Bushe ici ca Kulya Kuti Cakwata Ubupilibulo Kuli Iwe?

UMWESHI wabulungana ubalika pa mpanga ya lubuto lwanakilila. Mu muputule wa pa muulu wa mwa kwikala mu Yerusalemu wakokwesha, abaume 12 nabakolongana ukushinguluka itebulo. Abali 11 balepeelo kusakamana kwa kufindamina ilyo Kasambilisha wabo aletendeka ukusefya kwacindamisha kabili alelanda amashiwi ya bupilibulo bukalamba. Ukushimika kumo kutila:

“Yesu [Kristu] abuulile umukate, no kutootela, alimokawile, apeele na ku basambi, no kutila, Buuleni, mulye; uyu mubili wandi. Kabili ilyo abuulile ulukombo no kutootela, apeele kuli bene, ati, Nwenimo bonse; pantu ulu mulopa wandi uwa cipingo cipya, uulesuumina abengi ku kulekelelwe membu. Lelo ndetila kuli imwe, ukutula pali nomba nshakanweko ku fisabo fya mwangashi ukufika pa bushiku bulya ilyo nkanwe cipya pamo na imwe mu bufumu bwa kwa Tata. Kabili ilyo baimbile ulwimbo lwa malumbo, balifumine, baile ku lupili lwa Miolife.”—Mateo 26:26-30.

Ici cacitike pa numa ya kuwa kwa kasuba pa bushiku bwalenga 14 ubwa mweshi wa ciYuda Nisani mu mwaka wa 33 uwa Nshita yesu Iyaishibikwa. Yesu na batumwa bakwe e lintu basefeshe fye ica Kucilila mu kwibukisha ukulubulwa kwa kwa Israele ukufuma mu busha bwa Egupti ukwa mu mwanda wa myaka walenga 16 B.C.E. Kristu aali natamfya Yuda Iskariote, uwali mupepi no kumufutuka. Muli fyo, ni Yesu fye na batumwa ba bucishinka 11 e balipo.

Ici ca kulya ca cungulo tacali kukonkanyapo kwa ca Kucilila ca ciYuda. Cali icipya icaishileitwa Ica Kulya ca Cungulo ica kwa Shikulu. Ukukuma kuli uku kusefya, Yesu akambishe abakonshi bakwe ati: “Citeni ici ku kunjibukisha.” (Luka 22:19, 20; 1 Abena Korinti 11:24-26) Mulandu nshi asosele fyo? Kabili ni shani fintu ici ca kucitika cakokole myanda ya myaka mu kucitikako cingakwato bupilibulo kuli iwe?