Iseni kwi Bungano lya Citungu Ilya “Bakasenda ba Lubuuto”
“MONA, imfifi ikafimba pano isonde, ne kumbi ilyafitula pa bantu na bantu.” (Esaya 60:2) Fintu yaba aya cine ayo mashiwi ilelo! Ukwabula ukutwishika, ubutotelo bwa bufi bulesungilila abantu mu mfifi ukulosha ku musango wa kupepa uutemuna Lesa. Mulandu nshi? Pantu Satana, umulungu wa ino micitile ya fintu, “[apofwisha] imitima ya bashitetekela.”—2 Abena Korinti 4:4.
Inte sha kwa Yehova balipusanako apakalamba na abo abapofushiwa na Satana. Kuli bene kuti kwabomfiwa amashiwi ya kwa kasesema Esaya aya kuti: “Yehova akesa pali iwe, ubukata bwakwe bukamonekela pali iwe.” (Esaya 60:2) Fintu baba aba kutasha pa kuba nabafuma mu mfifi ukwingila mu lubuuto lwa kwa Lesa ulwa kusungusha! Lwaba lubuuto lwa ku mupashi, icine ca Cebo ca kwa Lesa ico cibuutusha imintontonkanya, pa kuti nangu ni abo ababa impofu sha cine cine kuti bamona icine.
Kwena, ukwaafwa kulekabilwa. Tacili icapalako ukuti umo uubelenga fye Baibolo ukwabula ukushukila ifya kwaafwa fyapayanishiwa na bulesa kuti ailuka icine. Uyo e mulandu wine Yehova Lesa apayanishisha “umusha wa cishinka kabili uwashilimuka,” uwasobelwe pali Mateo 24:45-47. Ilelo uyo “musha” emininwako ne Bumba Litungulula ilya Nte sha kwa Yehova. Cili ni pe samba lya butungulushi bwa ilyo bumba epo Ibungano lya Citungu ilya “Bakasenda ba Lubuuto” lipekanishiwe.
Imifwaile ya ili bungano ili ya kwaafwa abantu ba kwa Yehova bonse ukuba bakasenda ba lubuuto abawaminako, mu kumfwana na mashiwi ya kwa Paulo pa Abena Filipi 2:15. Palya, Abena Kristu bakonkomeshiwa ukwaka nge “fyengelo pano nse.”—Mateo 5:14, 16, NW.
Mu Zambia, ukukonkana kwa Mabungano ya Citungu aya “Bakasenda ba Lubuuto” kutantikwe ukutendeka pali Cisano, August 14. Pa 9:20 a.m., programu ya nyimbo ikaafwa bonse ukukwata imibele ya mutima no muntontonkanya, iyaipekanya kuli programu ya ku mupashi iikaba pa ntanshi. Ubushiku bumo bumo nabukwata umutwe wa buko, kabili umutwe wa pali Cisano uli “Tumeni Ulubuuto Lwenu ne Cishinka Cenu.”—Ilumbo 43:3.
Programu ya lucelo pali Cisano ikasanshamo ilyashi likalamba, “Bakasenda ba Lubuuto—Ku Mifwaile Nshi?” Mu kushininkisha, Abena Kristu tababa bakasenda ba lubuuto mu kuba ne nkuntu ili yonse iya pa lwabo, iya kaso. Ukucila, babomba ku milandu imo ine intu Yesu Kristu, Kasenda wa Lubuuto Mukalamba, aishile kwi sonde, ukuilumbula, ukushimike cine ubunte no kukatamika ishina lya kwa Kabumba. Mu kulinga, Yesu asosele ulwa mwine ukuti: “Ilyo ndi mu calo, ndi lubuuto lwa calo.” (Yohane 9:5) Muli fyo, ashile icipasho kuli ifwe ukukonka mu nkasa shakwe mu kupalamisha. (1 Petro 2:21) Icungulo kasuba ica ubo bushiku bwa kubalilapo cikebekesha fyonse fibili ilyashi ne cilangililo ca mu Baibolo icilebomba ne Mfumu Yoshia, icikaba ca buseko bwaibela ku misepela.
Umutwe wa pa Cibelushi uli ‘Imwe Muli Lubuuto lwa Pano Isonde . . . Ulubuuto Lwenu Lengeni Lubalike.’ (Mateo 5:14, 16) Programu ya lucelo ikasanshamo ukukonkana ukukwete umutwe wa kuti “Ukulenga Ulubuuto Lwenu Ukubalika.” Ishuko lya mu nshita likapayanishiwa kuli abo abaipeela kuli Yehova ukubatishiwa. Programu ya cungulo kasuba ikapeela ukukonkana kwa kubuutusha ukukwete umutwe wa kuti “Ukusanika Ulubuuto pa Kubapo kwa kwa Kristu no Kusokololwa.”
Umutwe usobwelwe uwa pa Mulungu, ubushiku bwa citatu kabili ubwa kulekelesha ubwe bungano, uli “Twalilileni Ukwenda nga Bana ba Lubuuto.” (Abena Efese 5:8, NW) Programu ya lucelo ikakwatamo ukukonkana ukuli no mutwe wa kuti “Ukusakamana Umo no Munankwe mu Cinshingwa Ŋanda ca Bwina Kristu,” ukukabomba no kukakililwako kwa lupwa. Kukabako na kabili ilyashi ilikalondolola fintu cipilibula ukunakila Lesa na Kristu.
Ibungano likafika pa kalume icungulo pa Mulungu mu kuba ne lyashi lya cintubwingi ilili no mutwe uleti “Konkeni Ulubuuto lwa Calo.” Ili lyashi likakwatamo ukulandapo kwa pali Yohane 1:1-16 kabili likalanga ukukabila kwa kwishiba kwa Baibolo, ukwebekesha ukuti Yesu Kristu aba e lubuuto lwa calo. Ibungano likesa ku mpela mu kuba no kukonkomesha kwakosa ukwa kuti “Twalilileni Ukwenda mu Luubuto.”
Langa ukutesekesha kobe kuli uyu mutebeto wa ku mupashi uyo Yehova alepayanya ukupitila mu kuteyanya kwakwe ukumoneka. Sangwapo ukufuma pa lwimbo lwa kwiswila pali Cisano ukufikila ipepo lya kusondwelela pa Mulungu icungulo. Kutika mu kusakamanisha kuli conse icilesoswa pa cisebele. Lemba ifyebo ku kukwaafwa ukupeelako kusakamana na ku fya kuloshako ifya nshita ya ku ntanshi. Mu kupelako, pekanya ukwakanamo mu musango umo uwa mulimo wa kuitemenwa. Muli fyo, ukaipakisha te mapaalo fye yeka aya kupokelela lelo na mapaalo ya kulilanako aya kupeela.—Imilimo 20:35.