Inte sha kwa Yehova Ukushinguluka Icalo—Thailand
“ICALO ca bantungwa.” Ubo e bupilibulo bwe shina Thailand. Imfundo shalekanalekana isha butotelo shilakonkwa ku bekashi abanakilila, ababombesha abacila pali 57,000,000. Nangula ca kuti ubuBuddha bwalyandatila, amabutotelo ya Kristendomu na yo yene yalabeleshiwa muli ici calo ca mu Asia icabela pa kati ka kapinda ka ku kulyo na kabanga. Aba bonse abantu balakabila ukumfwa imbila nsuma ya Bufumu bwa kwa Lesa.—Mateo 24:14.a
Imbutushi Shaumfwa Imbila Nsuma
Mu nkambi shasalangana ukupulinkana impili sha Thailand mu lulamba lwa mupaka wa Myanmar, icine ca Baibolo cilelunduluka pa kati ka mbutushi sha ciKaren ishacila pali 10,000. Ifilundwa fya lupwa lumo ulwa ciKaren ulwikala muli cilya cifulo ni Nte sha kwa Yehova. Balananya imbila nsuma pa kati ka mbutushi. Ni shani fintu umulimo wabo watendeke?
Imyaka iingi iyapitapo umulumendo aputwile ifikakilo fyakwe kwi Calici lya Anglican no kusanguka umo uwa Nte sha kwa Yehova. Pa kutunkilishiwa na minista wabo, balupwa lwakwe balimulwishishe. Nangu cibe fyo, alishipikishe mu kutekanya, kabili ukukaanya kwa lupwa lwakwe mu kupelako kwalinakileko. Bashibutotelo be Calici lya Anglican batwalilile ukupumya kwabo ukufikila mupepi ne myaka ibili iyapitapo lintu batamfiwe mu fifulo fyabo pa mulandu wa myendele ya bucisenene. Apantu icalici lyene talyakwete kacema, ulupwa lwapalamisha na bantu bambi aba kwa Nte balitulumushiwe no kupelelwa. Aba muli bene 11 balifumine mwi calici no kwipusha Inte ukusambilila Baibolo na bene.
Uku ukusambilila kwalilundulwike icawamisha, mu kuba ne mbutushi shimbi ukwakanamo. Icine calyanene mu kwangufyanya, ukufumamo ukubatishiwa kwa Nte shipya 17 mu mumana wapitile ukupulinkana inkambi ya mbutushi. We kashita ka nsansa lintu nakulubantu wa myaka ya bukulu 88 aibishiwe na bene!
Video Yabalamuna Ubuseko
Ukwenekela kwa kukula kuli kukalamba pa kati ka mbutushi. Mu 1993 pa kusefya kwa Cibukisho, abantu 57 balisangilweko. Mu kati ka kutandala kwa kwa kangalila wa muputule mu May wa ulya mwaka, 67 balibungene kuli limo ilya malyashi yakwe. Kabili mupepi na 250 balilongene ku kutamba video ya Watchtower Society Jehovah’s Witnesses—The Organization Behind the Name.
Umukashi wa kwa shimapepo wa ku Baptist mu nkambi ya mbutushi alisangilwe ku lyashi lya cintubwingi ilya Baibolo ilyateyanishiwe ne Nte kabili alembele amalembo ya mu Baibolo ayalanshanishiwe. Aebele umulume wakwe fintu aali uushaikushiwa na malyashi ya kubwekeshabwekeshapo ayaleumfwika pe calici lyabo. Umulume alikeenye, ukusoso kuti nga ca kuti umukashi aali no kuya ku kulongana kwa Nte sha kwa Yehova, abalesangwa kwi calici bonse baali no kukonka. Lintu na kabili umukashi asangilwe ku kulongana, umulume wakwe alimukunkunike mu kuba no mwele kabili aocele ifyalembwa fyakwe ifya ku kulongana ne mpapulo sha Baibolo. Te mulandu ne co, lintu video yalangishiwe, alishile na kabili. Pa numa uyu mwanakashi aebele umulume wakwe cintu amwene. Mu kuba no mutima wayalulwa, afwaile ukumona video kabili ayumfwile uwa bulanda ukuti alyocele ifyalembwa fya mukashi ne mpapulo sha Baibolo.
E fyo abantu baleumfwa imbila nsuma mu Thailand. Muli yo nshila balenonka ubuntungwa bwa ku mupashi mu “calo ca bantungwa.”—Yohane 8:32.
[Futunoti]
a Ku fyebo fyalundwako, mona Kalenda ya Nte sha kwa Yehova iya 1994.
[Akabokoshi pe bula 24]
UKULONDOLOLA IMIBOMBELE YA CALO Umwaka wa Mulimo uwa 1993
IMPENDWA YA PA MUULU ABALECITILO BUNTE: 1,434
ICIPIMO: Nte Umo kuli 40,299
ABASANGILWE KU CIBUKISHO: 3,342
AVAREJI WA BAKASABANKANYA BAPAINIYA: 232
AVAREJI WA MASAMBILILO YA BAIBOLO: 1,489
IMPENDWA YA BABATISHIWE: 92
IMPENDWA YA FILONGANINO: 39
IOFESI LYA MUSAMBO: BANGKOK
[Icikope pe bula 25]
Bakabilisha ba Bufumu mu kupimpa baleshimikila imbila nsuma
[Icikope pe bula 25]
Iofesi lya musambo ilya kubalilapo, 1947
[Icikope pe bula 25]
Ulupwa lwa Bethel pa ntanshi ye ofesi lipya ilya musambo mu Bangkok, lyapeelwe pa February 8, 1992