Bakabilisha ba Bufumu Bacita Lipoti

Babele Abashininwa mu Kathmandu

UWAISHIBA ukulenga atendeke ukufwailisha kwakwe icine mu Brittany, France, mu 1980. Akwete ukulanshanya ne filundwa fya buPentecost kabili afwailishe amabutotelo ya ku Kabanga—ukwabula ukwikushiwa. Lyene akwete ukulanshanya kumo na umo uwa Nte sha kwa Yehova lelo mu kwangufyanya alilekele. Akumenye uwaishiba ukulenga umbi kabili atendeke ukubomba no kwikala no yo mwaume.

Mu kwipipa pa numa ya ici aba babili abashaupana bapingwilepo ukutandalila Nepal. Balyebekeshiwe apakalamba ku kuyemba no mutende ifya cilya calo lelo balilengelwe insoni ku fiputulwa fya mabumba, ifyamoneke ukuba ifya lufyengo mu mimwene ya ku Masamba.

Bashibwela fye ku France, umwanakashi atubulwile kuli uyo baleikala nankwe ukuti balesambilila Baibolo capamo, kabili ku kupapushiwa kwakwe umwaume alisumine. Baipwishe Inte untu aali nalanshanya nankwe imyaka ibili ku numa. Mu kutendekelako babomfeshe fye Baibolo, lelo mu kupelako balisumine ukubomfya icitabo ca Icine Icitungulula ku Bumi bwa Ciyayaya kabili pa numa icitabo ca Kuti Waikala Kuli Pe na pe muli Paradise Pe Sonde. Mu kati ka mwaka umo balilekele ukunwa imiti ikola.

Pa numa ya kutandalila Nepal na kabili pa myeshi ibili, aba babili babwelele ku France uko batwalilile ukusambilila. Balekele ukupeepa fwaka no kuya ku fikuulwa fya bwalwa na makalabu ya bushiku kabili batendeke ukusangwa ku kulongana kwa Nte sha kwa Yehova. Nangu cibe fyo, lintu bapwishishe ukusambilila icitabo ca Kwikala Kuli Pe na pe, bapingwilepo ukuleka ukusambilila.

Na kabili baile ku Nepal, uko baikele mu kayanda kanono pe samba lya Mpili sha Himalaya. Kasuba kamo umwaume wa cikalamba, uwafwele suti ne nkolo, akonkonseshe pa ciibi cabo. Umwanakashi aali eka mu ŋanda, kabili atontonkenye ukuti afwile ukuba umo ubomba ne fya kulenga uwaishile ku kumona ifyo balenga. Ku kupapushiwa kwakwe ali ni Nte uwalepempula ukwimininako umuntu uwasambilile na bene mu France. Mu kwangufyanya untu baleikala nankwe abwelele ku ŋanda, kabili ukulanshanya kwa maawala yabili kwalibalamwike.

Inshiku shinono pa numa, aba babili batendeke ukusangwa ku kulongana kwa Nte sha kwa Yehova mu Kathmandu kabili balyebekeshiwe ne mimonekele ya busaka iya basangilweko. Bamwene ukutemwa kwa bumunyina ne nsansa fimo fine fintu bamwene mu kulongana ku France. Na kabili bamwene ukwikatana kwa bena Nepal abalipo, nangu cingati aba bafumine mu fiputulwa fya mabumba ifyapusana. Nomba balishininwe ukuti uku kufwile ukuba kuteyanya kwa kwa Yehova.

Umweshi umo pa numa babwelele ku France kabili ilyo line fye babukulwile isambililo lyabo ilya Baibolo no kusangwa ku kulongana. Balyupene, ukutendeka ukwakana mu mulimo wa kucitilo bunte, kabili mu kupelako balibatishiwe. Umulume nomba abomba ngo mubomfi utumikila, no mukashi wakwe ilingi line alakana mu mulimo wa bupainiya bwa kwafwilisha. Mu cine cine, abo bakwata imibele yalungama iya mutima bakafwiwa ku mupashi wa kwa Yehova ukulunduluka no kuba bakapepa bakwe.—Ukusokolola 7:15-17.

[Akabokoshi/Mapu pe bula 9]

NEPAL

Ubwingi bwa Bantu - 17,712,221

Icipimo ca pa Mulu ica Bakas. ica mu 1990 - 63

Icipimo, Kasab. Umo Kuli - 281,146

Avareji wa Bakas. Bapainiya - 10

Impendwa ya Filonganino - 1

Avareji wa Masambililo ya Baibolo - 107

Abasangilwe ku Cibukisho - 220

[Mapu]

(Nga mulefwaya ukumona mapu, moneni muli magazini)

NEPAL

INDIA

[Icikope pe bula 9]

Ukumoneka kwa pa cisankano mu Kathmandu, Nepal