Ifipusho Ukufuma ku Babelenga

◼ Pali Mateo 10:21, bushe Yesu aletusoka ukuti bamunyina abengi mu cilonganino bakalukila bamunyinabo ba ku mupashi?

Iyo, ico tacili e cishinka ca kusoka kwa kwa Yesu, ukubelengwa ukuti: “Awe munyina akapeela munyina ku mfwa, na wishi akapeela mwane; na bana bakemina abafyashi, no kubepaisha.”—Mateo 10:21.

Amashiwi yashingulukako yalangilila ukuti Yesu asosele ici ku batumwa 12 ilyo alebatuma pa lwendo lwa kushimikila muli Israele. Ifingi ifya fintu asosele fyakwete ubupilibulo bwa kutendekelako ku batumwa. Ku ca kumwenako, asosele ukuti balipeelwe amaka ku kucita ukuposha kwa cipesha amano, ukutamfya ifiwa, kabili nelyo fye ukubuusha. (Mateo 10:1, 8; 11:1) Ilyashi lya kale lishininkisha ukuti te Bena Kristu bonse bapokelele amaka ya cipesha amano aya musango uyo, ukushininkisha ukuti Yesu pano alelanda kwi bumba limo ilya cine cine—abatumwa bakwe.

Nalyo line, fimo ifya fintu Yesu asosele fyalitanunwike ukucila pa lwendo lwa batumwa bakwe ulwa kushimikila. Abebele ukuti: “Lelo cenjeleni ku bantu: . . . mukatwalwa pali bakateka ne shamfumu pa mulandu wandi, ukuti mushimike ubunte pali bene na pa Bena fyalo.” (Mateo 10:17, 18) Pali lulya lwendo, aba 12 mu kupalako balilolenkene no kukaanya, lelo takwabako ubushininkisho bwa kuti balitwelwe “pali bakateka ne shamfumu” ku kupeela ubunte ku “Bena fyalo.”a Mu myaka ya pa numa, abatumwa bamoneke pa ntanshi ya bakateka, pamo nga Imfumu Herode Agrippa I na II, Sergi Pauli, Galio, kabili nelyo fye kateka Nero. (Imilimo 12:1, 2; 13:6, 7; 18:12; 25:8-12, 21; 26:1-3) E co amashiwi ya kwa Yesu yakwete ukubomba kumo.

Ukupanda amano kwa kwa Yesu kwalitwalilile mu kuba no kusoka kwa kuti: “munyina akapeela munyina ku mfwa.” Talelosha kuli bamunyina ba ku mupashi pamo fye nga fintu talelosha kuli bashibo ba ku mupashi nelyo abana ku mashiwi yakwe yakonkapo mu Mateo 10cikomo 21: “wishi akapeela mwane; na bana bakemina abafyashi, no kubepaisha.” Yesu apilibwile ukuti abatumwa baali no kwenekela ubulwani nelyo ukukaanya nangu fye ni ku bantu babo.—Mateo 10:35, 36.

Abatumwa baali no kukabila ukushipikisha pali lulya lwendo lwa kushimikila. Yesu atwalilile ukuti: “Mukaba abapatwa ku bantu bonse pa mulandu we shina lyandi; lelo uwashipikisha na ku mpela, wene akapusushiwa.—Mateo 10:22.

Fimo ifya fintu Yesu asosele pali kalya kashita fyalikwata ubupilibulo kuli ifwe nge Nte sha kwa Yehova ilelo. Ukukomailapo kwa kushimikila kwesu kwaba pa Bufumu. Tubomba ubutumikishi bwesu apa fye kabili tufwaya abantu abasekelela mu bukombe nelyo abo abawaminwa bwene. Ukucenjela kwaliba ukwalinga. Bakakaanya bengi. Inshita shimo abantu besu, abena mupalamano, nelyo abo tubomba na bo incito balenga impika shatapata, ukucilisha ku bafumaluka abaletendeka ukusupila inshila ya buKristu bwa cine. Yesu abwekeshepo ukusoka pa lwa kukaanya kwa musango uyo lintu alelondolola “icishibilo” ca kubapo kwakwe. (Mateo 24:3, 9, 10; Luka 21:16, 17) Na kabili alondolwele cipya cipya ukukabila kwesu ukwa ‘kushipikisha ukufika na ku mpela pa kupusuka.’ Ee, tulekabila ukushipikisha ukufikila impela ya bumi bwesu ubwa ndakai nelyo ukufikila iyi micitile ya fintu yapwa kabili kuti twaingila mu calo cipya.—Mateo 24:13.

[Futunoti]