Bakabilisha ba Bufumu Bacita Lipoti
Ukufimba Icifulo ca Kubombelamo Icaba Ceka mu Paraguay Kwatwale Fisabo
UMUSAMBO wa Paraguay uwa Watch Tower Society waliba uwaibukila mu kukumanina ulwa kukabila kwa kushimikila imbila nsuma ya Bufumu mu cifulo ca kubombelamo ica uko conse. (Imilimo 1:8) Ino ili ni nshita kuli bonse ukusambilila pa lwa Bufumu no kubombela Yehova ilyo talaleta impela kuli iyi micitile ibifi mu “bucushi bukalamba” ubuleisa. (Mateo 24:21, 22) Ifya kukumanya fyakonkapo filelanga icilecitwa ku kwaafwa abantu mu fifulo fya kubombelamo ifishapeelwa. Umusambo wacita lipoti ukuti:
Ukutantika kwalicitilwe ukufimba icifulo ca kubombelamo icishapeelwa conse ukupitila muli bapainiya baibela aba pa kashita kanono. Mu kati ka myeshi ya November ukupulinkana ukufika mu January iya mwaka wa mulimo uwa 1990, bamunyina 39 na bankashi bafimbile ubwingi bonse ubwa misumba umwanda umo na matauni yanono uko kucili kushilaba bakasabankanya ba Bufumu. Baali na maka ya kwananya ifitabo 6,119, ututabo 4,262, na bamagazini 5,144. Nge ca kufumamo ca iyi mibombele, amabumba yapya aya bakasabankanya yalepangwa.
◻ Umwanakashi apokelele ukufuma kuli nkashi painiya uwalebomba mu cifulo ca kubombelamo icishapeelwa icitabo ca Kuti Waikala Kuli Pe na pe muli Paradise Pe Sonde. Painiya atambike ukutungulula isambililo lya Baibolo ku mwanakashi, kabili mu nsansa alisumine. Lintu painiya abweleleko, te namayo fye eka walemulolela lelo no mulume wakwe na bana babo ikumi. Pa kutandala kwakonkelepo, ulupwa capamo ne fibusa fyabo na bena mupalamo baali abaipekanya kwi sambililo lya Baibolo! Umwanakashi alibalaalike, ukusoso kuti isambililo lyali ilisuma nga nshi no kuti isubilo na mapaalo ifyo Yehova apeela fyali ifyawamisha. Ici cali icintu cimo ico tapali uuli onse uwabalile amwebapo kale, e co ayumfwile ifyo abena mupalamano bakwe ne fibusa balingile nabo bene ukumfwa iyi mbila nsuma.
Lyonse lintu painiya aletungulule sambililo, kwalesangwako abengi ica kuti camoneke kwati cilonganino icinono. Aba bantu ba kusekelela baleipusha ifipusho ifingi no kwakanamo mwi sambililo. Lintu painiya alondolwele ukuti nga icifulo ca kubombelamo cafimbwa, aali no kufumako na banankwe ukuya ku ncende ipya, namayo mu kusakamikwa aipwishe icali no kucitika kuli bene. Ukutantika kwalicitilwe na bamunyina ukufuma ku cilonganino capalamishe ukutwalilila isambililo. Nomba bapainiya baibela balitumwa ku kwaafwa aba bantu ba kusekelela, abapale mpaanga.
◻ Ilintu aleya ukufuma ku ŋanda ne ŋanda mu cifulo ca kubombelamo icishapeelwa na cimbi, nkashi painiya asangile umwaume uyo imyaka ikumi ku numa apokelele icitabo ca Icine Icitungulula ku Bumi bwa Ciyayaya. Ukutule yo nshita alilufishe ukukumana konse ne Nte sha kwa Yehova. Nangu cibe fyo, alishibe ukuti Yehova, untu aitile Yehova wa milalo, e Lesa eka uwa cine no kuti Wene eka eulingile ukupepwa. Mu kuitendekelako, alelanda pa lwa kwa Yehova kuli bonse abo aishibe. Na kuba, cila mulungu aleenda amakilomita yatatu ku kuyatandalila abaupana babili abalesekelela ku kulanda kuli bene pa lwa kwa Lesa pa mulandu wa kuti, nga fintu acibikile, ‘Nga naleka ukubatandalila, bakalaba pa lwa kwa Yehova.’ Ukulunda kuli aba babili abaupana, kwaliko bambi mupepi ne kumi abalefwaya isambililo lya Baibolo—conse pa mulandu wa kuti uyu muntu wa kusekelela alishimikile kuli bene.
Ku ca kupapusha, inshiku fye shinono pa ntanshi painiya talamutandalila, uyu mwaume umo wine taali no kusuminisha shimapepo wa cikaya no mulongo wakwe uwa kusefya ukwingila mu ŋanda mu kuba ne cipasho ca kwa nacisungu, ukulondololo kuti tasumine mu fipasho. Shimapepo alikalipe. Bulya bushiku umwaume apepele kuli Yehova ku kwaafwa. E co elenganya fintu aali uwacincimushiwa kabili uwa nsansa lintu painiya atandele! Ukutantika kwalicitilwe ilyo line ukwe sambililo lya Baibolo ilyateyanishiwa bwino, kabili umwaume atwalilila ukulunduluka mu kubishanya no kuteyanya kwa teokratiki.
Mu cine cine, Yehova alepaala umulimo wa kulonganika mu Paraguay ilyo bamunyina baletukuta ukupeela ubunte bwashimikisha muli ishi ncende sha kubombelamo ishishapeelwa.—Mateo 24:14.