Ubumi bwa kwa Yesu no Butumikishi

Ku Kulyo kwa kwa Lesa

UKUPONGOLOLWA kwa mupashi wa mushilo pa Pentekoste bushininkisho bwa kuti Yesu nafika ku mulu. Icimonwa capeelwa mu kwipipa pa numa ku musambi Stefani na co cine cashininkisha ukuti Wene nafika kulya. Pa ntanshi ya kupoolwa amabwe pa mulandu wa kucitilo bunte kwakwe ukwa busumino, Stefani apundo kuti: “Moneni, ndemono mulu naucenama, no Mwana wa muntu naiminina ku kulyo kwa kwa Lesa.”

Ilintu ali ku kwa kulyo kwa kwa Lesa, Yesu alelolela ukukambisha ukufuma kuli Wishi ukuti: “Ube no bufumu mu kati ka balwani bobe.” Lelo pali ino nshita, ukufikila abuula incitilo ya kulwisha abalwani bakwe, cinshi Yesu acita? Ateka, nelyo abe mfumu, pa basambi bakwe abasubwa, ukubatungulula mu mibombele yabo iya kushimikila no kubapekanya ku kuba, ukupitila mu kubuuka, imfumu sha kubishanya nankwe mu Bufumu bwa kwa Wishi.

Ku ca kumwenako, Yesu asala Sauli (uwaishibikwa bwino pa numa kwi shina lyakwe ilya ciRoma, Paulo) ukuluminisha umulimo wa kupanga abasambi mu fyalo fimbi. Sauli ali uwapimpila Amalango ya kwa Lesa, nalyo line ali uwatungululwa bubi bubi ne ntungulushi sha butotelo isha ciYuda. Pamo nge ca kufumamo, Sauli tasuminishe fye ukwipaiwa kwa kwa Stefani lelo aya ku Damaseke mu kuba no kusuminishiwa ukufuma kuli shimapepo mukalamba Kayafa ku kuyaleta ku Yerusalemu na bakakwa abaume na banakashi abali bonse abo asanga kulya abali abakonshi ba kwa Yesu. Nangu cibe fyo, ilintu Sauli ali pa lwendo, ulubuuto lwabeeka lwabyata mu kupumikisha ukumushinguluka kabili awa pa nshi.

“Sauli, Sauli, cinshi undamatila?” e fyaipusha ishiwi ukufuma ku ntulo ishilemoneka. “Ni mwe bani, mukwai?” e fyaipusha Sauli.

“Ni ne Yesu untu iwe ulelamata,” e fyaise casuko.

Sauli, uupofwilwe ku lubuuto lwa cipesha amano, aebwa kuli Yesu ukwingila mu Damaseke no kulolela amakambisho. Lyene Yesu amoneka mu cimonwa kuli Anania, umo uwa mu basambi bakwe. Ukulosha kuli Sauli, Yesu aeba Anania ati: “Wene cipe icasalwa kuli ine ku kutwale shina lyandi pa menso ya Bena fyalo ne shamfumu, na bana ba kwa Israele bene.”

Mu cine cine, mu kuba no kutungilila kwa kwa Yesu, Sauli (uwaishibikwa nomba pamo nga Paulo) na bakabila ba mbila nsuma bambi bakwata ukutunguluka kukalamba mu mulimo wabo uwa kushimikila no kusambilisha. Na kuba, mupepi ne myaka 25 pa numa ya kumoneka kwa kwa Yesu kuli wene pa lwendo lwa kuya ku Damaseke, Paulo alemba ukuti “imbila nsuma [naibilwa] ku cibumbwa conse ca mwi samba lya mulu.”

Pa numa ya kupita kwa myaka iingi na imbi, Yesu apayanya ukukonkana kwa fimonwa ku mutumwa wakwe uwatemwikwa, Yohane. Ukupitila muli ifi fimonwa ifyo Yohane alondolola mwi buku lya Baibolo ilya Ukusokolola, wene, muli iyo nshila, aikala uwa mweo ku kumona Yesu abwela mu maka ya Bufumu. Yohane asosa ukuti “ku kupuutwamo” (NW) asendelwe ukuya ku ntanshi mu nshita ku “bushiku bwa kwa Shikulu.” Cinshi cili ubu “bushiku”?

Ukufwailisha kwabamo kusakamana ukwa masesemo ya Baibolo, ukusanshako ubusesemo bwa kwa Yesu bwine ukulosha ku nshiku sha kulekelesha, kusokolola ukuti “ubushiku bwa kwa Shikulu” bwatendeke mu mwaka wa kupanga ilyashi lya kale uwa 1914, ee, mu kati na nkati ka iyi nkulo! E co cali ni mu 1914 e lintu Yesu abwelele mu kukanamoneka, ukwabula ukulisha kwa ntandala kwa cintubwingi ukwa kusefya kabili mu kuba fye na babomfi bakwe aba busumino beka ukuba abaibukila ulwa kubwela kwakwe. Muli ulya mwaka Yehova apeele Yesu ukukambisha ukuba no bufumu mu kati ka balwani bakwe!

Ukumfwila ukukambisha kwa kwa Wishi, Yesu asangulwile imyulu ukufumyamo Satana ne fibanda fyakwe, ukufipoosa pa nshi kwi sonde. Pa numa ya kumona ici cacitika mu cimonwa, Yohane aumfwa ishiwi lya mu mulu lyabilisho kuti: “Nomba fyaise pusukilo na maka, no bufumu bwa kwa Lesa wesu, no lupaka lwa kwa Kristu wakwe.” Ee, mu 1914 Kristu atendeke ukuteka pamo nge Mfumu!

Mwandi iyi ili ni mbila nsuma kuli bakapepa ba kwa Yehova mu mulu! Bacincishiwa ukuti: “Sangalaleni, mwe myulu, na mwe baikalamo.” Lelo cinshi cili mibele kuli abo pe sonde? “Kalanda kuli imwe, mwe calo na bemba!” e fyatwalilila ishiwi lyafuma mu mulu, “pa kuti [Ciwa, NW] naikila pali imwe, ali ne cipyu cikalamba, pa kwishibo kuti ali ne nshita inono fye.”

Tuli muli iyo nshita inono fye pali nomba line. Abantu pali ndakai balepaatululwa atemwa ku kwingila mu calo cipya ica kwa Lesa nelyo ukucula ubonaushi. Icine cili ca kuti, ubuyo bobe bwine bulepimwa nomba ku fintu wankulako ku mbila nsuma iya Bufumu bwa kwa Lesa iileshimikilwa mu kusaalala kwe sonde pe samba lya butungulushi bwa kwa Kristu.

Lintu ukupaatukanya kwa bantu kwapwishishiwa, Yesu Kristu akabomba pamo nge Cibombelo ca kwa Lesa ku kufumya pe sonde imicitile ya fintu apo yapelela iya kwa Satana na bonse abo abayafwilisha. Yesu akapwishishisha ici pa kufumyapo ububifi bonse mu kulwa ukwitwa muli Baibolo Har–Magedone, nelyo Armagedone. Pa numa ya ico, Yesu, Umuntu wakulisha mu kubumbwa konse ukukonka pali Yehova Lesa wine, akekata Satana ne fibanda fyakwe no kufikaka pa myaka ikana limo mu “cilindi ca ku Mbo,” uko e kuti, imibele ya kukanabomba ukupala imfwa. Imilimo 7:55-60; 8:1-3; 9:1-19; 16:6-10; Ilumbo 110:1, 2; AbaHebere 10:12, 13; 1 Petro 3:22; Luka 22:28-30; Abena Kolose 1:13, 23; Ukusokolola 1:1, 10; 12:7-12; 16:14-16; 20:1-3; Mateo 24:14; 25:31-33.

◆ Pa numa Yesu anina ku mulu, ni kwi aikala, kabili cinshi alolela?

◆ Ni pali bani Yesu ateka pa numa ya kunina ku mulu, kabili ni shani fintu ukuteka kwakwe kumoneka?

◆ Ni lilali “ubushiku bwa kwa Shikulu” bwatendeke, kabili cinshi cacitike pa kutendeka kwa buko?

◆ Mulimo nshi uwa kupaatukanya uulelunduluka ilelo wambukila uuli onse uwa ifwe pa lwakwe, kabili ni pa cishinte nshi ukupaatukanya kulecitilwa?

◆ Lintu umulimo wa kupaatukanya wapwishishiwa, fya kuponako nshi fikakonkapo?