Ubumi bwa kwa Yesu no Butumikishi
Yesu Ali uwa Mweo!
LINTU abanakashi basanga inshishi ya kwa Yesu iyabulwamo akantu, Maria umwina Magadala ukwabulo kushingashinga aya ku kweba Petro na Yohane. Nangu cibe fyo, abanakashi bambi mu kushininkisha bashala pa nshishi. Mu kwangufyanya, malaika amoneka no kubalaalika ukwingila.
Muno abanakashi bamona malaika na umbi, kabili umo uwa bamalaika asosa kuli bene ukuti: “Mwitiina imwe; pantu naishibo kuti mulefwaya Yesu [uwapopelwe, NW]. Tali pano; pantu nabuuka, ifyo asosele. Iseni, mumone apaleele Shikulu. Kabili kabiyeni bwangu, kebeni abasambi bakwe, amuti, Nabuuka nafuma ku bafwa.” E co mu kuba no mwenso no buseko bukalamba, aba banakashi na bo ukwabulo kushingashinga baya.
Pali ino nshita, Maria nasanga Petro na Yohane, kabili acita lipoti kuli bene ukuti: “Nabasenda Shikulu mu nshishi, kabili tatwishibe uko bamubikile.” Apo pene abatumwa babutukilako mu kwangufyanya. Yohane alyanguka—mu kushininkisha pa kuba umwaice—kabili afika ku nshishi mu kubalilapo. Pali ino nshita abanakashi nabaya, e co takuli nangu umo uulipo. Ukuselelako, Yohane alengela mu kusakamanisha mu nshishi no kumona insalu, lelo ali ku nse.
Lintu Petro afika, tali uwashingashinga lelo aingila fye mu kati. Amona insalu shabuuta shili palya ne insalu iyabomfiwe ukupomba umutwe wa kwa Yesu nayo. Nashifunganishiwa mu cifulo cimo. Yohane na o nomba aingila mu nshishi, kabili asumima lipoti ya kwa Maria. Lelo nangu fye ni Petro nelyo Yohane tabomfwikishe ukuti Yesu nabuushiwa, nangu cingati Ali nabeba ilingi line ukuti Akabuushiwa. Abapapushiwa, aba babili babwelela ku ŋanda, lelo Maria, uyo abwelela ku nshishi, ashala.
Pali ino nshita, abanakashi bambi mu kwangufyanya baleya ku kweba abasambi ukuti Yesu nabuushiwa, nga fintu bamalaika babakambishe ukucita. Ilintu balebutuka ukufika pantu bengapeesha, Yesu abakumanya no kusoso kuti: “Mwapoleni.” Ukuwa pa nkasa shakwe, bamufukamina. Lyene Yesu atila: “Mwitiina. Kebeni bamunyinane ukuti baye ku Galili; e ko bakamona ine.”
Mu kubangilila, lintu icinkukuma cacitike na bamalaika bamoneke, ifita fyalelonda balipelenganishiwe kabili babele nga bantu bafwa. Lintu bapuupuutwike, mu kwangufyanya baile mu musumba no kweba bashimapepo bakalamba icacitike. Pa numa ya kwipushaipusha “abakalamba” abaYuda, ukupingulapo kwacitwa ukwesha ukufisa umulandu pa kupeela ifita amafisakanwa. Baebwa ukuti: “Soseni, amuti, Abasambi bakwe beshilemwibo bushiku ilyo ifwe twali mu tulo.”
Apantu ifita fya bena Roma kuti pambi bakandwa ku mfwa pa kulaala pa cifulo cabo ica ncito, bashimapepo balaya ukuti: “Nga cafika [lipoti ya kulaala kwenu] ku matwi ya kwa kateka, ifwe tukamunashanasha, no kupoosa imwe ku numa.” Apantu icipimo ca mafisakanwa cakula mu kulinga, ifita fyacita nga fintu fyaebwa. Pamo nge ca kufumamo, lipoti ya bufi pa lwa kwibwa kwa mubili wa kwa Yesu yaanana mu kusaalala pa kati ka baYuda.
Maria umwina Magadala, uushele ku numa ku nshishi, acimfiwa ku bulanda. Ni kwi Yesu engaba? Akontamako ku kulolesha mu nshishi, amona bamalaika babili mu fyabuuta, abamoneka cipya cipya! Umo naikala ku mutwe na umbi naikala ku nkasa umo umubili wa kwa Yesu waleele. “We mwanakashi, cinshi ulelilila?” e fyo baipusha.
“Pantu nabasenda Shikulu,” e fyayasuka Maria, “kabili nshiishibe uko bamubikile.” Lyene apilibuka no kumona umuntu umo uwabwekeshapo icipusho: “We mwanakashi, cinshi ulelilila?” Kabili uyu muntu na kabili aipusha ukuti: “Ni ani ulefwaya?”
Ukwelenganya uyu muntu ukuba uusakamana ibala apo nshishi yabela, amweba ukuti: “Mukwai, nga ni mwe mu musendele, munjebe uko mwamubika, na ine ndeyamusenda.”
“Maria.” e fyasosa umuntu. Kabili apo pene aishiba, mu nshila yabeleshiwa alandilamo kuli wene, ni Yesu. “Rab·boʹni!” (ukupilibula “Kasambilisha.”) e fyo apunda. Kabili mu kuba no buseko bukalamba, amwikata. Lelo Yesu asosa ukuti: “Winkumya; pantu nshilanina nje kuli Tata, lelo kabiye kuli bamunyinane, no kutila kuli bene, Ndenina ndeya kuli Tata, kabili Shinwe, kuli Lesa wandi, kabili Lesa wenu.”
Maria nomba abutukila uko abatumwa na basambi banankwe balongene. Alundapo ubulondoshi bwakwe kuli lipoti iyo abanakashi bambi kale kale bapeele pa lwa kumona Yesu wabuushiwa. Nalyo line, aba baume, abashasumine abanakashi ba kubalilapo, mu kumonekesha tabasumine Maria na o wine. Mateo 28:3-15; Marko 16:5-8; Luka 24:4-12; Yohane 20:2-18.
◆ Pa numa ya kusanga inshishi iyabulwamo akantu, cinshi Maria umwina Magadala acita, kabili cakukumanya nshi abanakashi bambi bakwata?
◆ Ni shani fintu Petro na Yohane bayankulako pa kusanga inshishi iyabulwamo akantu?
◆ Cinshi cintu abanakashi bambi bakumanya mu nshila lintu baleya mu kucita lipoti ukubuushiwa kwa kwa Yesu ku basambi?
◆ Cinshi cacitika ku mulinshi umushilika, kabili kwankulako nshi kuli lipoti yabo kuli bashimapepo?
◆ Cinshi cacitika lintu Maria umwina Magadala ali e ka pa nshishi, kabili kwankulako nshi ukwa basambi ku malipoti ya banakashi?