Bakabilisha Ba Bufumu Bacita Lipoti

Icine ca Baibolo Caikatanya Ulupwa

ILELO, mu mbali ishingi isha calo, ukwikatana kwa lupwa kwaba fye mupepi no kuba icintu capita. Nangu cibe fyo, Baibolo isokolola inkama ya kwikatana kwa lupwa. Languluka amashiwi ya kwa Yesu aya kuti: “Onse uumfwe fyebo fyandi ifi no kuficita, akapashaniwa ku muntu uwacenjela uwakuulile iŋanda yakwe pa mwalala.” (Mateo 7:24) Amakana ya ndupwa pa kati ka Nte sha kwa Yehova balinonka ukwikatana pa kubomfya aya mashiwi na pa kubomfya Baibolo pamo ngo mufula wa kukuulapo icikakilo ca lupwa lwapalamisha. Bambi na bo balenonka ukwikatana kwa musango yo, nga fintu ica kukumanya cakonkapo cilelangilila.

Ilintu Daniel alebomba mu bushilika mu France, shimapepo wa bashilika ba nkondo atubulwile ukuti Daniel ashite Baibolo, ico acitile, kabili atampile ukubelenga yene lyonse. Mu kupita kwa nshita alikuushiwe ukuya ku Tahiti. Abashilika banankwe bamo aba kwa Daniel bali ni baAdventist, kabili bambi bali ni baMormon. Ukulanshanya kwabo ilingi line kwayalukile ku mutwe we lyashi uwa butotelo. Bushiku bumo mushika wa fita alondolwele Daniel ku mukashi wakwe, uwali umo uwa Nte sha kwa Yehova. Apoosele icungulo kasuba conse ukwasuka ifipusho ifingi ifya kwa Daniel kabili amwishibishe kuli cimo ica filonganino fya cikaya ifya Nte sha kwa Yehova mu Tahiti. Mu kwangufyanya atendeke isambililo lya Baibolo ilya lyonse.

Abafyashi ba kwa Daniel ku mwabo ku France bali ni baKatolika bafumaluka nga nshi. Wishi aali ciŋombe ca pa sukulu kabili ashingemwe no kufunda ifya butotelo pe sukulu lya ciKatolika. Pa kufwaya ukwakana na bafyashi bakwe fimo ifya cuma cakwe ica ku mupashi alesambilila, Daniel panono panono atendeke ukusokeleshamo amatontonkanyo ya Baibolo yanono muli bakalata bakwe kuli bene.

Pa kubalilapo nyina kwa Daniel alicankilwe, lelo lyene alitulumushiwe ukusanga ishina Yehova muli imo iya bakalata ba mwana wakwe. Inshiku shinono pa numa, aumfwile programu wa pa radio uyo alondolwele Inte sha kwa Yehova nge “cakaniko ca busanso.” Alembele Daniel, ukumulomba ukuleka ifikakilo fyonse ne Nte ilyo line fye. Nangu cibe fyo, Daniel alitwalilile ukucito kulunduluka mwi sambililo lyakwe ilya Baibolo kabili mu kwangufyanya acitile ukutantika kwa kufuma mu bushilika no kubwelela ku France.

Ashifika fye ku mwakwe na kabili, Daniel apoosele icungulo bushiku cimo na cimo—inshita shimo shimo ukufika fye no bushiku sana—mu kulanshanya kwalepa ukwa Baibolo na nyina. Mu kupelako alisumine ukukonka Daniel ku Ŋanda ya Bufumu. Lintu asangilwe ku kulongana kwakwe ukwa kubalilapo, alitemenwe nga nshi ica kuti atendeke ukukwata isambililo lya Baibolo ilya lyonse na o wine. Acitile ukulunduluka kwa lubilo lubilo kabili mu kwangufyanya alibatishiwe.

Wishi kwa Daniel ali muntu asuminisha ukuilumbulwila lelo uwaipeelesha ku ncito yakwe ne mibombele ya butotelo. Nalyo line, pa kashita kamo atwele umukashi wakwe na Daniel muli motoka kwi bungano lya citungu. Cali ni pa July 14, kabili akwete mu muntontonkanya ukuyatamba ifyangalo fya pa bushiku bwa mwikalwe ubwitwa Bastille Day mu musumba. Ilintu alepembelela apingwilepo, pa mulandu wa kufwaisha ukwishiba, ukumona mu kati ka ciyanda ce bungano. Alyebekeshiwe nga nshi ku muyano no mutende ifyo amwene pa kati ka bantu ba kwa Yehova, kabili ilyo aleendauka mu madipartimenti ye bungano ayalekanalekana uuli onse atwalilile ukumwita ati “munyina.” Alilabile fyonse pa lwa fisela fya pa bushiku bwa mwikalwe ubwitwa Bastille Day no kwikala kulya ukufikila pa mpela ye bungano. Alombele isambililo lya Baibolo kabili acitile ukulunduluka kwa lubilo lubilo mu kusambilila icine. Nangu cibe fyo, ilyo acilileko ukusambilila, e lintu acilileko ukuyumfwa uwabipilwa pa lwa ncito yakwe, e co pa mushinku wa myaka 58, alekele incito yakwe. Nomba bonse batatu mu lupwa baliipeela no kubatishiwa kabili balikatana mu kubombela Yehova capamo.

Cali cine ca Baibolo icaikatenye ulupwa lwa kwa Daniel. Na kabili kuti caikatanya indupwa shimbi nga ca kuti basambilila no kubomfya cene no mutima onse.