Ukulobolola Bakapepa

UMUTUMWA Yohane apeelwe icimonwa ca fya kuponako fya kutenshe calo ifyo ifyali no kucitika “mu bushiku bwa kwa Shikulu.” Amwene Shikulu wa mu mulu Yesu Kristu aleya ku bulwi bwa bulungami, ubucitwe cikope na kabalwe wabuuta—“alecimfya kabili ku kuyacimfya.” Icintu ca ntanshi ico acita kupoosa umulwani mukalamba uwa kwa Lesa, Satana, ukufuma mu myulu ukupooswa ku bwina mupalamano bwa ili sonde. Satana aankulako pa kupama umutundu wa muntu mu kuba no kwipayaulula kushabalile akutangililwa, icipowe, no bulwele, ifyacitilwako icikope ku banina pali bakabalwe ba cimpashanya na bakabalwe babo—mu musango wakashika, uwafiita, no wabuutuluka. (Ukusokolola 1:10; 6:1-8; 12:9-12) Aya malanda yapuukile intanshi mu mwaka wa 1914 kabili yalisumbana ukutula ilya nshita. Mu kwipipa, yakafishiwa pa kalume ku cintu Yesu alondolwele pamo nga “ubucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.”—Mateo 24:3-8, 21.

Ni shani fintu bakapepa ba kwa Yehova bakabomba pali ilya nshita? Ukusokolola icipandwa 7, ifikomo 1 ukufika ku 10, kulanda pa lwa milalo ya bamalaika “bekete” imyela ya bonaushi ukufikila aba bakapepa balonganikwa. Mu kati ka ciputulwa ca nshita ukutula mu 1914, aba kulekeleshako pe sonde aba kwa Israele wa ku mupashi, ababa impendwa 144,000, balalonganikwa. Kabili lyene “moneni, kwali ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na bantu na ba ndimi.” Ili bumba likalamba kale kale lyafika mu mamilioni. Beminina abasuminishiwa pa ntanshi ya cipuna ca kwa Lesa pa mulandu wa kubelesha icitetekelo mu mulopa wa kwa Yesu uukonsolwela, uwaipaiwe nge mpaanga ya kaele. “Kabili balebilikishe shiwi likalamba, abati, Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” Aba bakapepa bapimpa batwalilila ukusoso kuti “Iseni,” kuli bambi na bo, abo mu kukonkapo balonganikwa kwi pusukilo ukupula mu “Bucushi bukalamba.”—Ukusokolola 7:14-17; 22:17.

“Pano nse Ponse”

Ku lwa aba bakapepa baipeela, kuti casoswa ukuti: “Icebo cabo cafumine caya pano nse ponse, ne fyebo fyabo fyaya ku mpela sha calo.” (Abena Roma 10:18) Umulimo wabo uwakosa walipaalwa mu kuba ne fisabo fya kupapusha. Ku ca kumwenako:

Mexico nomba icita lipoti bakapepa bacincila aba kwa Yehova 335,965, ukwingilishiwako kwa makana mupepi no mwanda umo mu myaka fye itatu! Mulandu nshi ukutanunuka kwakula ifyo? Ubulondoloshi bwakonkapo kuti bwaafwa ukulondolola. Umulumendo uwe shina lya Aurelio aali ni sakristani mu calici lya Katolika. Inshita iili yonse Inte sha kwa Yehova baishile mu mushi ulya, alishishe inyenjele sha mwi calici ku kufuupula uuli onse ukufuma ku kukutika kuli bene. Mu kupita kwa nshita ashitile Jerusalem Bible iya ciKatolika no kutendeka ukuibelenga, lelo tayumfwikishe. Lyene kasuba kamo amwene cibusa wakwe na kope wa New World Translation mu kuboko kwakwe. Aurelio ashimawile cibusa wakwe kabili, ukumweba ukuti Baibolo yakwe yali iya bufi, amusendele ku mwakwe ku kumulanga Baibolo ya “cine cine.” Cibusa wakwe asosele ukuti: “Belenga Ukufuma 20,” kabili lyene aliile.

Ukutampa ne cipandwa 1, sakristani abelengele ukupulinkana Ukufuma ukufikila pa cipandwa 20, ifikomo 4 na 5. Alitulumushiwe pa cintu Baibolo yakwe iya ciKatolika yasosele pa lwa fimpashanya. Pa numa ya Minsa pa bushiku bwa pa Mulungu ubwakonkelepo, alolenkene na shimapepo mu kuba na malembo pa lwa fimpashanya. Pa kubalilapo shimapepo asosele ukuti wene umwine aleshinshimuna fye ifimpashanya; talefipepa. Pa kumona ukuti ici tacaikwishe Aurelio, shimapepo amupeele umulandu wa kusambilila ne Nte sha kwa Yehova. Aurelio alikeene ici lelo alundilepo ukuti, “Nomba nkatendeko kusambilila nabo!”

Inshita yakonkelepo Inte baishile mu mushi, Aurelio alikumene nabo no kutendeka ukusambilila Baibolo na bene. Alekele ukubomba mwi calici kabili mu myeshi itatu alifikilepo ku kwakana mu butumikishi bwa cintubwingi ne Nte sha kwa Yehova. Iŋanda ya kubalilapo atandalile ni iyo iya kwa shimapepo, uushashininkishe lintu amwene uwali kale sakristani mu mulimo wa kwa kashimikila wa Bufumu. Shimapepo amupeele cintiinya ca kumufumya mwi calici, lelo Aurelio amwebele ukuti ici tacali na kubomba apo kale kale aali nafuma mwi calici. Inshila yakwe iyashipa yakoseleshe abengi aba mu mushi abo kale kale balesambilila ne Nte sha kwa Yehova. Aurelio na bambi 21 ukufuma muli uyo mushi balibatishiwe pe bungano lya citungu ilyakonkelepo. Ukukula muli iyi ncende kuli ukwacilapo ukwangufyanya ica kuti mwali fye eluda umo uwa kupitulukamo na ili ibumba amepusho ya baleya ku lubatisho.

“Icebo Cabo Cafumine Caya”

Takwaba kufyuka ukufuma ku kushimikila kwa Bufumu. Katolika umwina Italy alekalifiwa ilyo lyonse Inte sha kwa Yehova bamutandalile. E co lintu akampani kakwe kamukuushishe ku Singapore, ayumfwile ukuti mu kupelako tali na kucushiwa na bene. Lelo ku kupapushiwa kwakwe, Inte e ko bali kulya na ko. E co afwaile imbwa shibili ishikali ukusansa Inte abali no kwisa mu kukonkapo. Lintu Inte shibili batandalile ku mwakwe, isho mbwa shalifumine. Abatiinishiwa, abanakashi balibutwike ku kupususho bumi bwabo, ukupasangana pa masansa ya musebo. Ilintu imo iya mbwa yamusangile, umo uwa Nte mu kupelelwa afumpwile amabroshuwa yabili mu cola cakwe no kuyapakinkisha mu kanwa ka mbwa akaceneme. Pali ici, yalekele ukumutamfya, yapilibuka, no kutolauka ukuya ku ŋanda.

Umulungu wakonkelepo, Inte shibili bamo bene balecita ifipempu fya kubwelelamo pa ŋanda ukucilinganya umusebo. Umwine wa mbwa aali mwi bala lyakwe, kabili, ku ca kupapusha, aposeshe abanakashi no kubalaalika ukwingila mu ŋanda yakwe. Abebele ukuti tabalile alanda ne Nte sha kwa Yehova nelyo ukubelenga ishili shonse isha mpapulo shabo. Lelo alipapushiwe ukusanga amabroshuwa mu kanwa ka imo iya mbwa shakwe. Cilya cungulo bushiku aali nabelenga amabroshuwa kabili alyebekeshiwe mu cine cine na yene. Nangu cingati aali ni Katolika ubumi bwakwe bonse, alumbulwile ukufwaisha kwa kusambilila Baibolo ne Nte sha kwa Yehova.

Apantu uyu mwaume aali no kukuushiwa ukubwelelamo ku Italy, ukutantika kwalicitilwe ku Nte sha kwa Yehova ukusambilila na wene kulya. Ilyo wene no mukashi wakwe batendeke ukusangwa ku kulongana, shimapepo wa mu citungu mu kukalifiwa alolenkene nabo mu kuba ne fintiinya. Lintu umuntu umo aocele ibala lyabo, aba abaupana babili baputwile ifikakilo fyonse ne calici. Uyu mwaume nomba asoso kuti: “Nalicitilo bunte kale kale ku bengi aba filundwa fya lupwa lwandi pantu ndefwaya mbeshibishe ukuti Yehova e Lesa wa cine eka.”

“Ku Mpela sha Calo”

Ica kukumanya cimbi ukufuma ku mpela sha calo cilanga ifyo ubukombe bwa Bufumu butesekeshiwa no kwaafwa ku kwalula ubumi. Ilintu alesangwa kwi kalasi lya pa ntanshi ya kupaapa, Nte mu Australia akumenye umwanakashi uwakwete ifibelesho fyabipa ifingi, uwakeene fye no kuleka ukupeepa fwaka pa nshita lintu aali pa bukulu. Nte aali uwafulunganishiwa nga nshi ku mibele yakwe. Casangilwe ukuti bonse bapaapile pa nshita imo ine kabili mu muputule wa cipatala umo wine, e co balikwete ishuko lya kulanshanya. Camoneke ukuti umwanakashi alikwete impika ishingi pa nshita ya bwaice bwakwe, kabili nomba icupo cakwe cali pa nembenembe ya kutobeka. E co, pa numa ya kufuma mu cipatala, Nte atandalile umwanakashi no kutendeka isambililo lya Baibolo na wene, ukubomfya icitabo ca Ukulenga Ubumi bwa Lupwa Lobe ubwa Nsansa.

Umulume wa mwanakashi alepepa kuli Lesa ukuti asange ubutotelo bwa cine, ukusanshapo icipope ca kuti: “Cikulu fye tabuli bwa Nte sha kwa Yehova!” Nangu ni fyo, lintu aishibe ukuti umukashi wakwe alesambilila ne Nte, atendeke ukwipusha ifipusho kabili alilaalikwe ukuilunda kwi sambililo. Aliilundileko, kabili mu kwangufyanya atendeke ukusangwa ku kulongana kwa cilonganino. Nomba, bonse pamo umulume no mukashi balibatishiwa, kabili mu kushininkisha imibele yabo iya mu cupo yaliwaminako apakalamba.

Amasambililo ya Baibolo aya mu ŋanda ayashimpwa pa fitabo fya musango yo yalifumamo ukulonganikwa kwa bakapepa abengi abapya. Mu fyalo umo Inte sha kwa Yehova shalolenkana na bumwaluka, inkondo ya bana calo, nelyo ifibindo fya kamfulumende, imibombele ye sambililo lya Baibolo ilya mu ŋanda yalingilishiwako. Inkondo ya bana calo yalwikilwe mu Angola pa myaka iingi, kabili Inte baculile ukupakaswa ukwingi na mafya. Mu kubangilila kwa mwaka wapwile, amalipoti yalangilile ukuti, pali avareji, kasabankanya umo umo aletungulula mupepi na masambililo ya Baibolo aya mu ŋanda yatatu, lelo bakasabankanya bakwete ifitabo fya Baibolo ifinono. Bakangalila benda batandalile ibumba linono cila kasuba, ukupekanya umulimo wa mwi bala mu nshita ya kasuba no kulongana cila cungulo bushiku. Mwandi bwali buseko lintu ubulwani bwapwile kabili ne fitabo fyakabilwe apakalamba ifya Baibolo amatani 42 fyafikile ukufuma ku South Africa! Mu cine cine, ukutemwa kwa abo bamunyina “kupake ukucilamo no kucilamo mu kushininkisha no kwishiba konse,” nge fyo nomba bali na maka ya “kushininkishe ifintu fyacilapo ukucindama,” (NW). (Abena Filipi 1:9, 10) Mwandi ca kukoselesha kuli abo abakwata ifya kwafwilisha ukusambilila Baibolo ifingi ukushukila mu kukumanina ukupayanya uko Yehova apeela mu cikuuku!—1 Timote 4:15, 16.

Insansa sha aba bakapepa ba busumino shitwibukisha pa lwa mashiwi ya kwa Yesu mu Lyashi lya pa Lupili ukuti: “[Ba nsansa, NW] ababusu mu mitima; pantu ubufumu bwa mu mulu bwabo. . . . [Ba nsansa, NW] abalamatilwa pa mulandu wa bulungami; pantu ubufumu bwa mu mulu bwabo. . . . Sekeleleni no kwanga, pantu icilambu cenu cikalamba mu mulu.” (Mateo 5:3-12) We kulobolola uko kale kale kulelonganikwa mu Angola!

Mu ncende shimbi isha calo, ifibindo pa mibombele ya Nte sha kwa Yehova na fyo fileilululwa nelyo ukufumishiwapo. Yesu alilandilepo mu kasuba kakwe ukuti: “Ukulobolola kwena kukalamba, lelo ababomfi nabacepa.” (Mateo 9:37) Ifyo ici cili ca cine ilelo! Ukukabila kwa babomfi bafulilako lyonse e po kwaba. Tuli aba buseko ukuti ukupepa kwesu kusanshamo ukulonganika mu kulobolola. Takwaba buseko bwacilapo ubwingasangwa pe sonde ilelo ukucila umulimo wesu uuletako ifisabo uwa kuipeela kuli Yehova Lesa.

Cinshi lyene, nangu ni fyo, icikunta bakapepa ba kwa Yehova ukulanga ubuseko bwa musango yo no kupimpa? Twalamona.