Cita Amaboko ya Muyayaya aya kwa Yehova ica Kutungilila Cobe

“Lesa wa ciyayaya e bwikalo bobe, kabili mwi samba e mwaba amaboko ya muyayaya.”—AMALANGO 33:27, American Standard Version.

1, 2. Mulandu nshi abantu ba kwa Yehova bengabela abacetekela pa lwa kutungilila kwakwe?

YEHOVA alasakamana abantu bakwe. Pantu, mu kati ka kumanama konse ukwa bena Israele, “alimaneme”! Mu kutemwa ne cililishi, “abasendele no kubapaapa.” (Esaya 63:7-9) E co nga ca kuti tuli aba busumino kuli Lesa, kuti twaba abacetekela ulwa kutungilila kwakwe.

² Kasesema Mose atile: “Ubwikalo bobe ni Lesa wa kale, na mwi samba lyobe muli amaboko ya muyayaya!” (Amalango 33:27) Ubupilibulo bumbi busoso kuti: “Lesa wa ciyayaya e bwikalo bobe, kabili mwi samba e mwaba amaboko ya muyayaya.” (American Standard Version) Lelo ni shani fintu amaboko ya kwa Lesa yatungilila ababomfi bakwe?

Mulandu Nshi Amafya Yafulile Fyo?

3. Ni lilali lintu umutundu wa muntu uwa cumfwila ukaipakisha mu kukumanina “ubuntungwa bwa bukata bwa bana ba kwa Lesa”?

³ Ukubombela Yehova takutucingilila ku mafya ayaseeka ku bantunse bashapwililika. Umubomfi wa kwa Lesa Yobo atile: “Umuntu uwafyalwa ku mwanakashi wa nshiku shinono, kabili uwaisulamo ukutenkana.” (Yobo 14:1) Ukukuma ku “nshiku sha myaka yesu,” kemba wa malumbo atile: “Isasa lya lupi lya iko kucucutika no bucushi.” (Ilumbo 90:10) Ubumi bukaba muli iyo nshila ukufikila ‘ifibumbwa fyalubulwa ku busha bwa kubola kabili fyakwata ubuntungwa bwa bukata ubwa bana ba kwa Lesa.’ (Abena Roma 8:19-22) Ico cikacitika mu kati ka Kuteka kwa Myaka Ikana Limo ukwa kwa Kristu. Pa cishinte ce lambo lya cilubula ilya kwa Yesu, abatekwa ba buntunse aba Bufumu lyene bakakumanya ukulubulwa ukufuma ku lubembu ne mfwa. Ukufika ku mpela ya Myaka Ikana Limo, Kristu na bashimapepo imfumu ababishanya nankwe bakaba nabafwilisha umutundu wa muntu uwa cumfwila ukufika ku kupwililika, kabili abo abali aba cishinka kuli Lesa mu kati ka bwesho bwa kupelako ubwa kwa Satana ne fibanda fyakwe bakakwata amashina yabo ukulembwa mu kubelelela mwi “buku lya mweo.” (Ukusokolola 20:12-15) Lyene bakaipakisha mu kukumanina ubuntungwa bwa bukata ubwa bana ba kwa Lesa.

4. Mu cifulo ca kuilishanya pa lwa cipendwilo cesu mu bumi, cinshi tulingile ukucita?

⁴ Pali ino nshita, mu cifulo ca kuilishanya pa lwa cipendwilo cesu mu bumi, natucetekele Yehova. (1 Samwele 12:22; Yuda 16) Natube na kabili aba kutasha pali Shimapepo Mukalamba wesu, Yesu, ukupitila muli uyo twingatununukilamo Lesa “ukuti tumone uluse no kusango kusenamina ku kutwafwa pa nshita ya kukabila kwesu.” (AbaHebere 4:14-16) Tatulingile ukupala Adamu. Mu cishinka, mu cilubo apeele Yehova umulandu wa kumupeela umukashi wabipa, ukusoso kuti: “Umwanakashi uo mwampeele ukuti tube nankwe, wene e wampako ifya ku muti, na ine nalya.” (Ukutendeka 3:12) Lesa alapeela ifintu fisuma kabili taleta amafya pali ifwe. (Mateo 5:45; Yakobo 1:17) Utuyofi ilingi line ca kufumamo ca kubulwa kwesu kwine amano nelyo ifilubo fya muntu umbi. Kuti pambi na kabili fyaisa pali ifwe pantu tuli ba lubembu kabili twikala mu calo icalaala mu maka ya kwa Satana. (Amapinda 19:3; 1 Yohane 5:19) Nalyo line, amaboko ya muyayaya aya kwa Yehova lyonse yalatungilila ababomfi bakwe aba cishinka abashintilila mu kubamo ipepo pali wene no kubomfya pa lwabo ukufunda kwa Cebo cakwe.—Ilumbo 37:5; 119:105.

Abatungililwa mu Kati ka Kulwala

5. Kukoselesha nshi abalwele pambi bengasanga pa Ilumbo 41:1-3?

⁵ Ukulwala kulalenga abengi aba ifwe ukumanama pa nshita shimo shimo. Nalyo line, Davidi atile: “[Wa Nsansa, NW] uwangwo mulanda no mubusu! mu bushiku bwa bubi Yehova akamupususha. Yehova akamubaka no kumusungo wa mweo, na o akalengwo kushuka mu calo; kabili takamupeele ku kufwaya kwa balwani bakwe. Yehova amutungilila pa busanshi bwa kutembuka: ukusendama kwakwe konse mu kulwala kwakwe musangulo bumi.”—Ilumbo 41:1-3.

6, 7. Ni shani fintu Lesa aafwile Davidi lintu aali pa busanshi bwa kulwala, kabili ni shani fintu ici cingakoselesha ababomfi ba kwa Yehova ilelo?

⁶ Umuntu ulangulukilako alaafwa abali mu kukabila. “Ubushiku bwa bubi” kuti bwaba kashita akali konse akabi nelyo iciputulwa ca nshita icalepa ica bwafya icinasha umuntu. Acetekela muli Lesa ukumulinda mu kati ka kunakuka kwakwe, kabili bambi ‘bamulengo wa nsansa mu calo’ pa kwananya ilyashi lya mibombele ya kwa Yehova iya nkumbu pamo nankwe. Lesa atungilile Davidi ‘ukusendama mu kulwala,” nakalimo mu kati ka nshita ya kubombomana lintu Abishalomu umwana mwaume wa kwa Davidi afwaile ukucandilila icipuna ca kwa Israele.—2 Samwele 15:1-6.

⁷ Apantu Davidi aali nalangisha ukulangulukilako ku mulanda, ayumfwile ukuti Lesa aali no kumutungilila ilintu aali uwabulwa ukwaafwa mu busanshi bwa kulwala. (Ilumbo 18:24-26) Nangu cingati alilwele icabipisha, aali uwacetekela ukuti Lesa aali no ‘kusangula ubusanshi bwakwe,’ te pa kufumyapo mu cipesha amano ukulwala, lelo pa kumukosha mu kuba na matontonkanyo ya kusansamusha. Cali no kuba kwati Yehova aleyalula ubusanshi bwakwe ukufuma ku bwa kulwala ukuya ku bwa kupola. Mu kupalako, nga ca kuti tulecula ukulwala pamo nga babomfi ba kwa Lesa, amaboko ya muyayaya aya kwa Yehova yakatwafwilisha.

Ukusansamusha ku Bapopomenwa

8. Ni shani fintu Umwina Kristu umo umulwele alangisha ukushintilila kwakwe pali Lesa?

⁸ Ukulwala kuti pambi kwalenga ukupopomenwa kwa muntontonkanya. Umwina Kristu uwalwalisha, uyo inshita shimo abulwa ubukose bwakumanina ku kubelenga, ashimika ukuti: “Ici cilanenga ukukwata inkuntu ishingi isha kupopomenwa, ukuyumfwa kwa kubulwa ukulinga, kabili nelyo fye ifilamba.” Pa kwishiba ukuti Satana afwaya ukumufungaula ku kufuupula, alelwisha, uwaibukila ukuti mu kuba no kwaafwa kwa kwa Yehova te kuti afilwe. (Yakobo 4:7) Uyu mwaume ali ca kukoselesha kuli bambi abeshibe ukuti alecetekela muli Lesa. (Ilumbo 29:11) Nelyo fye lintu abikwa mu cipatala, alatuma lamya ku balwele kabili na kuli bambi ku kubakuulilila lwa ku mupashi. Umwine wine alakuulililwa pa kukutika ku kukopwa kwa pa makaseti ya nyimbo sha Bufumu ne fipande fya muli uyu magazini na magazini munankwe, Loleni!, na pa kubishanya na Bena Kristu banankwe. Uyu munyina atila: “Ndalanda lyonse kuli Yehova mwi pepo, ukumulomba ukumpeelako ubukose, ubutungulushi, ukusansamusha, no kwaafwa pa kushipikisha.” Nga ca kuti uli Mwina Kristu uulekumanya impika shakakala isha butuntulu bwa bumi, cetekela lyonse muli Yehova kabili lenga amaboko yakwe aya muyayaya ica kwafwilisha cobe.

9. Fya kumwenako nshi filango kuti ukupopomenwa kwa ku muntontonkanya inshita shimo kulacusha abantu ba bukapepa?

⁹ Ukupopomenwa ni mpika ya kale. Ilintu aali pe samba lya bwesho, Yobo alandile pamo ngo muntu uwaleyumfwa uwalekeleshiwa kuli Lesa. (Yobo 29:2-5) Ukwangwako pa lwa mibele yapomonwa iya Yerusalemu na malinga yakwe kwalengele Nehmia icintefwila, kabili Petro aali uwapopomenwa nga nshi pa lwa kukaana Kristu ica kuti alilishe akalanda. (Nehemia 2:1-8; Luka 22:62) Epafroditi alipopomenwe pantu Abena Kristu mu Filipi baumfwile ukuti nalwala. (Abena Filipi 2:25, 26) Ukupopomenwa kwapumine Abena Kristu bamo mu Tesalonika, pantu Paulo acincishe bamunyina kulya ‘ukukoselesha abapopomenwa.’ (1 Abena Tesalonika 5:14) E co ni shani fintu Lesa afwa abantu ba musango uyo umo umo?

10. Cinshi pambi cingabe ca kwaafwa mu kwesha ukubomba no kupopomenwa kwa muntontonkanya?

¹⁰ Ukupingulapo kwa pa lwakwe kufwile ukucitwa pa lwa kundapwa ku kupopomenwa kwabipisha.a (Abena Galatia 6:5) Ukutusha kwalinga ne mibombele yashikatala kuti pambi fyaafwa. Mu cifulo ca kumona impika shafulilako pamo ngo bubi bumo ubukalamba, umuntu wapopomenwa kuti pambi acisange ca kwaafwa ukubomba pa kupikulula shene imo pa nshita imo. Ukwaafwa kwa kusansamusha ukufuma kuli baeluda ba mu cilonganino kuti kwabo kwa kunonsha, ukucilisha nga ca kuti iyi mpika ya nkuntu ilelenga ukusakamikwa kwa ku mupashi. (Yakobo 5:13-15) Ukucila pali fyonse, cili icakatama ukushintilila pali Yehova, ‘ukubika amasakamika yesu yonse pali wene, pa kuti alatusakamana.’ Ipepo lya mukoosha kabili ilya kuyumfwa kwa ku mutima kuti lyaletela umo ‘umutende wa kwa Lesa uukalinda umutima na mapange muli Kristu Yesu.’—1 Petro 5:6-11; Abena Filipi 4:6, 7.

Yehova Alatwaafwa Ukushipikisha Ubulanda

11-13. Cinshi cingaafwa ukucefyako ukulilishika pa mfwa ya mutemwikwa?

¹¹ Ica kukumanya cimbi ica kulenga ukumanama cili ni mfwa ya mutemwikwa. Abrahamu alooseshe ukulufya kwa mukashi wakwe, Sara. (Ukutendeka 23:2) Lintu umwana wakwe Abishalomu afwile, Davidi apuminwe no bulanda. (2 Samwele 18:33) Mu cine cine, nelyo fye muntu wapwililika Yesu “alilile ifilamba” pa mfwa ya kwa cibusa wakwe Lasaro! (Yohane 11:35) E co kulabako ubulanda lintu imfwa yasenda umutemwikwa. Lelo cinshi cingaafwa ukucefyako ukulilishika kwa musango uyo?

¹² Lesa alaafwa abantu bakwe ukushipikisha ubulanda bwacishamo ubwa kufwilwa. Icebo cakwe cisosa ukuti kukabako ukubuuka. E ico, tatuba “na bulanda, filya baba na bambi abashaba na kucetekela.” (1 Abena Tesalonika 4:13; Imilimo 24:15) Umupashi wa kwa Yehova ulatwaafwa ukukwata umutende ne citetekelo no kwetetula pa nshita ya ku ntanshi iya kupapusha iyalaiwa mu Cebo cakwe, ica kuti tatucimfiwe umupwilapo na matontonkanyo ya bulanda pa lwa mutemwikwa wafwa. Icisansamushi cisa na kabili ukufuma ku kubelenga Amalembo no kupepa kuli “Lesa wa cisansamushi conse.”—2 Abena Korinti 1:3, 4; Ilumbo 68:4-6.

¹³ Kuti twasanga icisansamushi ukufuma kwi subilo lya kubuuka nge fyacitile Yobo wa bukapepa, uwabilikishe ukuti: “Iye, nga [mwe Yehova] mwambika mwansungila ku Mbo, nga mwambelamika, kukasuke akupito bukali bwenu, nga mwambikile cipope, no kunjibukisha! Umuntu uwafwa, nga engaba no mweo kabili, ninshi inshiku shonse sha kulwa kwandi kuti nalinda kukasuke akwiso kupepemuka kwandi; nga mwaita, na ine nayasuka, nga mwafuluke cacitwa ku minwe yenu.” (Yobo 14:13-15) Ukukungumana kukalamba ilingi line tatukukumanya lintu cibusa watemwikwa aya pa lwendo, pantu twenekela ukumumona na kabili. Ukushikitika kwashika uko ukulufya kwa mutemwikwa kwingalenga kuti mu nshila imo kwacefiwako nga ca kuti twalolesha pa mfwa ya Mwina Kristu wa busumino mu nshila yapalako. Nga ca kuti alikwete isubilo lya pe sonde, akashibushiwa ukufuma ku tulo twa mfwa pano pene pe sonde mu kati ka Kuteka kwa Myaka Ikana limo ukwa kwa Kristu. (Yohane 5:28, 29; Ukusokolola 20:11-13) Kabili nga ca kuti tusubila ukwikala pe sonde kuli pe na pe, kuti twaba pano ku kuposha umutemwikwa wesu uwabuushiwa.

14. Ni shani fintu bamukamfwilwa babili aba Bwina Kristu babombele ne mfwa sha balume babo?

¹⁴ Pa numa ya mfwa ya mulume wakwe, nkashi umo aishibe ukuti aali no kutwalilila no bumi bwakwe mu mulimo wa kwa Lesa. Pa mbali ya kubo wapamfiwa mu kuba no ‘kupikintika mu mulimo wa kwa Shikulu,’ apangile ica kufimba pa busanshi icakwete utupimfya twa nsalu shalekanalekana 800. (1 Abena Korinti 15:58) “Uyu wali mulimo usuma,” e fyo asosa, “pantu inshita yonse lintu nalebomba nalekutika ku nyimbo sha Bufumu na matepu ya Baibolo, ifyasungile umuntontonkanya wandi uwapamfiwa.” Ebukisha mu kutemwa ukutandala kwa kwa eluda wabelesha no mukashi wakwe. Ukufuma muli Baibolo, eluda asonteleko kuti Lesa mu cituntulu alasakamana bamukamfwilwa. (Yakobo 1:27) Umwanakashi umbi uwa Bwina Kristu tanakile ku kuyumfwilo bulanda lintu umulume wakwe afwile. Atashishe ukwafwilisha kwa fibusa kabili akwete ubuseko bwakulilako muli bambi. “Napepele imiku yafulilako no kulundulula ukwampana kwapalamisha na Yehova,” e fyo asosa. Kabili fintu cili lipaalo ukukwata ukwafwilisha kwa maboko ya muyayaya aya kwa Lesa!

Ukwaafwa Lintu Twaluba

15. Cinshi cili cikalamba ca mu mashiwi ya kwa Davidi pa Ilumbo 19:7-13?

¹⁵ Nangu cingati twalitemwa ifunde lya lwa Yehova, tulaluba pa nshita shimo. Ici ukwabula ukutwishika cilatulenga ukumanama, nga fintu cacitile Davidi, kuli uyo amalango ya kwa Lesa, ukushimika, ifya kulangulula, ne fya bupingushi fyacililepo kutemwikwa pali golde. Atile: “Umubomfi wenu e mo asokelwa; mu kufibaka e mukonke cilambu icikalamba. Ni ani engeluke fya kupumbuka kwakwe? Ku fya [kuituntumba, NW] ifyabelama ningeni uwa kaele. Kabili ku fya kutusauka lameni umubomfi wenu; mwileka fibe na bukateka pali ine: e lyo nkabo wafikapo, nkabo wa kaele ku bupulumushi bukalamba.” (Ilumbo 19:7-13) Natubebete aya mashiwi.

16. Mulandu nshi tulingile ukusengaukila ukuituntumba?

¹⁶ Ifya kuituntumba ni membu shacilishapo kubipa ukucila pa filubo. Shauli akeenwe pamo nge mfumu pa mulandu wa kupeele lambo mu kuituntumba na pa mulandu wa kutengela imfumu Agagi iya bena Amaleke ne catapwa icawamisha, nangu cingati Lesa aali nakambisha ukuti abena Amaleke bapeelwe ku konaulwa. (1 Samwele 13:8-14; 15:8-19) Imfumu Usia apuminwe ne fibashi pa mulandu wa kupokolola mu kuituntumba imilimo ya bushimapepo. (2 Imilandu 26:16-21) Lintu icipao ca cipingo caletwalwa ku Yerusalemu kabili iŋombe shaletinta iceleta shapene shiwe, Lesa apamine Usa imfwila pa mulandu wa kwikata ku Cipao ukuti cipona. (2 Samwele 6:6, 7) E co, nga ca kuti tatwishibe ica kucita nelyo nampo nga natupeelwa ubulashi bwa kucita icintu cimo, tulingile ukulangisha ukulinga no kwipusha abo abakwata umucetekanya. (Amapinda 11:2; 13:10) Kwena, nga ca kuti twalibala atuba aba kuituntumba, tulingile ukupepela ukulekelelwa no kulomba Lesa ukutwaafwa ukupempwila ku kuituntumba ku nshita ya ku ntanshi.

17. Ni shani fintu imembu shabelama shambukila umuntu, nalyo line ni shani fintu ukulekelelwa no kutauluka fingasangwa?

¹⁷ Imembu shabelama kuti shalenga ukumanama. Ukulingana na Ilumbo 32:1-5, Davidi aeseshe ukufisa ulubembu lwakwe, lelo atile: “Ilyo natalele, yalifumwike amafupa yandi mu kukuuta kwandi akasuba konse; pantu akasuba no bushiku ukuboko kwenu kwafinine pali ine; ububishi bwandi bwalyalwike mu kuuma kwati kwa lusuba.” Ukwesha ukunyantilila kampingu wakwato mulandu kwalifumwine Davidi, kabili ukushikitika kwacefesheko amaka yakwe pamo nge fyo umuti ulufya ububishi bupeela ubumi mu kati ka cilala nelyo mu cikabilila ca kuuma kwa lusuba. Mu kumonekesha aculile ifya kufumamo lwa ku muntontonkanya na lwa ku mubili kabili alufishe ubuseko pa mulandu wa kufilwa ukutumbula. Ukutumbula kweka kuli Lesa e kwali no kuleta ukulekelelwa no kutauluka. E fyasosele Davidi ukuti: “Iye, [wa nsanso, NW] muntu uo bwalekelelwo bupulumushi bwakwe, uo lwafimbwapo ulubembu lwakwe! . . . Namulengele ukwishibo lubembu lwandi, na mampuulu yandi nshafimbilepo; natile, Ndetumbulo bupulumushi bwandi kuli Yehova, e lyo imwe mwalekelele amampuulu ya lubembu lwandi.” Ukwaafwa kwabamo kutemwa ukufuma kuli baeluda ba Bwina Kristu kuti kwaafwa ukutwala pa ntanshi ukupola kwa ku mupashi.—Amapinda 28:13; Yakobo 5:13-20.

18. Bushininkisho nshi bwabako ubwa kuti ulubembu kuti lwakwata ifya kufumamo fya pa nshita yalepa, lelo cinshi cingaba intulo ya cisansamushi mu mibele ya musango uyo?

¹⁸ Ulubembu kuti pambi lwakwata ifya kufumamo fya pa nshita yalepa. E fyo lwacitile kuli Davidi, uwacitile ubucende na Bati-sheba, akolokwele imfwa ya mulume wakwe, no kuupa mukamfwilwa waimite. (2 Samwele 11:1-27) Nangu cingati Lesa alangile nkumbu pa mulandu wa cipingo ca Bufumu, ukulapila kwa kwa Davidi, ne misungile yakwe iyabamo inkumbu iya bambi, Davidi akumenye ‘ububi ukufuma mu ŋanda yakwe.’ (2 Samwele 12:1-12) Umwana wa mu bucende alifwile. Umwana mwaume wa kwa Davidi Amnone acitile ubucende bwa kwikata kama nkashi yakwe citika Tamari kabili alipaiwe pa kukambisha kwa kwa Abishalomu ndume yakwe. (2 Samwele 12:15-23; 13:1-33) Abishalomu alengele Davidi ica makankamike pa kulaala na bakanakashi ba kwa Davidi. Aeseshe ukucandilila icipuna ca bufumu lelo akumenye mfwa. (2 Samwele 15:1–18:33) Ulubembu nalyo line lwalikwata ifikonkapo. Ku ca kumwenako, ncitatubi uwatamfiwa kuti pambi alapila no kubweshiwa mu cilonganino, lelo kuti pambi casenda imyaka pa kucimfya ukushimikwa kusuma ukwakantaikwe no kushutikwa kwa nkuntu ukwisako ukufuma ku lubembu. Pali iyo nshita, fintu cili ica kusansamusha ukukwata ukulekelela kwa kwa Yehova no kwafwilisha kwa maboko yakwe aya muyayaya!

Ukupokololwa Ukufuma mu Mpatapata Shesu

19. Ni shani fintu umupashi wa kwa Lesa wingaba uwa kwaafwa lintu twaeshiwa mu kutapata?

¹⁹ Lintu twaeshiwa mu kutapata, kuti pambi twabulwa amano yakumanina no bukose ku kucita ukupingulapo no kukufikilisha. Mu mulandu wa musango uyo, umupashi wa kwa Lesa “utwafwako mu kunaka kwesu; pantu tatwaishibo kupepe fyo tufwile ukupepa, lelo umupashi wine utupaapaatila no kuteta ukushingasoswa.” (Abena Roma 8:26) Nga ca kuti Yehova aletako ukwaluka kwa mibele, tulingile ukuba aba kutasha. Nalyo line, ukuboko kwakwe kuti pambi kwatupususha mu nshila imbi. Nga ca kuti twapepela amano, Yehova kuti pambi ukupitila mu mupashi wakwe alangilila cintu tulingile ukucita no kupayanya ubukose bulekabilwa pa kucicita. (Yakobo 1:5-8) Mu kuba no kwaafwa kwakwe, kuti twashipikisha lintu ‘twalengwo bulanda ku fya kwesha ifingi’ no kupulamo mu kuba ne citetekelo caeshiwa kabili icakoshiwa.—1 Petro 1:6-8.

20. Cinshi tukaipakisha nga ca kuti mu cituntulu twacita amaboko ya muyayaya aya kwa Yehova ica kutungilila cesu?

²⁰ Twiesha ukunaka ukupilibukila kuli Lesa mwi pepo. “Amenso yandi nalosha pe kuli Yehova; pantu wene amfumya amakasa mu citeyo,” e fyasosele Davidi. “Alukileni kuli ine, no kumbelelo luse; pantu ndi neka, kabili ndi mulanda. Nasheni ukumanama kwandi kwa mutima wandi; na mu mpatapata mfumyenimo. Moneni ukucula kwandi no kucucutika kwandi, no kulekelele membu shandi shonse.” (Ilumbo 25:15-18) Ukupala Davidi, tukaipakisha ukulubulwa kwa bulesa, ukusenamina, no kulekelelwa nga ca kuti mu cituntulu twacita amaboko ya muyayaya aya kwa Yehova ica kutungilila cesu.

[Amafutunoti]

Kuti Waankulako Shani?

◻ Ni shani fintu Yehova aafwa ababomfi bakwe abalwele?

◻ Cinshi cingaba pambi ica kwaafwa lintu tuleesha ukubomba no kupopomenwa kwa muntontonkanya?

◻ Cinshi cingaafwa ukucefyako ubulanda pa mfwa ya mutemwikwa?

◻ Ni shani fintu abo abafisa imembu shabo bengakwata ukutauluka?

◻ Kwaafwa nshi kwabako lintu abantu ba kwa Yehova baeshiwa mu kutapata?

[Icikope pe bula 16, 17]

Kuti twakwata icisansamushi ukufuma kwi subilo lya kubuuka nge fyacitile Yobo uwa bukapepa