Ifipusho Ukufuma ku Babelenga

Apantu Abena Kristu tabashitikapo indalama, bushe balingile ukupokelela amatikiti nelyo ukwakanamo mu tupepala twa lwito umo pambi benganonka ifilambu?

Ici cili cipusho icaimako ukufuma ku nshita ne nshita, e co calilangulukwa kale mu mpapulo shesu. Mu ndimi shimo, twalilenga ukubako ifisontelelo fya fitabo fyesu, pamo nga Watch Tower Publications Index 1930-1985 (ne yapalako ukufimba 1986-1990). Nga ca kuti Umwina Kristu nakwata ifisontelelo fya musango yo mu lulimi lwakwe, ifi kuti fyashinina ukuba ifibombelo mu kusanga amasuko ya kwikusha mu kwangufyanya.

Icipusho cipushiwe pa muulu cili ca kumwenako. Ukulolesha muli Index ya 1930-1985 pe samba lya mutwe “Questions From Readers,” (Ifipusho Ukufuma ku Babelenga) umo kuti asanga akamutwe kanono aka kuti “‘drawings,’ may Christian accept ticket for?” (‘Utupepala twa lwito,’ bushe Umwina Kristu kuti apokelela itikiti lya?) Kabelenga aloshiwa ku ciputulwa “Questions From Readers” muli The Watchtower ya February 15, 1973, ibula 127.a Inte ishingi balikwata amabaundi volyumu (nelyo ishafuma lumo na lumo) isha The Watchtower ya 1973, nelyo kuti pambi yaipushiwa muli laibrari ya Mayanda ya Bufumu ayengi.

Ukulanshanya kwasabankanishiwe mu 1973 kwasonteleko kuti Abena Kristu mu kulinga balasengauka ukushitikapo ukuli konse nelyo utupepala twa lwito ifyo fibimbamo ukushita amatikiti (pamo nga amatikiti ye shuko) nelyo kubikapo indalama kwi shuko lya kunonka icilambu cimo. Ukucibiika mu kwanguka, tulasengauka ukuteye njuka, ukuli mu cine cine kulumbulula kwa bufunushi.—1 Abena Korinti 5:11; 6:10; Abena Efese 4:19; 5:3, 5.

Ituuka nelyo ubukwebo, nangula ni fyo, kuti pambi lyabomfya utupepala twa lwito nge nshila ya kusabankanishishamo. Ico umuntu alingile ukucita fye kupeele shina lyakwe nelyo ukutuma formu nelyo itikiti, ukwabula ukushita icili conse. Utupepala twa lwito twaba fye lubali lwa mibombele ya kusabankanya; yaelenganishiwa ku kuba inshila yabula akapaatulula iya kupingulapo ni ani ali no kupeelwa icilambu nelyo ifilambu. Abena Kristu bamo kuti pambi bayumfwa ifyo kuti bapokelela icilambu mu tupepala twa lwito ico cishabimbilemo ukuteye njuka, nga fintu fye bengapokelela ifipe fya pa fye fimo ifya kulangisha nelyo ifya bupe fimbi ifyo ubukwebo nelyo ituuka lingabomfya muli programu ya liko iya kusabankanya.

Nangu cibe fyo, Abena Kristu bamo kuti basengauka icili conse ica musango yu, pa kukanafwaya ukupunwisha nelyo ukufulunganya bambi na kabili ukufwaya ukutalukako nga nshi ukufuma ku kubeleleka ukuli konse ukwa kucetekela iciitwa Lishuko. Nga fintu Esaya 65:11 alanga, ababomfi ba kwa Lesa tabailundanya abene kuli ‘lesa we Shuko’ nelyo ‘lesa we Shamo.’ Na kabili kuti pambi bayumfwa ukuti tabalefwaya ukuba ulubali lwa kusabankanya luntu aba kunonka pambi bengafwaikwa ukwakanamo. Abo abayumfwa muli iyo nshila mu kushininkisha tabalingile ukuba aba kulengulula Umwina Kristu nelyo Abena Kristu abo kampingu wabo abasuminisha ukuibimba mu tupepala twa lwito utwa musango yo.—Linganyako Abena Roma 14:1-4.

[Futunoti]