Ukubomba no Kufuluka mu Mulimo wa kwa Lesa

YESU KRISTU akambishe abakonshi bakwe ukuti: “Kabiyeni, kalengeni aba nko shonse ukuba abasambi.” (Mateo 28:19) Ku Bena Kristu abengi, ukufikilisha uko kutumwa kwapilibula ukupokelela imibele yaafya ukwalepesha ukufuma ku mwabo. Bakangalila benda, abakashi babo, na bambi balasha ku numa ifintu ifingi pa mulandu wa mulimo wa kwa Lesa. Ukufuluka kuti kwaba kusonsomba kwine kwine kuli aba bonse Inte sha kwa Yehova.

Ukufuluka kucitika lintu ifibukisho fyabwelela ku numa ku mutelelwe no kutemwa ifya nshita ya ku numa iyawama. Ici kuti calenga inkuntu shafinininwa ica kuti wayumfwa uwapopomenwa kabili uwabula amaka ya kutwalilila. Na kuba, pa numa ya kushitisha ifipe fyabo no kupango bulendo bwakosa umutengo ukuya ku calo ca cilendo, bamo balifilwa ukufikilisha amapange yabo no kubwelela ku mwabo. Ukufuluka kwalibacimfishe.

Ukusansa kwa musango yo pa nkuntu ilingi line kucitikako libili libili ukukonka pa kukuuka kwa kubalilapo, lelo kuli bamo kulatwalilila inshita ya bumi bonse. Pa numa ya kufumapo pa myaka ukucila 20, Yakobo ‘afulukishe ŋanda ya kwa wishi.’ (Ukutendeka 31:30) Ni nani engenekela ukufuluka? Cinshi cibalamuna kwene? Ni shani fintu umuntu engabomba no kuyumfwa kwa musango yo?

Cinshi Cibalamuna Ubulanda?

Ukufuluka kuti kwakuma uuli onse. Amytis, umwana mwanakashi wa mfumu ya ku Media Astyages, mu kumonekesha alikwete umulandu uuli onse uwa kubela uwa nsansa: ifyuma, ubusambashi, iŋanda yayemba. Nalyo line, alefuluka nga nshi impili sha ku Media ica kuti umulume wakwe, Imfumu Nebukadnesari, alimine amabala pa muulu wa malinga ya Babiloni mu kubombesha kwa kumusansamusha.

Ukufuluka kuti kwaba ukwa kwesha ukucilisha lintu ubumi bwamoneka ukuba ubwacilapo kwafya pa fintu bwali pa ntanshi umuntu aali talasela. Lintu abantu ba ku Yuda basangwike bankole, balilishike ukuti: “Pa milonga ya ku Babele, e po twaikele no kulila pa kwibukisha Sione. Kuti twaimba shani ulwimbo lwa kwa Yehova muno mpanga imbi imbi?”—Ilumbo 137:1, 4.

Ifintu ifingi kuti pambi fyabalamuna ukubombomana kwa kufuluka. Terri, uwashile Canada, atila: “Bushiku bumo icikope ca lupwa caliponene ukufuma mu citabo. Lintu nacitolele, ukufuluka mu kupumikisha kwalinshingulwike, kabili nalililile.” Chris, uwakuukile ukufuma ku England ukuya ku calo icipiina nga nshi, asumino kuti: “Ukwishiba fye iciunda ca lwimbo lwa kale nelyo icena ca ca kulya caishibikwa kuti fyanenga ukufuluka ifintu nashile ku numa.”—Linganyako Impendwa 11:5.

Ifikakilo fyapalamisha ifya lupwa ilingi line fyaba ca kusangwilako. Roseli, umwina Brazil nomba uwikala mu calo ca mu bwina mupalamano, alandapo kuti: “Ndayumfwa ukubipilwa lintu naumfwa imbila ya bulanda ukufuma ku ŋanda ilyo nshingaba kulya ku kwaafwa. Inshita shimo shimo cilacilapo kubipa lintu nshumfwilepo akalyashi nangu kamo kabili ntampa ukwelenganya ifintu.” Janice akuukile ukufuma ku North America ukuya ku kalitauni kanono mu ncende shakabisha isha Amazon. Asoso kuti: “Ndafuluka lintu naumfwa ilyashi lisuma ukufuma ku ŋanda. Lintu naumfwa fintu baleipakisha capamo, mfwaya ukuba pamo na bene.”

Tacili kusha fye abantu ku numa e kulenga ukufuluka. Linda alondolola ukuti: “Nalepelenganishiwa lintu nshaishibe ukwa kushita ifintu nakabile. Nshaishibe imitengo nelyo ifya kukabushanya. Ukukwata motoka kwali ukwa mutengo nga nshi, kabili lyonse nalesunkwa pa nshi ilyo naleshomboka ukunina motoka wa cintubwingi. Ici canengele fye ukufuluka ku mwesu.” Ukulanda pa lwa mupokapoka wa ntambi ne fya bunonshi, Janet alondololo kuti: “Cali bupiina e bwalenkalifya. Nshabalile monapo abantu balelomba icilyo, nelyo indupwa ishikalamba bonse ukwikala mu muputule umo fye ukwabula imipompi ya menshi. . . . Ifintu fya musango yo fyalinkalifye apakalamba ica kuti nayumfwile ifyo te kuti ntwalilile ukwikala kulya.”

Ukubomba no Kuyumfwa Kobe

Tatulingile ukuyumfwa aba nsoni pa lwa kukwata ukuyumfwa kwa mu nkuntu ukwaluma ku bantu twatemwa nelyo ku fyashingulukako fyatemwikwa ifyo twalemona mu myaka lintu twalekula. Yehova Lesa atupeele inkuntu pa kuti twingalaipakisha ukwampana kwa pa lwesu ukwa cikabilila. Bakangalila ba Bwina Kristu aba mu cilonganino ca Efese bali baume bakosoka lwa mu nkuntu. Lelo cinshi cacitike lintu ukutandala kwa mutumwa Paulo kuli bene kwapwile? Iye, “bonse balilile icibi, kabili bawile Paulo pa mukoshi, balamufyompa”! (Imilimo 20:37) Kwena, ico ca kucitika tacabimbilemo ukufuluka ku ŋanda. Lelo, ciletupeela ifya kutontonkanyapo. Ca cifyalilwa ukukwata imyumfwile, lelo tatulingile ukuleka yene ukutulama. Ni shani, lyene, wingabomba no kufuluka mu kutunguluka?

Ukusambilila ukulanda ululimi lwa cikaya e lufungulo ku kuyumfwa umukaya. Ukuyumfwa kwa kufuluka kuti pambi kwakula lintu ukumfwana kwacefiwa pa mulandu wa kuti ulebomba no lulimi lwa cilendo. Nga cingacitika, kanshi, sambilila ukubelenga no kulanda ululimi lwa citungu pa ntanshi taulakuukila kulya. Nga te ifyo, posesha amano pa masambililo ya lulimi mu kati ka milungu ya kubalilapo iinono pa numa ya kufika. Ilyo e lyo ukwata ukucincisha kwaluma na muli fyo e lyo ukwata icilolelo cawamisha ica kusambilila lwene. Nga ca kuti wapeelesha apakalamba iyi milungu ku kusambilila ululimi, mu kwangufyanya ukalaipakisha ukulanshanya, kabili ico kuti cayafwa ukucefyako ukuyumfwa kwa kufuluka.

Panga ifibusa fipya mu kwangufyanya nga nshi ukufika apo wingapesha, apantu ici cikakwaafwa ukuyumfwa kwati ni ku mobe. Icilonganino ca Nte sha kwa Yehova e cifulo cawamisha ukupangilapo ifibusa fya cine cine. Buula ukuitendekelako kabili ba uwa buseko muli bambi. Cito kubombesha ukufika ku kwishiba icikulilo cabo, ulupwa lwabo, impika shabo, na mabuseko yabo. Laalikako abasumina banobe ku ŋanda ku mobe. Mu kukonkapo, ukasanga ukuti bambi bakabuula ubuseko muli iwe.

Pa kati ka bantu ba kwa Lesa, bucibusa kuti bwaba ubwapalamisha nga nshi kwati fye fikakilo fya lupwa. Yesu atile: “Onse uucite co Lesa atemwa, wene e ndume nandi ne nkashi yandi na mayo.” (Marko 3:35) Kristu na kabili aebekeshe abakonshi bakwe ukuti: “Takuli nangu umo uwashile ku mwabo, nangu ni bamunyina, nangu ni nkashi, nangu ni nyina, nangu ni wishi, nangu bana, nangu filime, pa mulandu wa ine na pa mulandu wa mbila nsuma, uushakapokelele nomba mu nshita ino ifya miku umwanda umo, amayanda, na bamunyina, ne nkashi, na banyina, na bana, ne filime, pamo ne fya kupakasa; na mu bwikashi ubukesa umweo wa muyayaya.” (Marko 10:29, 30) Mu kuba na bumunyina bwa ku mupashi ubwawamisha ubwa musango yo, tatuba fweka, nelyo fye ni mu calo iceni.

Ukusungilila bucibusa na abo abashala ku cifulo ca ku mwenu na ko kuti kwakwaafwa ukubomba no kufuluka. Kuti pambi wasunguka ukusanga ifyo apo nomba nusela, ukumfwana na umbi ukupitila muli kalata kuli ukucilisha kwabamo bupilibulo, apantu uli no kupeela ukutontonkanya kwafulilako ku mashiwi yobe. Kukabako ifintu fya kucincimusha ifya kusosa. Janet, uulumbwilwe mu kubangilila, atubululo kuti: “Ukutuma lamya pa ntamfu yalepa kwalikosa umutengo, lelo ukutuma kaseti wakopwamo ishiwi ukupitila mu melu kwalinakako mutengo. Ukulanda kuli mashini kumfwika ukweni pa kubalilapo. Lelo, nga ca kuti walanshanya na umo ukupitila muli maikrofoni, cilaba icayanguka kabili ciba ica kulengo buseko.” Kuti na iwe walomba ukukutumina kaseti wakopwamo amashiwi lintu bakasuka.

Shirley, uwakuukile ku Latin America ukufuma ku United States imyaka 25 iyapitapo, asoso kuti: “Lyonse nemba pa lwa fya kukumanya fya kukuulilila ukucila impika. Ici cikoselesha bambi ukutwalilila ukunembela.” Sakamana, nangu cibe fyo. Ukulemba amakalata kwacishamo kuti kwakucilikila ukufuma ku kupanga ifibusa fipya. Del, uwakuukile ukufuma ku Canada ukuya ku calo cimbi, asoso kuti: “Sengauka ukwikala pa ŋanda no kulatontonkanya pa fintu ulepusulwa. Ukucila, kabiye no kuipakisha icifulo cobe icipya.”

Ishiba imyata ya calo cipya, ilyashi lya kale, umusamwe, ne fifulo fya kusekesha kabili ifyayemba. Ici cikakwaafwa ukukanatontonkanya pa fintu fyapusanako. Kabili nga ca kuti wapingulapo ukwikala kuntu ukuukile, te kuti ciwamishe ukutandalila icalo ca ku mwenu mu kwangufyanya nga nshi nelyo libili libili. Cisendako inshita ukupangako ifibusa no kufika ku kubelesha ifyashingulukako fipya. Ukutandala kwalepa ukubwelelamo ku cifulo kuntu wafuma kulacilima iyi mibombele. Lintu wabelesha fye icifulo cipya, kuti waipakisha ukuya ku mwenu ku kutandala—kabili lyene ukubweluluka. Pali ino nshita, twalilila ukuba uwapamfiwa mu kukuulilila ukukakatila ku cifulo cobe icipya.

Twalilila Ukulolesha ku Ntanshi

Yehova atupeele isonde lyonse ngo mushi wesu. (Ilumbo 115:16) Mu kuba no mupashi wa Bwina Kristu uwa buseko, ubumi kuti bwaba ubwawama mu cifulo icili conse. Nga ca kuti waselela kumbi mu kutwala pa ntanshi amabuseko ya Bufumu no kushimikila imbila nsuma mu calo cimbi nelyo ku cifulo cimbi mu calo ca ku mwenu, cite co mu kuba no kwenekela kwa nsansa. Lolesha ku ntanshi ku kupangako ifibusa fipya, ukusambilila pa lwa myata yalekanalenaka, ukupanga abasambi, nelyo ukucite fintu fya kulambula mu mulimo wa kwa Lesa.

Yehova Lesa ni Cibusa umo uyo lyonse akaba na iwe, te mulandu na kuntu uli. (Ilumbo 94:14; 145:14, 18) E co palamina kuli wene mwi pepo. (Abena Roma 12:12) Ici cikakwaafwa ukusunga mu muntontonkanya imifwaile yobe mu bumi ngo mubomfi wa kwa Lesa. Abrahamu na Sara basungilile imifwaile yabo mu muntontonkanya lintu bashile umushi wabo uwa busambashi mu musumba wa Uri. Mu cumfwila ku kukambisha kwa kwa Yehova, bashile ku numa ifibusa na bantu babo. (Imilimo 7:2-4) Nga ca kuti balitwalilile ukwibukisha no kufuluka icifulo bashile, nga balikwete ishuko lya mu nshita ilya kubwelelako. Lelo baletinamina icifulo cawaminako—mu kupelako ubumi pe sonde lya paradise pe samba lya Bufumu bwa kwa Lesa ubwa mu muulu.—AbaHebere 11:15, 16.

Ukushimikila mu mabala ya cilendo nelyo uko ukukabila kuli ukwakulilako kuli bakabilisha ba Bufumu mu calo ca ku mobe kuti kwaba ukwa kusonsomba nga nshi. Lelo na kabili kwaba mulimo wa kusandulula kabili uwa kulambula nga nshi. (Yohane 15:8) Kabili nga ca kuti amatontonkanyo yapusanako yakushinguluka pa kashita kanono, kuti yacimfiwa pa kusungilila ubuyo bobe mu muntontonkanya no kulolesha ku ntanshi. Nkashi mishonari umushimbe atile: “Lintu nayumfwa ubulanda, njesha ukutontonkanya pa lwa calo cipya na fintu umutundu wa muntu onse ukaba ulupwa lumo.” Amatontonkanyo yawamisha ukupala aya kuti yakwaafwa ukusungilila ubuseko bobe no kukananakila ku kufuluka.

[Icikope pe bula 29]

Ukufuluka takulekabila kupumfyanya ubutumikishi bwa Bwina Kristu