Ni Shani Fintu Ulebutuka mu Lubilo lwa ku Bumi?
“Bushe tamwaishibo kuti pa kubutuko lubilo babutuka bonse, lelo umo fye e upokelele [cilambu, “NW”]? E fyo mubutuke ukuti mupoke.”—1 ABENA KORINTI 9:24.
1. Ni kuli cinshi Baibolo yapalanya inshila yesu iya Bwina Kristu?
BAIBOLO ipashanya ukusupila kwesu ubumi bwa muyayaya ku lubilo. Ukulola ku kupwa kwa bumi bwakwe, umutumwa Paulo asosele ulwa mwine ukuti: “Nimpilikito kupilikita kusuma; nimpwisho lubilo; nimbake citetekelo.” Acincishe Abena Kristu banankwe ukucita cimo cine lintu asosele ukuti: “Tube abafuule cifinine conse no lubembu ulwalambatila, tubutuke no mukoosha ulubilo ulwabikilwa ifwe.”—2 Timote 4:7; AbaHebere 12:1.
2. Kutendeka nshi ukwa kukoselesha tumona mu lubilo lwa ku bumi?
2 Uku kupashanya kuli ukwalinga pa mulandu wa kuti ulubilo lwakwatamo intendekelo, inshila ya kupitamo, na pa kupelela, nelyo ubuyo. E fyo caba na ku mibombele ya kulunduluka kwesu ukwa ku mupashi ukulola ku bumi. Nga fintu twamona, cila mwaka imyanda ya makana ya bantu baletendeka bwino mu lubilo lwa ku bumi. Mu myaka isano iyafumineko, ku ca kumwenako, abantu 1,336,429 balitendeka bwino mu lubilo ukupitila mu kuipeela no lubatisho lwa mu menshi. Ukutendeka kwa musango uyo ukwabamo lupikwe kuli kwa kukoselesha apakalamba. Nangu cibe fyo, icintu cacindama caba kwikalilila mu lubilo ukufika fye na pa kupelela. Bushe ulecite ci?
Ulubilo lwa ku Bumi
3, 4. (a) Ni shani fintu Paulo alondolwele ubucindami bwa kusungililo musenselo mu lubilo? (b) Ni shani fintu bamo bafilwa ukumfwila ukupanda amano kwa kwa Paulo?
3 Ukukomaila pa bucindami bwa kutwalilila ukuba mu lubilo, Paulo akonkomeshe ukuti: “Bushe tamwaishibo kuti pa kubutuko lubilo babutuka bonse, lelo umo fye e upokelele cilambu? E fyo mubutuke ukuti mupoke.”—1 Abena Korinti 9:24.
4 Ca cine, mu mangalo ya pa kale, umo fye e wali no kupokelele cilambu. Nangu cibe fyo, mu lubilo lwa ku bumi, onse aliba uwalinga ku cilambu. Cili fye icakabilwa ukutwalilila ukuba mu nshila ukufika ku kupwisha! Mu nsansa, abengi mu busumino balibutuka mu nshila ukufika na ku mpela ya bumi bwabo, nga fintu umutumwa Paulo acitile. Kabili amamilioni batwalilila ukubutuka. Nangula ni fyo, bamo balifilwa ukuya ku ntanshi nelyo ukucita ukulunduluka ukulola apa kupelela. Mu cifulo ca ico, basuminishe ifintu fimbi ukubacilikila ica kuti balifililwe mu lubilo nelyo babele abashafikapo mu nshila imo. (Abena Galatia 5:7) Ici cilingile ukupeela ifwe bonse umulandu wa kubebeta fintu tulebutuka mu lubilo lwa ku bumi.
5. Bushe Paulo alepashanya ulubilo lwa ku bumi ku cangalo ca kucimfyanya? Londolola.
5 Icipusho pambi kuti caipushiwa: Cinshi cintu Paulo akwete mu muntontonkanya lintu asosele ukuti “umo fye e upokelele cilambu”? Nga fintu cimwenwe mu kubangilila, tapilibwile ukuti pa kati ka abo bonse abatendeke mu lubilo lwa ku bumi, umo fye e ukapokelela icilambu ca bumi bwa muyayaya. Ukwabulo kutwishika ico te kuti cibe e mulandu, pantu inshita ne nshita, acilengele ukumfwika ukuti caba kufwaya kwa kwa Lesa ukuti abantu bonse bapusuke. (Abena Roma 5:18; 1 Timote 2:3, 4; 4:10; Tito 2:11) Iyo, talesosa ukuti ulubilo lwa ku bumi lwaba kucimfyanya umo uwa kwakanako umo umo esha ukucimfya bambi bonse. Abena Korinti balishibe bwino ukuti ulya musango wa mupashi wa kucimfyanya eko wali pa kati ka ba kucimfyanya mu Mangalo yabo aya Isthmus, ayasoselwe ukuba ayalumbukishe pali ilya nshita ukucila Amangalo ya Olympic. Cinshi, lyene, cintu Paulo akwete mu muntontonkanya?
6. Cinshi cintu amashiwi yashingulukako yasokolola pa lwa kulanda kwa kwa Paulo pali kabutuka no lubilo?
6 Mu kulosha ku cilangililo ca kwa kabutuka, Paulo alelanda maka maka pa filolelo fyakwe umwine ifye pusukilo. Mu fikomo fitangilileko, alondolwele fintu abombeshe no kupilikita mu nshila ishingi. (1 Abena Korinti 9:19-22) Lyene, mu cikomo 23, asosele ukuti: “Ifintu fyonse ncitile mbila nsuma, ukuti mbe uwa kukumako.” Alimwensekeshe ukuti ipusukilo lyakwe talyapeelwe pa mulandu fye wa kuti alisalilwe ukuba umutumwa nelyo pa mulandu wa kuti alipoosele imyaka iingi ukushimikila kuli bambi. Pa kwakana mu mapaalo ya mbila nsuma, afwile ukutwalilila ukucita conse apapela amaka yakwe pa mulandu wa mbila nsuma. Afwile ukubutuka mu kuba no kufwaisha kwakumanina ukwa kucimfya, ukupilikita umwine kwati nalimo alebutuka mu lubilo lwa ku makasa mu Mangalo ya Isthmus, uko “umo fye e upokelele cilambu.”—1 Abena Korinti 9:24a.
7. Cinshi cikabilwa ku ‘kubutuka ukuti mupoke’?
7 Kuliko ifingi ifyo twingasambilila ukufuma kuli ici. Nangu cingati onse uuilunda ku lubilo afwaya ukucimfya, ni abo beka fye abapampamina mu kukumanina pa kucimfya e bakwata icilolelo ca kucita ifyo. Mu kukonkapo, tatulingile ukuyumfwa abaikushiwa pa mulandu fye wa kuti twaliilunda mu lubilo. Tatulingile ukuyumfwa ukuti conse cikaba bwino pantu fye tuli ‘mu cine.’ Kuti pambi twakwata ishina Umwina Kristu, lelo bushe twalikwata ubushinino bwa kushininkisha ukuti tuli Bena Kristu? Ku ca kumwenako, bushe tulacita ifintu ifyo twaishiba ukuti Umwina Kristu alingile ukucita—ukusangwa ku kulongana kwa Bwina Kristu, ukwakana mu butumikishi bwa mwi bala, na fimbipo. Nga ni fyo, ico cili icatashiwa, kabili tulingile ukutukusha ukutwalilila mu fibelesho fyawamisha ifya musango uyo. Nangula ni fyo, bushe kuti cacitikako ukuti kuti twanonkelamo apakalamba ukufuma ku cintu tucita? Ku ca kumwenako, bushe lyonse tulaipekanya ukusangwilako icintu cimo ku kulongana? Bushe tulatukusha ukubomfya cintu tusambilila ku bumi bwa pa lwesu? Bushe tulapeelako ukusakamana ku kuwamyako ukulamuka kwesu pa kuti twingapeela ubunte bwa kushimikisha ukwabulo kusakamana ifipindami ifyo tukumanya mwi bala? Bushe tuli abaipekanya ukupokelela ukusonsomba kwa kubwelelako ku balesekelela no kutungulula amasambililo ya Baibolo? “Mubutuke ukuti mupoke,” e fyacincishe Paulo.—1 Abena Korinti 9:24b.
Belesheni Ukuilama mu Fintu Fyonse
8. Cinshi pambi cakuntile Paulo ukucincisha Abena Kristu banankwe ‘ukubelesha ukuilama mu fintu fyonse’?
8 Mu nshita ya bumi bwakwe, Paulo amwene abengi ababwelele numa, abasensenwinwe, nelyo abalekele mu lubilo lwa ku bumi. (1 Timote 1:19, 20; AbaHebere 2:1) Uyo e mulandu mu kubwekeshabwekeshapo acinkwileko Abena Kristu banankwe ukuti baba mu kucimfyanya kwa kupilikita kabili ukwatwalilila. (Abena Efese 6:12; 1 Timote 6:12) Alundulwile icilangililo ca kwa kabutuka no kusoso ukuti: “Awe onse uulepilikita ku mangalo [ailama, NW] muli fyonse.” (1 Abena Korinti 9:25a) Mu kulanda ifi, Paulo alelanda pa cintu cimo ico Abena Kristu ba ku Korinti babeleshe bwino, ukucilumbula, ukukanshiwa kwakakala ukukonkwa na ba kucimfyanya mu Mangalo ya Isthmus.
9, 10. (a) Ni shani fintu icitabo cimo cilondolola aba kucimfyanya mu Mangalo ya Isthmus? (b) Cinshi ukucilisha cili icawaminwo kumonwa pa lwa ubu bulondoloshi?
9 Pano pali ubulondoloshi bwamonekesha ubwa wa kucimfyanya uuli mu kukanshiwa:
“Mu kwikushiwa kabili ukwabula ukuŋwiŋwinta ainashisha umwine ku mafunde ne fibindo fya kukanshiwa kwakwe ukwa myeshi ikumi, ukwabula uko te kuti pambi akaneko. . . . Aba uwa cilumba pa kucula kwakwe, no kufunshika, no kuba eka, kabili acilanguluka ukuba ica kuyumfwilapo icilumba mu kusakamanishisha ukutaluka ukufuma ku cili conse ico mu cipimo cacepesha cingashimya ishuko lyakwe ilya kutunguluka. Amona abantu bambi ukunakila ku nsala ya fya kulya, abaletusha ilintu wene alepemashika, balekokoloka mu muputule wa kusambilamo, ukuipakisha ubumi mu musamwe; lelo takwata itontonkanyo ili lyonse ilya kufinuka, pantu umutima wakwe wabikwa pa cilambu, kabili ukukanshiwa kwakakala kuli ukwacindamisha. Aleshiba ukuti amashuko yakwe yalapwa nga ca kuti mu mibele iili yonse nelyo pa kashita akali konse anasha ukukakala kwa kusalapulwa.—The Expositor’s Bible, Volyumu V, ibula 674.
10 Ica buseko bwaibela cili mimwene ya kuti uulekanshiwa “acimona ukuba ica kuyumfwilapo icilumba” pa kukonka ukutantika kwa musango uyo ukwa kubombesha kwa kuikaanya. Na kuba, “takwata itontonkanyo ilili lyonse ilya kufinuka” pa bwanalale no kucibondola ifyo amona bambi baleipakisha. Bushe kuti twasambililako icintu cimo ukufuma kuli ici? Ee, mu cine cine.
11. Mimwene nshi ishalinga intu tufwile ukuibakako ilintu tuleibimba mu lubilo lwa ku bumi?
11 Ibukisha amashiwi ya kwa Yesu ukuti “impongolo yasalala, kabili inshila yapabuka iitwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.” (Mateo 7:13, 14) Ilyo uletukusha ukwenda pa ‘nshila yafyenenkana,’ bushe ulafinukila ubuntungwa no bwanalale ubo ababa pa musebo umbi bamoneka ukuipakisha? Bushe ulayumfwa ukuti ulepusulwa ifintu fimo ifyo bambi balecita, ifyo fishingamoneka ifyabipa mu fine fyeka? Caliba icayanguka kuli ifwe ukuyumfwa muli iyi nshila nga ca kuti twafilwa ukusunga mu muntontonkanya umulandu tulebuulila iyi nshila. “Balya bena bacite fi ukuti bapokelele icitebo ca mabula icibonsa; lelo ifwe tucita ukuti tupokelele icishibonsa,” e fyasosele Paulo.—1 Abena Korinti 9:25b.
12. Mulandu nshi cingasoselwa ukuti ubukata no lulumbi ifyo abantu bafwaya fyapala icitebo icibonsa icapeelwe pa Mangalo ya Isthmus?
12 Kacimfya mu Mangalo ya Isthmus apokelele icayemfiwa no tuncindu twa Isthmus nelyo icimenwa cimbi ica musango uyo, ico mu kucitikako caumine mu nshiku shinono fye nelyo imilungu. Kwena, tacali ni pa cayemfiwa iconaika ifyo uwakana mu fyangalo fya kutukusha umubili ashombokele lelo pa bukata, umucinshi, no lulumbi ifyo fyaendele pamo na kwene. Icitabo cimo cishimika ukuti lintu kacimfya abwelele ku ŋanda, alipokelelwe nge mpalume yacimfya. Ilingi line ifibumba fya mu misumba fyalebongololwa pa kuti umulongo wakwe wingapita bwino, kabili ifimpashanya fyaleimikwa ku mucinshi wakwe. Te mulandu ne ci conse, nangu cibe fyo, ubukata bwakwe nalyo line bwali ububonsa. Ilelo, bantu abanono fye ebaishiba abo baali isho impalume, kabili abengi mu cituntulu tabasakamana. Abo abapeele inshita yabo, ulupikwe, ubutuntulu, nangu fye ni nsansa sha lupwa ku kunonka amaka, ululumbi, ne fyuma mu calo, lelo abashaba bakankaala ukulola kuli Lesa, bakasanga ukuti “icitebo” cabo ica kutemwe fimoneka, ukupala ubumi bwabo, ca kupita fye.—Mateo 6:19, 20; Luka 12:16-21.
13. Ni shani fintu inshila ya bumi iya umo mu lubilo lwa ku bumi yapusana ukufuma kuli iyo iya wakana mu fyangalo fya kutukusho mubili?
13 Aba kucimfyanya mu mangalo ya kutukusha umubili kuti pambi baba abaitemenwa ukupokelela ififwaikwa fyakakala ifya kukanshiwa, pamo nge fyo ifilondolwelwe pa mulu, lelo pa nshita fye iyapelela. Ilintu fye amangalo yapwa, babwelela ku nshila ya bumi iya lyonse. Kuti pambi bakanshiwa ukufuma ku nshita ne nshita ku kusungilila ukulamuka kwabo, lelo tabakonka na kabili inshila imo ine iya kuikaanya kwakakala, mu kucefyako ukukanacita ifyo ukufikila ukucimfyanya kukakonkapo. Tacaba ifyo kuli abo ababa mu lubilo lwa ku bumi. Kuli bene, ukukansha no kuikaanya cifwile ukuba e nshila ya bumi.—1 Timote 6:6-8.
14, 15. Mulandu nshi uwa kucimfyanya mu lubilo lwa ku bumi afwile ukubelesha ukuilama mu kutwalilila?
14 “Ngo muntu afwayo kwisankonka,” e fyasosele Yesu Kristu ku basambi balongene na bambi, “aikaanye umwine (nelyo, “afwile ukusosa ukuti, ‘Iyo’ ku mwine,” Charles B. Williams) asende ne capindama cakwe, e fyo ankonke [mu kutwalilila, NW].” (Marko 8:34) Lintu twapokelela ubu bwite, tufwile ukuba abaipekanya ukucita ifyo “mu kutwalilila,” te pa mulandu wa kuti kuliko ilumbo lyaibela mu kuikaanya, lelo pa mulandu wa kuti akashita kamo aka kubulisha ukushilimuka, ukufilwa kumo mu bupingushi busuma, kuti fyaonaula fyonse ifyakuulwa, nangu fye kubika mu busanso insansa shesu isha ciyayaya. Ukulunduluka kwa ku mupashi ilingi line kulacitwa pa musenselo washingashinga, lelo fintu kwingaba ukwabula umutengo mu kwangufyanya nga ca kuti tatupempwilile mu kutwalilila!
15 Mu kulundapo, Paulo acincishe ukuti tufwile ukubelesha ukuilama “mu fintu fyonse,” uko e kuti, tufwile ukucite fyo mu mbali shonse isha bumi bwesu. Ici cilabamo kupelulula pa mulandu wa kuti nga ca kuti uulekanshiwa ayobeka mu kucishamo nelyo aikala ubumi bwa bulembampulumushi, kumwenamo nshi kukabako ku kukalipwa konse ukwa ku mubili no kufunshika ifyo ashipikishako? Mu kupalako mu lubilo lwesu ulwa ku bumi, tufwile ukubelesha ukuilama mu fintu fyonse. Umuntu pambi kuti ailama mu fintu pamo nga ukukolwa no bulalelale, lelo umutengo wa ifi ulashima nga ca kuti ali uwa miya kabili uwa fikansa. Nelyo ni shani nga ca kuti aba uushishimisha no wa congwe ukulola kuli bambi, lelo atekelesha ulubembu lumo ulwa mu bumfisolo mu bumi bwakwe ubwa pa mbali? Pa kuti ukuilama kwingaba ukwa kunonsha mu kukumanina, kufwile ukubeleshiwa “mu fintu fyonse.”—Linganyeniko Yakobo 2:10, 11.
Mwibutuka “Cibutukebutuke”
16. Cinshi cipilibula ukubutuka “icibutukebutuke”?
16 Pa kumona ukubombesha kwa kupikintika ukukabilwa ku kutunguluka mu lubilo lwa ku bumi, Paulo atwalilile ukusosa ukuti: “E ico ine e fyo mbutuka, te pamo ngo ubutuke cibutukebutuke; ndelwe fyo, te pamo ngo uleumo mwela.” (1 Abena Korinti 9:26) Ishiwi “icibutukebutuke” mu kukonke shiwi lipilibula “ukukanashininkisha” (Kingdom Interlinear), “icishamonwa, icishalangililwa” (Lange’s Commentary). E ico, ukukanabutuka “icibutukebutuke” cipilibula ukuti ku wa kutambako onse cilingile ukuba icamonekesha uko kabutuka alelola. The Anchor Bible ipibula lyene ukuti “te mu nshila yanyongana.” Nga ca kuti wamwene inkasa ishaya no kubwela ku lulamba, ukushingulukashinguluka, kabili lyene shabwelelamo pa nshita imbi, te kuti utontonkanye ukuti umuntu alebutuka nangu fye panono, lelo ukuti taishibe uko aleya. Nga ca kuti wamwene inkasa shapanga umupelwa utali, uwaololoka, ulukasa lumo lumo ukutangilila ulwa ku numa kabili shonse ishatantikwa bwino, kuti wasondwelela ukuti inkasa sha muntu uwishibe bwino uko aleya.
17. (a) Ni shani fintu Paulo alangile ukuti talebutuka “icibutukebutuke”? (b) Ni shani fintu twingapashanya Paulo muli kuno kuloshako?
17 Ubumi bwa kwa Paulo bulanga mu kulengama ukuti talebutuka “icibutukebutuke.” Alikwete ubushinino bwakumanina ku kushininkisha ukuti aali mutumikishi wa Bwina Kristu kabili umutumwa. Akwete ubuyo bumo fye, kabili alipilikite umwine ubumi bwakwe bonse ku kunonka bwene. Tapumbwilwe ku lulumbi, amaka, ifyuma, nelyo ubwanalale, nangu cingati nakalimo nga alinonkele icili conse ica ifi. (Imilimo 20:24; 1 Abena Korinti 9:2; 2 Abena Korinti 3:2, 3; Abena Filipi 3:8, 13, 14) Ilyo walolesha ku numa ku nshila yobe iya bumi, musango nshi uwa nshila ulemona? Umupelwa waololoka mu kuba ne ntunga yamonekesha nelyo umo uupetaukila mu kubulwa ubuyo? Bushe kuliko ubushininkisho bwa kuti ulecimfyanya mu lubilo lwa ku bumi? Ibukisha, twaliba muli ulu lubilo, te mu kuba no kukanacincimuka, nga fintu cili, lelo ukufika apa kupelela.
18. (a) Cinshi cingalinganishiwa ku ‘kuumo mwela’ kuli ifwe? (b) Mulandu nshi iyo ibelele inshila ya busanso ukukonka?
18 Ukulinganyako ne ca kucitika na cimbi ica fyangalo fya kutukusho mubili, Paulo mu kulundapo asosele ukuti: “Ndelwe fyo, te pamo ngo uleumo mwela.” (1 Abena Korinti 9:26b) Mu kucimfyanya kwesu ukwa ku bumi, twalikwata abalwani abengi, ukusanshako Satana, icalo, no kukanapwilika kwesu kwine. Ukupala kapoosa wa nkonya uwa pa kale, tufwile ukuba na maka ya kuboma mu kuba ne mpumo shatontwa bwino. Mu nsansa, Yehova Lesa alatukansha kabili alatwafwa mu bulwi. Alapayanya amakambisho mu Cebo cakwe, mu mpapulo shashimpwa pali Baibolo, na mu kulongana kwa Bwina Kristu. Nangu cibe fyo, nga ca kuti tulabelenga Baibolo ne mpapulo no kuya ku kulongana lelo tatubomfya cintu tulesambilila, bushe tatuleonaula fye ukubombesha kwesu, ‘ukulauma fye mwela’? Ukucita ifyo kutubika mu cifulo ca busanso nga nshi. Tutontonkanya ukuti tulelwisha na muli ifyo tukwata itontonkanyo lya kucingililwa ilya bufi, lelo tatulecimfya abalwani besu. Uyo e mulandu umusambi Yakobo akonkomeshe ukuti: “Awe mube bakacita wa cebo, te ba kuumfwa fye iyo, e kuikopeka fye.” Nga fintu fye ‘ukuumo mwela’ takwakacene abalwani besu, nangu fye kuba fye “aba kuumfwa fye” takushininkisha ukuti tulecita ukufwaya kwa kwa Lesa.—Yakobo 1:22; 1 Samwele 15:22; Mateo 7:24, 25.
19. Ni shani fintu twingashininkisha ukukanaba abakaanwa?
19 Mu kupelako, Paulo atweba inkama yakwe iya kutunguluka ukuti: “Ntuutaulo mubili wandi, no kuuteko busha; epali, ilyo nabila kuli bambi, nabo wakaanwa ne mwine.” (1 Abena Korinti 9:27) Ukupala Paulo, na ifwe bene tufwile ukuba na bucibinda pa mubili wesu uushapwililika ukucila ukuusuminisha ukuba cibinda wesu. Tulekabila ukunukula ukukongama kwa ku mubili, ukufuluka, no kufwaisha. (Abena Roma 8:5-8; Yakobo 1:14, 15) Ukucita ifyo kuti kwakalipa, apantu ishiwi lyapilibulwa ‘ukututaula’ mu kukonke shiwi lipilibila ‘ukuuma pe samba lya linso’ (Kingdom Interlinear). Nangula ni fyo, bushe tacili icawama ukucula ku kukashika kwa linso, nga fintu cili, no kuba no mweo ukucila ukunakila ku kufwaisha kwa mubili wawa no kufwa?—Linganyeniko Mateo 5:28, 29; 18:9; 1 Yohane 2:15-17.
20. Mulandu nshi ukucilisha nomba cibelele ice pamfya ukubebeta fintu tulebutuka mu lubilo lwa ku bumi?
20 Ilelo, tulepalamina apa kupelela mu lubilo. Inshita ya filambu ukupeelwa naipalama. Ku Bena Kristu basubwa, cili “[cilambu ca, NW] bwite bwa mu mulu bwa kwa Lesa muli Kristu Yesu.” (Abena Filipi 3:14) Kuli abo abe bumba likalamba, cili bumi bwa muyayaya pe sonde lya paradise. Mu kuba ne fingi ifiletako busanso, shi natube aba mupampamina, nge fyali Paulo, pa kuti ‘tatuli abakanwa fwe bene.’ Shi uuli onse uwa ifwe nasende mu kukatama icipope ca kuti: “Mubutuke ukuti mupoke.”—1 Abena Korinti 9:24, 27.
Bushe Uleibukisha?
◻ Mulandu nshi cibelele icalinga ukulinganya ubumi bwa Mwina Kristu ku lubilo?
◻ Ni shani fintu ulubilo lwa ku bumi lwapusana no lubilo lwa ku makasa?
◻ Mulandu nshi tufwile ukubelesha ukuilama mu kutwalilila “mu fintu fyonse”?
◻ Ni shani fintu umo ashibutuka “icibutukebutuke”?
◻ Mulandu nshi cabela ica busanso ‘ukulauma fye umwela’?
[Icikope pe bula 16]
Icayemfiwa ca kwa kacimfya, pamo pene no bukata no mucinshi, caba icibonsa