‘Fwayeni Yehova, Mwe Bafuuka Bonse’
“FWAYENI Yehova, mwe bafuuka ba mu calo bonse; mwe bacito bupingushi bwakwe, fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.”—Sefania 2:3.
Kasesema Sefania alungatike ayo mashiwi ku “bafuuka ba mu calo,” kabili abacincishe ‘ukufwaya ubufuke’ pa kuti bengacingililwa mu “bushiku bwa bukali bwa kwa Yehova.” Takuliko kutwishika ukuli konse ukwa kuti ubufuuke bulafwaikwa pa kupusunsuka. Lelo mulandu nshi?
Mulandu Nshi uwa Kufwaila Ubufuuke?
Ubufuuke mibele ya kuba uwanakilila, uwalubukako ku kumalala nelyo ukuituntumba. Bwalyampana mu kupalamisha ku bulumba bumbi, pamo nga ukuicefya no kunakilila. Apantu cabe fyo, abafuuka balasambilishiwa kabili baliba abaitemenwa ukupokelela ukusalapula ukufuma ku kuboko kwa kwa Lesa, nelyo cingati kuti pambi kwamoneka ukwa bucushi pa kashita kanono.—Ilumbo 25:9; AbaHebere 12:4-11.
Mu bwine bweka ubufuuke kuti bwakwata ifinono ifya kucita na masomo ya umo nelyo icifulo cakwe mu bumi. Nangu cibe fyo, abo abasambilila nga nshi nelyo abatunguluka mu nshila ya ku calo bakongamina ku kuyumfwa ukuti balifikapo ukucito kupingulapo abene mu cili conse, nelyo fye ni mu milandu ya kupepa. Ici kuti cabacilikila ukufuma ku kusuminisha umuntu umbi ukubasambilisha icintu cimo nelyo ukufuma ku kupokelela ukufunda no kucito kwaluka kwakabilwa mu bumi bwabo. Bambi ababa aba cuma lwa ku mubili kuti pambi bawila mu kutontonkanya kwalubana ukwa kuti umutelelwe wabo walaala mu fikwatwa fyabo ifya ku mubili. E ico, bayumfwa ukukanakabila icuma ca ku mupashi ukufuma mu Cebo ca kwa Lesa, Baibolo.—Mateo 4:4; 5:3; 1 Timote 6:17.
Languluka bakalemba, abaFarise, na bashimapepo bakalamba aba mu kasuba ka kwa Yesu. Pa kashita kamo lintu abasole abo batumine ku kwikata Yesu babwelulwike ukwabula wene, abaFarise batile: “Bushe na imwe namulufiwa? Bushe bamo pali bakateka nalimo pa baFarise balimutetekela? Lelo ibumba ili ilishaishiba Amalango lyalitiipwa!” (Yohane 7:45-49) Mu mashiwi yambi, kuli bene, bambuulu fye na batuutu e baali no kusumina muli Yesu icisuminesumine.
Nangu ni fyo, abaFarise bamo balikulilwe ku cine, kabili bacingilile fye na Yesu na Bena Kristu. Pa kati ka aba pali Nikodemo na Gamaliele. (Yohane 7:50-52; Imilimo 5:34-40) Pa numa ya mfwa ya kwa Yesu, “ibumba likalamba lya bashimapepo lyalenakila ku citetekelo.” (Imilimo 6:7) Ukwabula ukutwishika ica kumwenako capulishamo aali mutumwa Paulo. Asambilishiwe pe samba lya kwa Gamaliele kabili asangwike uwafikapo nga nshi kabili ndubulwila wacindikwa uwa ciYuda. Nangu cibe fyo, mu kupita kwa nshita ayankwile mu kuicefya ku bwite bwa kwa Kristu Yesu no kusanguka umukonshi wakwe uwapimpa.—Imilimo 22:3; 26:4, 5; Abena Galatia 1:14-24; 1 Timote 1:12-16.
Ici conse cilelangilila ukuti te mulandu na fintu icikulilo ca umo pambi cingaba nelyo fintu pambi umo engayumfwa pa lwa bukombe ukufuma muli Baibolo, amashiwi ya kwa Sefania yacili yalabomba. Nga ca kuti umo alefwaya ukusuminishiwa kuli Lesa no kutungululwa ku Cebo cakwe, ubufuuke te kuti bubulwepo.
Abo ‘Abafwaya Ubufuuke’ Ilelo
Amamilioni ya bantu ukushinguluke calo baleankula ku mbila nsuma ya Bufumu. Inte sha kwa Yehova baletungulula amasambililo ya Baibolo ayacilile pa mamilioni yane cila mulungu mu mayanda ya bantu ba musango yo. Aba bafuma ku fikulilo ifingi kabili ifyalekanalekana ne fya bunonshi fyapusanapusana ne mibele ya fya kwangalila capamo. Nalyo line, icintu cimo ico bakwata mu kupalana cili ca kuti baliba abaicefya nga nshi ku kupokelela ubukombe bwa Baibolo ubo umo atambike pa mwinshi wabo wine nelyo ku cifulo cimbi. Ubwingi bwabo balecito kulunduluka kushaiwamina pa mulandu wa kuti baliba abaitemenwa ukubikako ukubombesha ku kucimfya ifipindami mu nshila yabo. Ee, bali pa kati ka “bafuuka ba mu calo” ilelo.
Ku ca kumwenako, buula Maria mu Mexico. Asambilile bushimafunde pa universiti kabili aali uwacingililwa mu fya ndalama pa mulandu wa bupyani. Pa mulandu wa ici, alundulwile imfundo sha kusuminisho kwaluka isho shamwalwile, nga fintu acibikile, mu muntu wa “bucipondoka, uwa miciika, uutitikisha, kabili mukanalesa.” “Natendeke ukutontonkanyo kuti icili conse kuti capikululwa ne ndalama no kuti Lesa tali uwacindama. Mu cishinka, nayumfwile ifyo tabako no kubako,” e fyaibukishe Maria. “Kuli ine ubutotelo bwali cintu cimo ica kupumya kabili icifwaikwa fye ca kwangalila capamo,” e fyo alundileko.
Pa numa, Maria amwene ukwaluka mu ndume yakwe iya muli bawishi bambi pa numa ya kusanguka umo uwa Nte sha kwa Yehova. “Aali uwakaluka nga nshi, lelo nomba aali muntu wa mutende kabili uwatambalala,” e fyalondolwele Maria. “Balupwa lwandi basosele ukuti aali ni kashimikila kabili alebelenga Baibolo, kabili pali uyo mulandu talenwa nelyo ukulafwaya abanakashi na kabili. E co nafwaile wene ukwisambelengela Baibolo pantu natontonkenye ifyo muli iyi nshila nali no kusanga umutende ne cibote ifyo nafwaile nga nshi.” Ica kufumamo cali ca kuti Maria alipokelele isambililo lya Baibolo na baupana babili Inte.
Alikwete ifintu ifingi ifya kucimfya, na kabili cali icayafya nga nshi kuli wene ukupokelela icishinte ca Baibolo ica bumutwe pa kuti enganakila ku mulume wakwe. Lelo acitile ukwaluka kukalamba mu bumi bwakwe ne mibele. Asumine ukuti: “Ndetontonkanya ukuti ukutula fye apo bamunyina baishile mu ŋanda yandi no kwaafwa kwa kwa Yehova, kwalibako insansa, icibote, ne paalo lya kwa Lesa ifikala mu ŋanda yandi.” Ilelo, Maria ni Nte ya kwa Yehova yaipeela, iyabatishiwa.
Mu kusupila ukupepa kwa cine, kwalibako incende na imbi umo ubufuuke, nelyo ukubulwa bwene, bubomba ulubali lwacindama. Ilingi line nga nshi, umukashi mu lupwa alapokelela icine kabili afwaya ukubombela Lesa, lelo umulume alashimunuka. Nakalimo caliba icayafya ku balume bamo ukupokelela imfundo ya kuti kwalibako umuntu na umbi—Yehova Lesa—kuli uyo mukashi wakwe nomba afwile ukunakila. (1 Abena Korinti 11:3) Umwanakashi umo mu Chihuahua, Mexico, alombele isambililo lya Baibolo, kabili mu kupita kwa nshita wene na bana bakwe cinelubali balishile mu cine. Pa kubalilapo umulume wakwe alekaanya. Mulandu nshi? Pantu talefwaya ulupwa lwakwe ukuya luleshimikila ku ŋanda ne ŋanda, ukutambike fitabo fya Baibolo. Mu kumonekesha ayumfwile ifyo ici calemucefya. Ulupwa lwakwe, nangu cibe fyo, lwaiminine ulwashangila mu kupingulapo kwabo ku kubombela Lesa. Mu kupita kwa nshita umulume atendeke ukumona ukukatama kwa kupokelela imitantikile ya kwa Lesa. Lelo imyaka 15 yalipitilepo pa ntanshi ya kuipeela umwine kuli Yehova.
Ukupulinkana Mexico onse, kucili kwalibako amekalo ayengi ayatalukana uko abekashi ba cikaya bakwata indimi shabo isha cina India ne ntambi. Ubukombe bwa Baibolo bulefika kuli aba bantu kabili bulebaafwa ukuwamya icikulilo cabo, ilyo bamo balesambilila ukubelenga no kulemba ilintu balesambilila icine. Nangu cibe fyo, icishinka ca kuti abantu bakwata amasomo yanono nelyo ifikwatwa fya ku mubili ifinono tacipilibula ifyo kuti baba abacilapo kupokelela. Icilumba ca mushobo no kukakatila kwakosa ku fishilano fya fikolwe pa nshita shimo filenga cene ukuba icakosa kuli bamo ukupokelela icine. Ici na kabili cili e mulandu abo abapokelela icine ilingi line balulunkanishiwilwa ku bekala mushi bambi mu mishi ya cina India imo. E co ubufuuke bwaba mu misango iingi.
Ankulako mu Bufuuke
Nga iwe pa lobe? Bushe uleankula ku cine ca Cebo ca kwa Lesa? Nelyo bushe cili icakosa kuli iwe ukupokelela icine ca Baibolo? Nakalimo ulekabila ukuibebeta we mwine ukumona icilekucilikila. Bushe ulakalifiwa pa mulandu wa kuti icinabwingi ca bantu abakulilwa ku cine bafuma ku cikulilo ca pa nshi? Bushe icilumba ca pa lobe kuti cabimbwamo mu kutontonkanya kobe? Cili bwino ukubelebesha pa mashiwi ya mutumwa Paulo aya kuti: “Lesa asalile ifya buwelewele fya pano isonde ku kulenga bekatwe insoni aba mano; Lesa asalile ne fyanaka fya pano isonde ku kulenge fyakosa fibe ne nsoni; Lesa asalile ifyasaalulwa ne fyasuulwa, ifintu ifishabapo, ku kufumune fyabapo; ukuti umuntunse nelyo umo etakisha ku menso ya kwa Lesa.”—1 Abena Korinti 1:27-29.
Bushe kuti wakaana icuma pa mulandu fye wa kuti wacicisanga mu cipe ca fye ice bumba? Mu kushininkisha iyo! Nalyo line, iyo e nshila Lesa asalilamo ukutambika Icebo cakwe ica cine ica kupususho bumi kuli ifwe, nga fintu umutumwa Paulo alondolola ati: “Tuli ne cuma ici mu fipe fye bumba, ukuti ukucishamo kwa maka kube kwa kwa Lesa, kabili te kuntu kwafuma kuli ifwe.” (2 Abena Korinti 4:7) Ubufuuke no kuicefya fikatulenga ukumona umutengo wa cine uwa cuma kabili te “fipe fye bumba” fyeka, nelyo ifibombelo fya buntunse, ifileleta cene kuli ifwe. Ukucite co, na kabili tukengilishako ishuko lya ‘kubelama mu bushiku bwa bukali bwa kwa Yehova’ no kuba pa kati ka bafuuka “abakakwate calo.”—Sefania 2:3; Mateo 5:5.