Abapampamina pa Kubombela Yehova!

“TAULI na kuya mu kushimikila!” “Wikaleka abantu bobe ukwisa mu kutandala pano!” Abanakashi ba Bwina Kristu abengi balomfwa uku ukulumbulula no kwapalako ukufuma ku balume babo abakaanya. Lelo lintu aba baume balebomba mu bushilika, abakashi babo balolenkana no kusonsomba kwaibela ukwa citetekelo cabo. (Esaya 2:4; Yohane 17:16) Ni shani, lyene, fintu abakashi ba Bwina Kristu aba musango yo babomba pa kutwalilila ukuba abakosa lwa ku mupashi kabili abapimpa mu mulimo wa Bufumu?

Bucishinka kuli Yehova Lesa ukwendela pamo no mupampamina wa pa lwabo filabaafwa ukuba no mukoosha. “Ndetontonkanya ifyo cali mupampamina wandi wine uwakosa,” e fyalondolola Yvonne, umukashi wa mushilika. “Nalishibe ukuti kufwile kwaliko inshila sha kubombelamo no kukaanya kwa mulume wandi.” Mu cine cine, e ko shali.

Umwanakashi wa Bwina Kristu na umbi, uwaupwa kuli mushika wa fita, ashimika fintu ukwiminina kwakwe ukwabamo mupampamina kulenga fye no bumi ukuba ubwacilapo kwanguka ku mulume wakwe. “Alishiba ukutantika kwandi bwino nga fintu aishiba ukwakwe, kabili abantu babomba mu bushilika balatesekeshe co,” e fyo alondolola. Nangu ni fyo, umulimo wakwe uwatwalilila kuli Yehova te nshila yayanguka.

Ukucimfya Ukutalalilwa

Abakashi ba bashilika ilingi line balolenkana no kusonsomba kwa kukuuka kwa mu kupumikisha nga ca kuti bali no kukonka abalume babo uko batwelwe ukushailepela ukufuma ku ŋanda. Lyene, ukwikala mu fyashingulukako bashabelesha, caliba icayanguka ukuyumfwa uwapaatulwako. Lelo ici tacifwile kube fyo. Abo babombela Yehova balishuka. Kushuka nshi uko? Ukulingana no mutumwa wa Bwina Kristu Petro, caba “ba bwananyina.” Abo nomba bafika mu mamilioni mu mpendwa, Inte sha kwa Yehova mu fyalo 231 babomba pamo ngo lupwa lukalamba ulwa Bwina Kristu, “bumunyina.” Kuti wabasanga mupepi na pali ponse.—1 Petro 2:17, NW utulembo twa pe samba.

Susan, uwakuushiwe mu kupumikisha ukufuma mu ncende ya ku mwabo, aile ku kwikala pa nkambi ya bashilika ba mulwele uko umulume atuminwe. Umupya mu citetekelo kabili pe samba lya kutitikisha ukufuma ku mulume wakwe uushasumina ku kuleka ukwakana mu butumikishi bwa Bwina Kristu, ashimiko kuti: “Ilyo line fye naile ku kulongana kwa cikaya, kabili kulya nali na maka ya kwikala no kulanda na bankashi bambi. Mu cishinka kuti nalando kuti cali ni uku kubishanya e kwanengele ukutunguluka.”

Inshita shimo shimo ukutalalilwa kulenga ukupopomenwa. Nelyo fye ni lyo, imbila nsuma ipayanya ukusansamusha kwa kuyumfwa uwapokelelwa. Glenys, nkashi umwina England uwaile no mulume wakwe lintu atuminwe ku nse ya calo, ashimiko kuti: “Lintu mu cine cine napopomenwe, mu kupumikisha, umuntu umo uyo naishibe imyaka iingi iyapitapo lintu nali mu bushilika ne mwine alilembele kalata no kusoso kuti nomba line alibatishiwe pamo nga umo uwa Nte sha kwa Yehova. Ico calinkoseleshe pa nshita fye iyalinga.”

Jane, uwaile no mulume wakwe ku Kenya, asangile ukuti ukulongana kwa Bwina Kristu kwashinine ukuba ukwa kupuutamo ubumi, nelyo cingati kwalecitwa mu ndimi ashaishibe. “Nalishibe ukuti kuno e ko Yehova alefwaya ine ukuba,” e fyo alondolola. “Nali na bamunyinane, kabili bali kwati ca kupuutamo ubukose. Balimpokelele, kabili nayumfwile ukuti twali ulupwa.”

Jane ali fye ni umo uwa bengi ababa muli iyi mibele abasangile balupwa lwabo aba ku mupashi abo ashaishibe fye no kwishiba ukuti alibakwete!—Marko 10:29, 30.

Uwashangila mu Kulolenkana no Kukaanya

“Mwitila naisa ku kuleto mutende pano isonde,” e fyasokele Yesu. “Nshaisa ku kuleto mutende, kano lupanga.” (Mateo 10:34) Cinshi cintu apilibwile? Nelyo fye mu kati na nkati ka lupwa, umo umutende wingenekelwa, kuti kwabako “ukufwintwa kwa mu kupumikisha ukwa lupanga,” e fyalandapo A. T. Robertson muli Word Pictures in the New Testament. “Kabili,” e fyalandile Yesu, “aba mu ŋanda yakwe e bakaba abalwani ba muntu.” (Mateo 10:36) Fintu aya mashiwi yashinina ukuba aya cine lintu umunankwe wa mu cupo ali uwa bulwani ku cine!

Lintu Diane atendeke ukusambilila Baibolo ne Nte sha kwa Yehova, umulume wakwe, mushika wa fita fya mu lwelele, alikalifiwe nga nshi. Kusonga nshi ici cakwete pa cupo cabo? “Cali kwati libwe lya menshi makasa ilyaleisa pa kati kesu,” e fyalondolola Diane. “Twalyupene mu nsansa. Mu kupumikisha twaleikala fye mu ŋanda imo ine ukwabula ukusoshanya.” Ni shani, lyene, fintu abombele? “Ukushininwa kwa pa lwandi no mupampamina e fyabombele, capamo no kwaafwa ukufuma kuli Yehova no mupashi wakwe.” Diane asungile mu mutima ica kumwenako ca mu Baibolo ica kwa kasesema Daniele.

Lintu aulwilwe ukutwalwa bunkole ku Babiloni no kupeelwe ca kulya cishasuminishiwe ku mubomfi wa kwa Lesa, Daniele “apangile mu mutima wakwe ukukanaikowesha ku fya maliila ya mfumu.” Ee, Daniele acitile ukupingulapo kwaibukila. Apampamine mu mutima wakwe ukukanaikowesha pa kulya ifyo fya kulya. We bukose lyene alangilile ilyo “alombele kuli cilolo wa bamutungwi ukuti amusuminishe ukukanaikowesha”! Ica kufumamo? Yehova apaalile ukwiminina kwakwe ukwa mupampamina.—Daniele 1:8, 9, 17.

Mu kupalako ilelo umulume uukaanya kuti pambi apampamina ukuti umukashi wakwe aleke ukusangwa ku kulongana kwa cilonganino. Ni shani fintu alingile ukwankulako? Jane aisangile umwine muli iyi mibele. Alondololo kuti: “Nshali na kunenuka pe samba lya kutitikishiwa. Nalishibe ifyo te kuti kubeko ukusuusuka. Nali no kulangisha fintu ukulongana kwali ukwacindama kuli ine.” Yehova alipaalile umupampamina wakwe ilyo atwalilile ukusangwako.

“Umulume wandi aeseshe ukunkaanya ukulaya ku kulongana, lelo ico tacakokwele nga nshi,” e fyashimika Glenys. “Nalyo line naleya. Lintu nabwelele ku ŋanda, inshita shimo shimo alempuma, kabili pa nshita shimbi aleba fye tondolo.” Lelo, alibombele ne mibele, ukupepa mu kubwekeshabwekeshapo. Na kabili, babili aba baeluda ba mu cilonganino lyonse bapepele na wene, icamukoseleshe apakalamba ukutwalilila ukusangwako.—Yakobo 5:13-15; 1 Petro 2:23.

Pa nshita shimo shimo abakalamba ba ku ncito aba mulume kuti pambi bamupatikisha ukufuupula umukashi wakwe ukufuma ku kushimikila imbila nsuma. Diane asangile ukuti ali no kucilenga ukumfwika ku mulume wakwe icali ifiise ntanshi fyakwe. “Nali uwaipekanya,” e fyo asosele, “ukupokelela ifya kufumamo fya kushimikila kwandi ukwatwalilila.” Fintu uku kwimina kupalile ukwa batumwa! (Imilimo 4:29, 31) Nangu ni fyo, ali uwacenjela mu kushimikila kwakwe. Ashimika ukuti: “Nalelaalika abeni ku kwisanwako kofi kabili nalepeela uuli onse usangilweko icitabo ca Icine.”—Mateo 10:16; 24:14.

Ukunakila Ukwabula Ukusuusuka

Nangu ca kuti balaba mu kumanama ku kukanshika kwa mu cupo, abakashi ba Bwina Kristu balolesha ku ntanshi kabili bashintilila pali Yehova. Ici cilabaafwa ukusungilila imimwene yashikatala. Balapeela abalume babo ukwaafwa ukuli konse ukufika apo bengapesha ukwabula ukusuusuka mu citetekelo cabo. Pa kucite fyo, bakonka ukupanda amano kwapuutwamo ukwa kwa Petro ukwa kuti: “Mwe bakashi, petameni ku balume benu.” (1 Petro 3:1) Muli The Amplified New Testament, uku kukambisha kwa butumwa kubelengwo kuti: “Inashisheni mwe bene pamo nga ba cibili kuli bene kabili abashintilila pali bene, kabili iteulwileni kuli bene.” Mona fintu Jane akonkele uku kupanda amano. “Umulume wandi anjebele ukuti ico nalefwaya ukucita tacifwile ukucilima umulimo wakwe,” e fyo alondolola. “E co naeseshe ukusanga inshila ningamwafwilamo.”

Abakashi ba Bwina Kristu bamo muli fyo balisumina mu kusangwa ku kubungana kwa kwangalila capamo uko abalume babo betilwe. Lelo nalyo line bapampamina ukukanasuusula iciteteko cabo. Jane asendeleko inshita ku kulanda ku mulume wakwe pa lwa ici. Mu cikuuku alondolwele ukuti ali uwaitemenwa ukusangwako lelo talefwaya ukusangwako kwakwe ukulenga umulume wakwe insoni. “Nalishibe ukuti mu tushita mu tushita bonse abasangilweko baleenekelwa ukwiminina no kwakana mu kunwa kubimbamo ukucindikisha abantu. Nalisambilile ukuti bucishinka buli no kulangwa fye kuli Yehova epela, kabili ukunwa kubimbamo ukucindikisha abantu kwalicilile pa kulanga fye umucinshi. Umulume wandi amwensekeshe fintu imibele ingaba iyabipa, e co alandile fye ukuti: ‘Wiisako!’ Nalyumfwilile.”

Glenys, pa lubali lumbi, aliile no mulume wakwe ku kubungana kwa musango yo, lelo alolekeshe bamushika bali pa lutwe lwe tebulo. Lintu abamwene ukuipekanishisha ukutendeka incitilo ya kunwa kubimbamo ukucindikisha abantu, mu kucenjela alifuminemo ukuya ku cimbusu! Ee, aba banakashi baiteulwilile ku mibele lelo tabatalile abasuusuka.

‘Ukukolopekwa Ukwabule Cebo’

“Nga ca kuti nawamyako amaka yandi ngo mukashi, umulume wandi akamona ukuti icine cilengalula,” e fyapelulwile Yvonne. E co abelengele icipandwa mu citabo ca Ubumi bwa Lupwa pa mutwe wa kuti “Umukashi Uwatemwikwa Apakalamba” imiku ne miku.a “Napeeleshe ukusakamana kwaibela ku fyebo pe samba lya kamutwe kanono ‘Abalilila, Abatefya’! Lelo nasangile ukuti ilyo nacilileko ukwesha ukulanda no mulume wandi, e lyo ifintu fyalebipilako.” Mu kupelako, nangu ni fyo, alitungulwike mu kwaafwa umulume wakwe ukubombela Yehova. Shani? Pa kubomfya icishinte calondololwa pali 1 Petro 3:1, ukuti abalume “bakolopekwe ukwabule cebo.”

Inshila abanakashi ba Bwina Kristu basakamaninamo indupwa shabo ilacita ifyafula ku kutasha Ubwina Kristu kuli bambi. “Naeseshe ukulenga icine ukumoneka ica kucebusha ukufika apo ningapesha,” e fyashimika Diane. “Lintu naile ku kulongana, umulume wandi aleyumfwa uwatalalilwa nga nshi, e co nashininkishe ukuti abana nabakambishiwa ukuisunga bwino lintu twafikile pa ŋanda. Na kabili naeseshe ukupeela ukusakamana kwalundwako kuli wene lintu twabwelele.” Panono panono imibele ya mutima iya mulume wakwe yalyalwike ilyo aleankula ku kusakamana kwa cikuuku ukwa lupwa lwakwe.

Ababomfi banensu aba kwa Yehova na bo bene kuti bayafwa. Jane ashimika ukuti umulume wakwe aipakishe ukwisha na bamishonari Inte akumenye mu Kenya. “Bapangile ifibusa no mulume wandi no kulanda pa lwa mupila wa ku makasa, kabili bali aba cilela nga nshi. Pa tushita utwingi, twalelaalikwa ku mayanda ya bamishonari ayapusanapusana ku ca kulya.” Umulume wakwe pa numa alondolwele ukuti: “Natendeke ukumona icitetekelo ca kwa Jane ukufuma ku mimwene yapusanininako fye. Ifibusa fyakwe bali bantu bacenjela nga nshi abengalanda pa malyashi yalekanalekana.” Mu kupalako, umulume wa kwa Diane ayalwile imimwene yakwe pa lwa cine. Lintu motoka aleensha afwile, Nte wacaice alishile mu kumwaafwa. “Ico calinjebekeshe mu cine cine,” e fyo asosa.

Kwena, te banabo ba mu cupo bonse abakolopekwa ku cine. Cinshi lyene? Yehova alapayanya ukwaafwa ku kupeela aba busumino amaka ya kushipikisha. (1 Abena Korinti 10:13) Languluka ukukoselesha kwa kwa Glenys kuli abo abali mu mibele yapala ku yakwe: “Te kwesha, te kwesha nangu panono ukutwishika ukuti Yehova e Umo uwatendeke icupo no kuti afwaya abaupana ukwikala capamo. E co te mulandu ne co umulume engacita nelyo musango wa kukaanya wingapokelela ukufuma kuli abo bakushinguluka, Yehova takabale akusuminisha ukutelententa.” Nangu ca kuti umulume wakwe acili tapepa Yehova, imibele yakwe iya mutima ukulola ku mukashi ne cine yaliwaminako.

‘Tanda ne Filamba; Seepa no Tupundu’

Ca cine, aba banakashi ba Bwina Kristu baliba abapampamina pa kubombela Yehova. Nga ca kuti uli mu mibele yapalako, cipange ukuba e mupampamina obe na iwe. Ibukisha ukukonkomesha kwa kuti: “Yehova Lesa wenu e o muletiina; e o mulebombela; kabili kuli wene e ko mulelambatila.”—Amalango 10:20.

“Uusende cipe ca mbuto, ukuya aleya no kulila; ukwisa akesa no tupundu, nasende myanshi yakwe,” e fyabilisha kemba wa malumbo. (Ilumbo 126:6) “Ulalila ifilamba ifingi ilyo wesha ukulanga umwina mobe icine, atemwa mu cinshinshi nelyo mu mashiwi,” e fyasumina Nte umo. “Lelo ku mpela waula akapundu pa mulandu wa kuti nelyo fye nga ca kuti tapokelele icine, Yehova alakupaala pa kubombesha ucita.”

Bonse abalebombela Yehova mu busumino te mulandu no kukaanya pa ŋanda baletashiwa nga nshi. Bawaminwa ukwaafwa no kutemwa. Shi nabasungilile ukwiminina kwabo ukwa kubulo kusuusuka, abapampamina pa kubombela Yehova!

[Futunoti]

[Icikope pe bula 28]

Isambililo lyabamo ipepo lilakosha umupampamina wa Bwina Kristu