Ifipusho Ukufuma ku Babelenga

Nga ca kuti Umwina Kristu nalwala nelyo ali pa lwendo na muli ifyo tali na maka ya kusangwa ku kusefya kwa Cibukisho, bushe alingile ukusefya cene umweshi umo pa numa?

Muli Israele wa pa kale ica Kucilila calecitwa pa mwaka pa bushiku bwalenga 14 ubwa mweshi wa kubalilapo, uwainikwe Nisani (nelyo, Abibu). Lelo tusanga ukupayanya kwaibela pa Impendwa 9:10, 11 ukuti: “Sosa ku bana ba kwa Israele, auti, Nga umo uwa muli imwe, napamo mu nkulo shenu, abo wakowela ku mufwe, napamo aba mu lwendo ukutali, na o kuti acite ca kucilila kuli Yehova: mu mweshi wa cibili mu [uwainikwe Iyyar, nelyo Ziv], bushiku bwe kumi na shine pa cungulo cinono, e lyo bakacicite; ku mikate iishatutumuka ne misalu iyalula e ko bakaciliile.”

Mona ukuti ici tacaimike inshiku sha kusengulwila shibili isha ca Kucilila (Nisani 14 nelyo Ziv 14), mu kuba no mwina Israele uuli onse nelyo icinshingwa-ŋanda umuntungwa ukusalapo, ukushintilila pa kuwaminwa. Ukupayanya kwa ca kulya ca Kucilila mu mweshi wa cibili kwali ukwapeleshiwa. Cali icaibela ku mwina Israele uwali uwakowela mu kusefya pa Nisani 14 nelyo uwali ukwalepa nga nshi ukufuma uko ukusefya kwa lyonse kwalecitilwa.

Ica kucitika ceka icalembwa ica ici icabomfiwe mu kusaalala cali ni pa nshita lintu imfumu ya busumino Hisekia abuukulwile ukubaka kwa Mutebeto wa Mikate Iishatutumuka. Takwali inshita ya kuipekanya mu mweshi wa kubalilapo (apantu bashimapepo tabaali abaipekanya kabili abantu baali tabalalongana), e co cacitilwe pa bushiku bwalenga 14 ubwa mweshi walenga bubili.—2 Imilandu 29:17; 30:1-5.

Ukucila pa mibele yaibela iya musango yo, abaYuda basungile ica Kucilila pa bushiku ubo Lesa asontele. (Ukufuma 12:17-20, 41, 42; Ubwina Lebi 23:5) Yesu na basambi bakwe basefeshe ukulingana ne Funde, ukukanasunga ubu bushiku buyefya buyefya. Luka acita lipoti ukuti: “Awe kwaishile ubushiku bwa mukate uushatutumuka, ubo lyali no kwipaiwamo ica kucilila. Kabili [Yesu] atumine Petro na Yohane, ati, Kabiyeni, mutupekanishe ica kucilila, ukuti tulye.”—Luka 22:7, 8.

Pali kalya kashita Yesu aimike ukusefya kwa pa mwaka uko Abena Kristu baishiba nge Ca Kulya ca Cungulo ica kwa Shikulu. Ubucindami bwa kusangwako kwa Bena Kristu te kuti bukomailwepo mu kucishamo. Ici caba e ca kucitika cakatamisha mu mwaka ku Nte sha kwa Yehova. Amashiwi ya kwa Yesu yalanga umulandu; asosele ukuti: “Citeni ici ku kunjibukisha.” (Luka 22:19) Muli ifyo, umo umo uwa Nte sha kwa Yehova alingile ukutantika ilyo kucili imyeshi ku ntanshi ukusunga ubushiku bwa kusefya ubwalubuka ukufuma ku fipangano fya nshita ifili fyonse. Ica Kulya ca Cungulo ica kwa Shikulu cikasefiwa pali Cibili, April 6, 1993, pa numa ya kuwa kwa kasuba mu ncende ya cikaya.

Mu milandu ya limo limo fye ifilenga fimo ifishingamwenwa libela, pamo ngo kulwala nelyo ukupikana kwa lwendo, kuti pambi fyacilikila Umwina Kristu ukufuma ku kusangwako nga fintu wene atantike. Cinshi ciligile ukucitwa mu mibele ya musango yo?

Mu kati ka kusefya umukate ushatutumuka no mwangashi wakashika filapishiwamo, kabili abo abasubwa no mupashi wa mushilo uwa kwa Lesa no kusalwa ukuya ku bumi mu muulu balalyako. (Mateo 26:26-29; Luka 22:28-30) Nga ca kuti umo uulyako cila mwaka ali mu busanshi bwa kulwala ku ŋanda nelyo mu cipatala uno mwaka, baeluda ba cilonganino ca cikaya bakatantika umo uwa bene ukutwala umukate no mwangashi ku ulwele, ukulanshanya amalembo ya Baibolo ayalinga pali uyu mutwe, no kupeela ifimpashanya. Nga ca kuti Umwina Kristu wasubwa tali pa cilonganino ca pa mwakwe, alingile ukutantika ukuya ku cilonganino mu ncende akaba pali ubo bushiku.

Mu cilolwa ca ici, kuti caba ni pe samba fye lya mibele yaibela nga nshi e pantu Umwina Kristu wasubwa engasefya Ica Kulya ca Cungulo ica kwa Shikulu inshiku 30 pa numa (umweshi umo uwa kubalika no kwililwa), mu kumfwana ne kambisho lya pa Impendwa 9:10, 11 ne ca kumwenako pali 2 Imilandu 30:1-3, 15.

Abo abali be bumba lya “mpaanga shimbi” isha kwa Yesu, mu kuba ne subilo lya bumi bwa muyayaya pe sonde lya paradise, tababa pe samba lye kambisho ku kulyako ku mukate no mwangashi. (Yohane 10:16) Caliba icakatama ukusangwa ku kusefya kwa pa mwaka, lelo tabalyako ku fimpashanya. E co nga ca kuti umo uwa bene nalwala nelyo ali pa lwendo kabili muli ifyo tali ne cilonganino icili conse cilya cungulo bushiku, wene kuti abelenga amalembo yalinga pa mbali (ukusanshako ubulondoloshi bwalembwa ubwa kwimika ukusefya kwa kwa Yesu) no kupepela ipaalo lya kwa Yehova pa ca kucitika mu kusaalala kwa calo. Lelo takuli ukukabila kwa kutantika kwalundwako kwa kulongana nelyo ukulanshanya kwa mu Baibolo ukwaibela umweshi umo pa numa.