Bakabilisha ba Bufumu Bacita Lipoti
Ukuleka Ulubuuto Lwabo Ukubalika mu India
IMBILA nsuma ya Bufumu ileshimikilwa mu India ku Nte sha buseko 11,524. (Mateo 24:14) Ababatishiwe 1,066 mu kati ka mwaka wa mulimo uwa 1991 bali ni bakabilisha ba Bufumu, abaleleka ulubuuto lwabo ukubalika kuli bambi. Fintu bonse baali aba nsansa ukumona 28,866 ukusangwa ku kusefya kwa Cibukisho ca mfwa ya kwa Kristu!
◻ Abengi basambilila pa lwe subilo lya Bufumu mu kubalilapo ukupitila mu bunte bwa mu lyashi. Ku ca kumwenako, Inte alandile pa lwa Bufumu kuli bakabomba banankwe, abali nabo bakabasa. Umo uwa balebomba nankwe alyankwileko kabili atendeke ukuleka ulubuuto lwakwe ukubalika ku lupwa lwakwe ne fibusa. Aba mu buseko balandile ubu bukombe bwa kusungusha ubwa Bufumu kuli bambi. Ukulingana na malipoti, mu myaka fye inono, ‘abantu ukucila pali 30 balipokelele icine.’ Yehova alipaalile uyu mwaume na bamunyina abapya aba ku mupashi pa kuleka ulubuuto lwabo ukubalika.
◻ Munyina wacaice mu cilonganino na cimbi alekele ulubuuto lwakwe ukubalika pa kucitilo bunte kwa mu lyashi ku basambi banankwe pa sukulu. Bamo aba bene baali abasekelela mwi subilo lya Bufumu, kabili ilingi line alelondolola Baibolo kuli bene ukufikila ubushiku pa kati. Umo, Katolika, aiminine uwashangila ku cine te mulandu no kusokwa ukufuma kuli shimapepo ulwa fya kufumamo fyabipisha nga ca kuti atwalilile ukubishanya ne Nte. Umusambi, nangu cibe fyo, aali uwashininwa ukuti alesambilila icine ca Baibolo ukufuma ku Nte, kabili atwalilile ukusambilila. Mu kupelako alibatishiwe kabili nomba abomba ngo mubomfi utumikila mu cilonganino. Alasekelela mwi subilo ilyo lisa ukupitila mu lubuuto lwawamisha ulwa cine!—Abena Roma 12:12.
◻ Na umbi uwakutike kuli uyu Nte wacaice aali musambi walumbuka nga nshi, mukanalesa, uwalepumya abo baletunga ukusumina muli Lesa, lelo bushiku bumo aliilundile ku kulanshanya kabili aipwishe ifipusho ifingi. Alipapushiwe lintu apokelele ifyasuko fya mano ku fipusho fyakwe fyonse kabili asondwelele ukuti Baibolo Cebo ca kwa Lesa. Alilundulwike mu kwishiba kwa Baibolo kabili mu kupelako alibatishiwe. Wishi umuHindu alimukeenye ukufika ku cipimo ca kumutamfya ukufuma mu ŋanda yakwe. Nangu cibe fyo, ukwiminina kwa uyu mulumendo ukwashangila ku cine kwalilambwilwe lintu babili aba bamunyina aba ku mubili na banankwe babili bapokelele icine kabili balibatishiwe. Umo uwa bamunyina nomba abomba pe ofesi lya musambo mu India.
◻ Umusambi kateyanya na o wine aliilundile ku kulanshanya na Nte wacaice. Aali mulembo wa fwaka kabili umunwi. Pa nshita imo, afwaile ukupuma abasambi banankwe babili abasambilile icine ukufuma kuli Nte. Pa mulandu wa kupokelela icine, balikeene ukuilunda kuli straka ya pa sukulu kabili tabaali na kusangwilako umulopa mu kati ka kampeini ya kulonganya umulopa iyaletungululwa no yu musambi kateyanya. Uyu mulumendo nomba ali uwa nsansa pa kuba Inte ya kwa Yehova kasenda wa lubuuto.
◻ Bonse pamo, umusambi uwalekele ulubuuto lwakwe ukubalika intanshi abomba ulubali lukalamba ulwa kwafwilisha ifibusa fyakwe 15 ukufika ku kuipeela no lubatisho ukupitila mu kucitilo bunte kuli bene mu lyashi.
Cili buseko ukumona abengi muli cilya calo capaabuka balepokelela isubilo lya Baibolo ilya calo cipya ica kwa Lesa no kuilunda kuli bumunyina bwa mu kusaalala kwa calo ubo Yehova Lesa alelonganinka ku kwikala kuli pe na pe pe samba lya Bufumu bwakwe.