuba,” nelyo ‘ulutanda lwa lucelo,’ kulinga amashiwi yashingulukako aya cintu umutumwa Petro alelandapo. Aali nalosha fye ku cimonwa ca kwaluka ico amwene imyaka imo 30 mu kubangilila. (Mateo 16:28–17:9) Ici cimonwa cabengeshima casontele ku nshita lintu Yesu aali no ‘kwisa mu bufumu bwakwe,’ nelyo ukukatamikwa mu maka ya Bufumu. Cintu Petro amwene cakomaile pa mutengo wa cebo ca kwa Lesa; mu kupalako, Abena Kristu ilelo bakabila ukupeelako kusakamana kuli ico cebo ca busesemo.

Ilintu imitima ya mutundu wa muntu mu cinkumbawile yali—kabili icili—mu mfifi, ico tacilekabila ukube fyo ku Bena Kristu ba cine. Cili kwati nabakwata inyali ilebalika mu co nga te ifyo cingabo mwafiita, imitima yabo. Petro alishibe ukuti pa kupeelako kusakamana ku cebo ca busesemo icibuutusha ica kwa Lesa, Abena Kristu baali no kutwalilila ukuba abaibukila na kabili ababutuushiwa ukufika ku kuca kwa bushiku bupya. Ico caali no kuba ni nshita lintu “ulutanda lwa kasuba,” nelyo “Ulutanda ulubalika ulwa lucelo,” mu cituntulu lwali no kuteka mu maka ya Bufumu.

Cili ca kusekesha ukuti E. W. Bullinger alembele pali 2 Petro 1:19 ukuti: “Pano, cili icaumfwika ukuti kufwile ukubako ica kwisalila, pantu cili busesemo e buli ulubuuto lubalika, kabili Kristu no kumoneka Kwakwe e lutanda lwa Kasuba no kuca kwa Bushiku. Mu kushininkisha, ubupilibulo te kuti bube bwa kuti tulekonkomeshiwa ukumfwila icebo ca busesemo ukufikila Kristu asokololwa mu mitima yesu! Iyo; lelo tuli no kumfwila mu mitima yesu ici cebo ca busesemo, ukufikila ukufikilishiwa kwaisa mu kumoneka kwa kwa Kristu—ukutula kwa Wene uwitwa ‘Ulutanda lwa Lucelo.’”—Figures of Speech Used in the Bible, 1898.

Mu kulinganako, amabupilibulo ayengi aya Baibolo yabomfya ifya kwisalila pali 2 Petro 1:19.a New World Translation of the Holy Scriptures isungilila umuyano wa kutendekelako uwa mipeelele uusangwa mu ciGreek ca kutendekelako. Lelo ibomfya amakoma pa kwimika ilongo lya mashiwi “busuke buce ubushiku no ulutanda lwa kasuba lutule” ukufuma ku kukonkomesha kwa kupeelako kusakamana ku cebo ‘nga ku nyali iilebalika umwafiita, mu mitima yenu.’

[Futunoti]