Bupapa—Bwatendekwe na Kristu?

“PA kati ka kwa Petro, Shikofu wa kubalilapo uwa Roma, kabili papa wesu uwa ndakai, John Paul II, paba umutande walepa uwa bapapa bapulamo—ukucila pali 260, mu cituntulu.” E fisosa icilundwa ca butotelo bwa ciKatolika Anthony Foy muli The Southern Cross, magazini wa cila mulungu uwa ciKatolika uwa ku Africa wa ku kapinda ka ku kulyo. Atwalilila ukuti: “Ni kuli uyu mutande wa mutatakuya uwa bapapa uko twingasonta mu kubamo kucetekela, lintu twaipushiwa ukushininkisha ukuti Icalici lya ciKatolika lyaimikwe na Yesu Kristu.”

Bushe mu kucetekela kuti casoswa ukuti uyu mutande walepa uwa bapapa watendeke no mutumwa Petro? Ukulingana no kusambilila kwa fya butotelo ukwa ciKatolika, bapapa bane, Lini, Anacletus, Clement I, na Evaristus, balandwa nga bapyene Petro ukufika ku mwaka wa 100 C.E. Baibolo ilalumbula Umwina Kristu uwe shina lya Lini uwaikele mu Roma. (2 Timote 4:21) Nangu cibe ifyo, takwaba icili conse icitubulula ukuti Lini, nelyo uuli onse umbi, aali ni mpyani ya bupapa kuli Petro. Umutumwa Yohane, uwalembele amabuku yasano aya Baibolo mwi kumi lya myaka ilya kulekeleshako ilya mu mwanda wa myaka uwa kubalilapo, tacitile ukuloshako ku uli onse uwa betwa impyani sha kwa Petro. Mu cine cine, nga ca kuti kwali impyani ya kwa Petro, bushe ukusala kwabamo ukupelulula nga takwali ni Yohane wine?

Ukulosha ku kutunga kwa kuti Petro aali e shikofu wa kubalilapo uwa Roma, takwaba ubushinino bwa kuti alitandalile nelyo fye ulya musumba. Na kuba, Petro umwine wine alondolola ukuti alembele kalata wakwe uwa kubalilapo ukufuma mu Babiloni. (1 Petro 5:13) Ukupaasha kwa ciKatolika ukwa kuti Petro abomfeshe “Babiloni” nge ca kuloshako ca nkama kuli Roma tacakwata apa kushintilila. Babiloni wa cine cine eko aali mu kasuba ka kwa Petro. Mu kulundapo, Babiloni alikwete ubwikashi bwa ciYuda ubwalinga. Apantu Yesu apeele Petro umulimo wa kutontomesha ukusakamana kwa kusambilisha kwakwe pa baYuda basembululwa, cilimo ukupelulula ukusumina ukuti Petro atandalile Babiloni kuli iyi mifwaile.—Abena Galatia 2:9.

Mona, na kabili, ukuti Petro tabalile alosha ku mwine eka pamo nge cili conse ukucila pa kuba umo uwa batumwa ba kwa Kristu. (2 Petro 1:1) Takwaba apali ponse muli Baibolo pantu etwa “Tata wa Mushilo,” “Pontiff Wapulamo,” nelyo “Papa” (iciLatin, papa, inumbwilo ya citemwishi iya “Tata”). Mu cifulo ca ico, mu kuicefya akakatile ku mashiwi ya kwa Yesu pali Mateo 23:9, 10: “Kabili mwiita uwa pano isonde, Tata; pantu Shinwe umo, uwa mu mulu; nangu kwitwa Intungulushi, pantu intungulushi yenu imo, ni Kristu.” Petro tapokelele ukushinshimunwa. Lintu mushika wa fita uwa ciRoma Korneli “awile pa makasa yakwe, no kumupepa. . . . Petro alimwimishe, ati, Ima, na ine wine ndi muntunse.”—Imilimo 10:25, 26.

Ukulosha kuli bapapa 260 abatungwa, shimapepo Foy asumina ukuti: “Abengi baba abashawaminwa ubulashi bwabo ubwa pa mulu.” Mu kwesha ukulungike ci, New Catholic Encylopedia ilondolola ukuti: “Icali icacindama ku mifwaile ya kamfulumende cali bulashi, kabili te musango wa pa lwakwe uwa kwa papa pamo ngo muntu umo umo. Kuti pambi pa lwakwe aali umutakatifu, nelyo uwa cipimo ca pa kati, nelyo fye umubi.” Lelo bushe ulesumina ukuti Kristu kuti abomfya abantu ba musango uyo ukumwimininako?

Mu mulandu uuli onse, ukutunga kwakosa ukwa kuti bupapa bwatendekwe na Yesu takwafwilishiwa muli Baibolo. Ukulingana na Encylopedia of Religion, nangu fye basambi ba ciKatolika aba muno nshiku balasumina ukuti “takwaba ubushinino bwa mu kulungatika ubwa muli Baibolo ubwa kuti Yesu aimike bupapa pamo ngo bulashi bubelelela mu kati na nkati ke calici.”