Cetekela mu Kuboko kwa Kupususha Ukwa kwa Yehova

“Mwe Yehova, . . . beni ukuboko kwesu akacelo na kacelo, kabili ipusukilo lyesu mu nshita ya kumanama.”—ESAYA 33:2.

1. Ni mu mano nshi Yehova akwatila ukuboko kwa bumpalume?

YEHOVA alikwata ukuboko kwa bumpalume. Kwena, apantu “Lesa Mupashi,” takwata kuboko kwa munofu. (Yohane 4:24) Muli Baibolo, ukuboko kwa mampalanya kwimininako ulupikwe lwa kutuninkisha amaka. Muli ifyo, ku kuboko kwakwe e kuntu Lesa alubwilako abantu bakwe. Mu cine cine, ‘ngo mucemi, Lesa alacema umukuni wakwe, ku kuboko kwakwe alonganya abana ba mpaanga, kabili pa cifuba cakwe abasenda.’ (Esaya 40:11; Ilumbo 23:1-4) Fintu abantu ba kwa Yehova bayumfwa aba mutelelwe mu maboko yakwe ayakwato kutemwa!—Linganyeniko Amalango 3:24.

2. Fipusho nshi pano fyawaminwa ukulangulukapo kwesu?

² Ni shani fintu ukuboko kwa kwa Yehova kwapususha abantu bakwe, mu nshita yapita ne ilipo? Kwafwilisha nshi Lesa abapeela pamo nge cilonganino? Kabili mulandu nshi abantu bakwe bengacetekela mu kuboko kwakwe ukwa kupususha mu kati ka kumanama kwabo konse?

Ukuboko kwa kwa Lesa ukwa Kupususha mu Kubomba

3. Ni kuli cinshi Amalembo yalosha ukulubulwa kwa kwa Israele ukufuma mu Egupti?

³ Pa ntanshi ya kulubula abena Israele ukufuma mu busha bwa cina Egupti imyaka 3,500 iyapitapo, Lesa aebele kasesema wakwe Mose ukuti: “Ukatile ku bana ba kwa Israele, Ni ne Yehova, nkamufumya mu kutwikwe fisendo fya bena Egupti, nkamupokolola na mu busha bwabo, no kumulubula ku kuboko kwatambikwa kabili ku fya bupingushi fikalamba.” (Ukufuma 6:6) Ukulingana no mutumwa Paulo, Lesa afumishe abena Israele mu Egupti “ku kuboko ukwatumpulwa.” (Imilimo 13:17) Abana ba kwa Kora baloseshe ukucimfya kwa Calo Calaiwa kuli Lesa, ukusoso kuti: “Te ku lupanga lwabo bapokeele icalo, kabili ukuboko kwabo takwabalengele ukucimfye nko; lelo minwe yenu ya kulyo, no kuboko kwenu, no lubuuto lwa cinso cenu, pantu mwalibabishishe.”—Ilumbo 44:3.

4. Ni shani fintu ukucetekela mu kuboko kwa kupususha ukwa kwa Yehova kwalambwilwe mu nshiku sha kubala kwa bena Ashuri?

⁴ Ukuboko kwa kwa Yehova kwaafwile abantu bakwe mu nshiku sha kubala kwa bena Ashuri. Pali ilya nshita kasesema Esaya apepele ukuti: “Mwe Yehova, tusenamineni, ni mwe tulolela; beni ukuboko kwesu akacelo na kacelo, kabili ipusukilo lyesu mu nshita ya kumanama.” (Esaya 33:2) Lilye pepo lyalyaswikwe lintu malaika wa kwa Lesa aipeye 185,000 mu nkambi ya bena Ashuri, ukutamfya Imfumu Sankeribu ukufuma ku Yerusalemu “ne nsoni pa menso.” (2 Imilandu 32:21; Esaya 37:33-37) Ukubika ukucetekela mu kuboko kwa kwa Yehova ukwa kupususha lyonse kulalambulwa.

5. Cinshi ukuboko kwa bumpalume ukwa kwa Lesa kwacitile ku Bena Kristu bapakeswe ku kupwa kwa Nkondo ya Calo iya I?

⁵ Ukuboko kwa bumpalume ukwa kwa Lesa kwapuswishe Abena Kristu basubwa ku kupwa kwa Nkondo ya Calo iya I. Mu 1918 icishinte cikalamba ice Bumba Litungulula calisanshilwe ku balwani babo, kabili bamunyina baishibikwa bwino babikilwe mu cifungo. Pa mulandu wa kukwato mwenso wa maka ya calo, abasubwa baali apepi no kuleka umulimo wabo uwa bunte. Lelo bapepelele ukupuupuutulwa kwa uko no kusangululwa ukufuma ku lubembu lwa kukanabomba no kukowela kwa mwenso. Lesa alyankwileko pa kulenga bamunyina babikilwe mu cifungo ukukakulwa, mu kuba no kulubulwa ku kupeelwa kwa mulandu ukukonkapo mu kwipipa pa numa ya ico. Pamo nge ca kufumamo ca cine calumbulwilwe pe bungano lyabo mu 1919 no kupongololwa kwa mupashi wa kwa Lesa uwa kulengo kubomba, abasubwa balipuupuutwilwe ku mulimo wabulamo umwenso kuli Yehova mu kufikilishiwa kwa kupelako ukwa kwa Yoele 2:28-32.—Ukusokolola 11:7-12.

Ukwaafwa mu Cilonganino

6. Twaishiba shani ifyo kuti cacitika ukushipikisha imibele ya fya kwesha mu cilonganino?

⁶ Ilyo Lesa aleafwilisha ukuteyanya kwakwe mu cinkumbawile, ukuboko kwakwe kulafwilisha abantu umo umo ababa muli kwene. Kwena, imibele tayaba iyapwililika mu cilonganino icili conse pantu abantunse bonse bali abashapwililika. (Abena Roma 5:12) E co ababomfi bamo aba kwa Yehova kuti pambi pa nshita shimo bakumanya imibele ya fya kwesha mu cilonganino. Ku ca kumwenako, nangu cingati Gai abombele “ica cishinka” mu kupokelela bamunyina abatandashi mu cileela, Diotrefe tabapokelele kabili aeseshe fye no kupoosa aba cileela ku nse ya cilonganino. (3 Yohane 5, 9, 10) Nangu ni fyo, Yehova alyafwile Gai na bambi ukutwalilila ukulanga icileela mu kwafwilisha umulimo wa kushimikilo Bufumu. Ukushintilila kwabamo ipepo pali Lesa kulingile ukutwaafwa ukutwalilila ukubomba imilimo ya bucishinka ilintu tulelolela wene ukulungika imibele iingalaesha pambi icitetekelo cesu.

7. Te mulandu na mibele nshi mu cilonganino ca mu Korinti Abena Kristu ba cishinka kulya bafikilishe ukuipeela kwabo kuli Lesa?

⁷ Tutile wabishenye ne cilonganino ca mu mwanda wa myaka uwa kubalilapo ica mu Korinti. Pa nshita imo, amalekano yatiinishe ukwikatana kwa ciko, kabili ukusuminisha kwa bucisenene kwabikile mu busanso umupashi wa ciko. (1 Abena Korinti 1:10, 11; 5:1-5) Abasumina batwalene ku filye fya ku calo, kabili bamo bakaansene pa milandu yalekanalekana. (1 Abena Korinti 6:1-8; 8:1-13) Ulubuli, akalumwa, ubukali, ne cimfulumfulu fyalengele ubumi ubwayafya. Bamo balitwishike nelyo fye ubulashi bwa kwa Paulo no kucefya amaka yakwe aya kulanda. (2 Abena Korinti 10:10) Nalyo line, aba cishinka ababishenye na cilya cilonganino bafikilishe ukuipeela kwabo kuli Lesa mu kati ka ilya nshita ya kwesha.

8, 9. Cinshi tulingile ukucita nga ca kuti imibele ya fya kwesha yalolenkana na ifwe mu cilonganino?

⁸ Nga ca kuti imibele imo iya fya kwesha yaimako, tulekabila ukukakatila ku bantu ba kwa Lesa. (Linganyeniko Yohane 6:66-69.) Natube abatekanya kuli umo no munankwe, ukumwensekesha ukuti cilasendela abantu bamo umo umo inshita yalepelako ukucila bambi ukufwala “ubuntu bupya” no kuifwika abene umutima wa nkumbu, icongwe, ubupete, ukunakilila, no kushishimisha. Apantu ababomfi ba kwa Lesa na kabili balipusana mu cikulilo, ifwe bonse tulakabila ukulanga ukutemwa no kuba ababelelano luse.—Abena Kolose 3:10-14.

⁹ Pa numa ya myaka iingi iya mulimo kuli Yehova, munyina umo atile: “Nga ca kuti icintu cimo calibe cacilishapo ukucindama kuli ine, caliba mulandu wa kutwalilila uwapalamina ku kuteyanya kumoneka ukwa kwa Yehova. Ica kukumanya candi ica mu kubangilila cansambilishe ifyo cabe cabipa ukushintilila pa kupelulula kwa buntunse. Lintu fye umuntontonkanya wandi wapingwilepo mu kukosa pali ico cishinka, napampamine ukwikalila ku kuteyanya kwa busumino. Ni nshila nshi imbi umo engakwatilamo ukusenamina kwa kwa Yehova ne paalo?” Bushe mu kupalako ulateesa ishuko lyobe ilya kubombela Yehova pamo na bantu bakwe aba buseko? (Ilumbo 100:2) Nga ca kuti ni fyo, tawakaleke icili conse ukukufumya ku kuteyanya kwa kwa Lesa nelyo ukonaula ukwampana kobe na Umo untu ukuboko kwakwe kupususha bonse abamutemwa.

Ukwaafwa Lintu Ukweshiwa Kwatusansa

10. (a) Ni shani fintu ipepo lyaafwa abantu ba kwa Lesa ukulolenkana no kweshiwa? (b) Kwebekesha nshi Paulo apeele pali 1 Abena Korinti 10:13?

¹⁰ Pamo nga bantu umo umo aba busumino ababishanya no kuteyanya kwa kwa Lesa, tulakwata ukwaafwa kwakwe mu kati ka nshita ya ca kwesha. Ku ca kumwenako, alatwaafwa ukusungilila bumpomfu bwesu kuli wene lintu twasanswa no kweshiwa. Kwena, tulingile ukupepa mu kumfwana na mashiwi ya kwa Yesu aya kuti: “Mwitutwala mu kweshiwa, lelo mutupokolole ku [mubifi],” Satana Ciwa. (Mateo 6:9-13) Mu cishinka, muli ifyo tuleipusha Lesa ukukanatusuminisha ukufilwa lintu twaeshiwa ukukanamumfwila. Na kabili alasuka amapepo yesu ukuti amano yacimfye ifya kwesha. (Yakobo 1:5-8) Kabili ababomfi ba kwa Yehova kuti baba abashininkisha ulwa kwaafwa kwakwe, pantu Paulo atile: “Ica kwesha tacamusanga kano ica buntuuntu fye; lelo wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na pa kufuminamo, ukuti mube na maka ya kucishipikishako.” (1 Abena Korinti 10:13) Cinshi cili intulo ya ca kwesha ca musango uyo, kabili ni shani fintu Lesa acita apa kufuminamo?

11, 12. Ni ku kweshiwa nshi abena Israele banakile, kabili ni shani fintu twingamwenamo ukufuma ku fya kukumanya fyabo?

¹¹ Ukweshiwa kwisa ukufuma ku mibele iingatubeleleka ku kuba ababulo busumino kuli Lesa. Paulo atile: “Ifi fintu fya kutusoka, ukuti twiba abakumbwe fibi, filya [abena Israele] bakumbilwe. Kabili mwiba abapepo tulubi, ifyali bamo aba muli abo; ifyo calembwa, aciti, Abantu baikele ku kulya no kunwa, e lyo baimine ku kwangala. Kabili twicita bulalelale filya bamo ba muli abo bacitile, na mu kasuba kamo bawile amakana amakumi yabili na yatatu. Kabili twiesha [Yehova, NW], filya bamo ba muli abo bamweseshe, no konaulwa ku nsoka. Kabili mwiilishanya, filya bamo ba muli bene bailishenye, no konaulwa baonawilwe ku monaushi.”—1 Abena Korinti 10:6-10.

¹² Abena Israele bakumbilwe ifibi lintu banakile ku ca kwesha ku kuba abafunuka mu kulonganika no kulya inkwale ishapayanishiwe mu cipesha amano na Lesa. (Impendwa 11:19, 20, 31-35) Mu kubangililako, babele bakapepa ba tulubi lintu ukukanabapo kwa kwa Mose kwaimishe ukweshiwa ukwingila mu kupepa kwa mwana wa ŋombe. (Ukufuma 32:1-6) Amakana balilobele pantu banakile ku kweshiwa no kucita ubulalelale na banakashi abena Moabu. (Impendwa 25:1-9) Lintu abena Israele banakile ku kweshiwa no kuilishanya pa lwa konaulwa kwa kwa Kora wa bucipondoka, Datani, Abiramu, na ba kubishanya nabo, 14,700 balilobele ukufuma ku cikuko catuminwe muli bulesa. (Impendwa 16:41-49) Kuti twamwenamo ukufuma ku fya kukumanya fya musango uyo nga ca kuti twamwensekesha ukuti nangu kumo ukwa uku kweshiwa kwali ukwakulisha ica kuti abena Israele tabali na maka ya kukucincintila. Nga balicitile fyo nga ca kuti babeleshe icitetekelo, baali aba kutasha ku kusakamana kwa kwa Lesa ukwabamo kutemwa, kabili nga ca kuti batesekeshe ukulungama kwe Funde lyakwe. Lyene ukuboko kwa kwa Yehova nga kwalibapuswishe, pamo fye nga fintu kwingatupususha.

13, 14. Ni shani fintu Yehova acita apa kufuminamo lintu ababomfi bakwe balolenkana no kweshiwa?

¹³ Pamo nga Bena Kristu, tulolenkana no kweshiwa ukwaseeka ku mutundu wa muntu. Nalyo line, kuti twatwalilila aba busumino kuli Lesa pa kupepela ukwaafwa kwakwe no kubomba ku kucincintila ukweshiwa. Lesa wa cishinka, kabili takatuleke ukweshiwa ukucila muli ico twinganasha. Nga ca kuti tuli aba cishinka kuli Yehova, tatwakatale atusanga icishingacitika ukucita ukufwaya kwakwe. Alacita apa kufuminamo pa kutukosha ukucincintila ukweshiwa. Ku ca kumwenako, lintu twapakaswa, kuti pambi twaeshiwa ukusuusukako mwi subilo lya kufyuka ukulungulushiwa nelyo imfwa. Lelo nga ca kuti tulecetekela mu kuboko kwa bumpalume ukwa kwa Yehova, ukweshiwa takubala akufika ku cipimo uko te kuti akoshe icitetekelo cesu no kutupeela ubukose bwakumanina ku kusungilila bumpomfu. Pamo nga fintu umutumwa Paulo asosele ukuti: “Monse monse tuli abacushiwa lelo abashimaninkishiwa, tuli abasanswasanswa lelo abashipelelwa, tuli abapakaswa lelo abashilekeleshiwa, tuli abafuntulwa lelo abashonaika.”—2 Abena Korinti 4:8, 9.

¹⁴ Yehova na kabili alatungilila abantu bakwe pa kubomfya umupashi wakwe pamo nge ca kulengo kwibukisha kabili kasambilisha. Ulebulula ifishinka fya mu Malembo kabili ulatwaafwa ukwiluka ifya kubomfya fyene pa kuti tucincintile ukweshiwa. (Yohane 14:26) Ababomfi ba busumino aba kwa Yehova balomfwikisha ifikansa fyabimbwamo mu kweshiwa kabili tabalufiwa mu kukonka inshila yalubana. Lesa alicita apa kufuminamo pa kubafwilisha ukushipikisha nelyo fye ukufika ku mfwa ukwabula ukunakila ku kweshiwa. (Ukusokolola 2:10) Pa mbali ya kwaafwa ababomfi bakwe ukupitila mu mupashi wakwe, Yehova abomfya bamalaika bakwe mu kwimininako ukuteyanya kwakwe.—AbaHebere 1:14.

Ukwaafwa mu Milandu ya Pa Lobe

15. Kwaafwa nshi ukwa pa lwesu pambi twingasanga mu Ulwimbo lwa Nyimbo?

¹⁵ Abo ababishanya no kuteyanya kwa kwa Yehova balikwata ukwaafwa kwakwe mu milandu ya pa lwabo. Ku ca kumwenako, bamo kuti pambi balefwaya umwina mwabo wa Bwina Kristu. (1 Abena Korinti 7:39) Nga ca kuti kuliko ukulengwe nsoni, kuti pambi cabe ca kwaafwa ukulanguluka imfumu ya kwa Israele Solomone. Afililwe ukunonka ukusuminisha kwa mukashana umwina Shulamu mu cupo pantu atemenwe kacema umupiina. Icalembwa ca mfumu ica uyu mulandu kuti pambi caitwa Ulwimbo lwa Kutemwa Kwafulunganishiwa ukwa kwa Solomone. Kuti pambi twaponye filamba nga ca kuti ukubombesha kwesu kwine ukwa cintemwa takutwele fisabo mu mulandu umo, lelo Solomone apusunswike ukulengwa kwakwe insoni, kabili e fyo na ifwe bene twingacita. Umupashi wa kwa Lesa kuti watwafwilisha ukulangisha ukuilama ne mibele imbi iya bukapepa. Icebo cakwe cilatwaafwa ukusumina icishinka iciba ilingi line ica kukalifya ica kuti umuntu te kuti akwate ukutemwa kwa cintemwa ku uli onse fye. (Ulwimbo lwa Nyimbo 2:7; 3:5) Nalyo line, Ulwimbo lwa Nyimbo lulango kuti pambi kuti cacitika ukusanga uwasumina munensu uwatutemwisha. Icacilapo kucindama, ulu “lwimbo lwacilapo” lwafikilishiwa mu kutemwa kwa Mucemi Musuma, Yesu Kristu, kuli “nabwinga” wakwe uwa bakonshi basubwa 144,000.—Ulwimbo lwa Nyimbo 1:1, NW; Ukusokolola 14:1-4; 21:2, 9; Yohane 10:14.

16. “Ubucushi mu mubili” ubo Abena Kristu baupana bakumanya kuti pambi bwasanshamo cinshi?

¹⁶ Nelyo fye abo abaupa nelyo ukuupwa ku wasumina balikwata “[ubucushi, NW] mu mubili.” (1 Abena Korinti 7:28) Kukabako amasakamika no kwangwako ukulebimbamo umulume no mukashi na bana babo. (1 Abena Korinti 7:32-35) Ukulwala kuti pambi kwaleta ifisendo no kufinininwa. Ukupakasa nelyo ubucushi bwa mu fya bunonshi pambi kuti kwacilenga icakosa kuli wishi wa Bwina Kristu ukupayanya ifya kukabila kwa bumi ifya lupwa lwakwe. Abafyashi na bana kuti pambi bapatukanishiwa ku kubikwa mu cifungo, kabili bamo kuti pambi balungulushiwa kabili nelyo fye ukwipaiwa. Lelo mu mibele yonse iya musango uyo, kuti twacincintila ukweshiwa kwa kukaana icitetekelo nga ca kuti mu cituntulu twacetekela mu kuboko kwa kupususha ukwa kwa Yehova.—Ilumbo 145:14.

17. Ni mpika nshi iya mu lupwa Lesa aafwilishe Isaki na Rebeka ukushipikisha?

¹⁷ Kuti pambi twakwata ukushipikisha ifya kwesha fimo pa nshita yalepa. Ku ca kumwenako, umwana mwaume kuti pambi alenga abafyashi ba bukapepa ukumanama pa kuupa uushasumina. Ico cacitike mu lupwa lwa cikolwe Isaki no mukashi wakwe Rebeka. Umwana mwaume wabo uwa myaka ya bukulu 40 Esau aupile abanakashi abena Hiti babili abaali “akalusha buci kuli Isaki kabili kuli Rebeka.” Na kuba, “Rebeka atile kuli Isaki, Ninengwo bunani ku mweo wandi ku cinso ca bana banakashi aba ba kwa Hete. Yakobo [umwana mwaume wabo umbi] abuulo mukashi pa bana banakashi ba kwa Hete nga aba, uwa mu bana banakashi ba bana calo, nga waba wa nshi kuli ine umweo wandi?” (Ukutendeka 26:34, 35; 27:46) Mu kumonekesha, umweo walungama uwa kwa Rebeka walilungulushiwe kuli iyi mpika yatwalilila. (Linganyeniko 2 Petro 2:7, 8.) Nalyo line, ukuboko kwa kwa Yehova kwaikatilile Isaki na Rebeka, ukubafwilisha ukushipikisha ici ca kwesha ilintu balesungilila ukwampana kwakosa na Wene.

18. Ca kwesha nshi ica pa lwakwe C. T. Russell ashipikisheko mu kuba no kwaafwa kwa kwa Lesa?

¹⁸ Cilaba ica kulenga ukumanama lintu icilundwa ca lupwa icabatishiwa catompoka mu mulimo wa kwa Lesa. (Linganyeniko 2 Timote 2:15.) Nalyo line, bamo balishipikisha nelyo fye ukulufya kwa ku mupashi ukwa mwina mwabo, pamo nge fyacitile Charles T. Russell, presidenti wa kubalilapo uwa Watch Tower Society. Umukashi wakwe aputwileko ukulundana kwakwe na Sosaite no kusho mulume mu 1897, pa numa ya mupepi ne myaka 18 iya cupo. Umwanakashi abuulile incitilo ya kupaatukana kwa mwi funde mu 1903, kabili kwalipeelwe mu 1908. Ubulanda bwa mulume bwali ubwamonekesha lintu aebele umukashi muli kalata wa mu kubangilila ukuti: “Nalipepa mu mukoosha kuli Shikulu pa mulandu wa iwe. . . . Nshakutwike icisendo ca milandu ya bulanda bwandi, atemwa ukwesha ukubalamuna ukumfwila kobe ubulanda pa kulondolola mu kulonsha inkuntu shandi, pantu ukufuma ku nshita ne nshita nsanga amalaya yobe ne fintu fimbi ifibukisha mu kulengamisha umuntontonkanya wandi ifyo wali kale—uwaisulamo nga nshi ukutemwa no kulangulukilako no kwaafwa—umupashi wa kwa Kristu. . . . Iye, shi languluka mu kubamo ipepo cintu ndi apepi no kusosa. Kabili ba uwaebekeshiwa ukuti ukukungumana kwandi ukwakalipisha, ukwambukila kwa kuko ukwashika ukwa nkuntu, te bueka bwandi bwine pa ciputulwa cashala ica lwendo lwa bumi, lelo ukuwa kobe, we mutemwikwa wandi, ukulufya kobe ukwa muyayaya, ukufika pantu ningapesha ukumona.” Te mulandu no kukalifya kwa mutima ukwa musango uyo, Russell akwete ukwafwilisha kwa kwa Lesa ukufika ku mpela ya bumi bwakwe ubwa pe sonde. (Ilumbo 116:12-15) Yehova lyonse alekatilila ababomfi bakwe aba cishinka.

Ukufuma mu Kumanama Konse

19. Cinshi cintu tulingile ukwibukisha nga ca kuti impika sha kulengo kumanama shatwalilila?

¹⁹ Abantu ba kwa Yehova balimwishiba ukuba “Lesa wa kupusushapususha,” Umo uo “ubushiku no bushiku atusenda.” (Ilumbo 68:19, 20) E ico, pamo nga bantu umo umo abaipeela ababishanya no kuteyanya kwakwe ukwa pe sonde, twinakila ku kubulwe subilo nga ca kuti impika shatwalilila. Ibukisha ukuti “Lesa aba kuli ifwe icubo kabili ubukose, mu fya kumanama asangwa ukwafwa apakalamba.” (Ilumbo 46:1) Ukucetekela kwesu muli wene lyonse kulalambulwa. “Nafwaile Yehova, na o alinjaswike,” e fyasosele Davidi, “na mu fya kunengo munsokwe fyonse alimpokolwele. . . . Umulanda uyu alililile, na o Yehova alyumfwile, no kumupususha mu fya kumanama fyakwe fyonse.”—Ilumbo 34:4-6.

20. Cipusho nshi cashalila ukulangulukwapo?

²⁰ Ee, Shifwe wa ku mulu alapususha abantu bakwe ukufuma mu fya kumanama fyonse. Alatungilila ukuteyanya kwakwe ukwa pe sonde, ukupayanya ukwaafwa mu milandu ya cilonganino na mu milandu ya pa lwabo. Mu cine cine, “Yehova takashe abantu bakwe.” (Ilumbo 94:14) Lelo natulanguluke mu kukonkapo inshila shimbi umo Yehova afwila abantu bakwe ngo muntu umo umo. Ni shani fintu Shifwe wa ku mulu atungilila ababomfi bakwe abali abalwele, abapopomenwe mintontonkanya, abakungumana pa mulandu wa kufwilwa, nelyo ukumanama pa filubo fyabo fiine? Nga fintu tuli no kumona, muli iyi milandu na yo iine, natukwata umulandu wa kushintilila pa kuboko kwa bumpalume ukwa kwa Yehova.

Kuti Waankulako Shani?

◻ Ni shani fintu ukuboko kwa kwa Yehova kwaleta ipusukilo mu nshita sha ku numa?

◻ Ni shani fintu Yehova afwa abantu bakwe mu cilonganino ilelo?

◻ Kwaafwa nshi Lesa apayanya mu milandu ya pa lwesu?

◻ Cinshi tulingile ukucita nga ca kuti impika sha kulenga ukumanama shatwalilila?

[Icikope pe bula 8, 9]

Lesa afumishe abena Israele mu Egupti “ku kuboko ukwatumpulwa”