Mulandu Nshi Uwa Kubela no Buseko mu Butotelo?

MU CALO icili conse ica pe sonde, mwalibamo ubuseko mu butotelo. Pa lubali lumbi, kwalibako abengi nga nshi abasoso kwabulo kulamba ukuti tabakwata ubuseko mu butotelo. Lelo bushe na kale baleyumfwa muli yo nshila?

Imipangilwe ya buntunse yaba mu musango wa kuti umuntu tekushiwa mu cituntulu mu kuba fye ne fintu fya ku mubili. Abantunse bakabila bumupashi. Imikalile ya bushiku no bushiku iyashimpwa pa kusanga fye ifikabilwa fya ku mubili, no tushita twa limo limo utwa kukokoloka, takwikusha mu kukumanina ukukabila kwa muntu ukwa lwa nkati. Ukupusanako ne nama, abantu balafwaya ukwishiba, ‘Cinshi caba e mifwaile ya bumi?’ ‘Ubu bumi bwaipipa, ubusanshamo ifingi ifyawama lelo na kabili ifingi ifyabipa, bushe e bwabako fye bweka?’ Bushe tawaipushapo ifipusho fyapale fi?

Nalyo line, amamilioni ya bantu abali abomi ilelo bakuliile mu njikalo isho shafupwile ubuseko ubuli bonse ubwabamo bupilibulo mu butotelo. Uko kusonga kuti pambi kwafumine ku bafyashi babo, kuli bakafundisha, ku fibusa, nelyo fye ukufuma kuli kamfulumende.

Skalabrino, umulumendo ukufuma ku Albania, alondolwele ukuti pe samba lya mitekele ya ciKomyunisimu abantu basambilishiwe ukuti takwaba Lesa. Mu kulundapo, cali ca busanso kuli bene ukulanda pa lwa butotelo; ukucite fyo kwali no kutungulula ku kubikwa mu cifungo. Lelo, mu 1991, lintu aali mu Switzerland nge mbutushi, apeelwe ishuko lya mu nshita ilya kusambilila Baibolo. Alipokelele. Mulandu nshi?

Cisuma, mu Albania aali naumfwa ukuti kwalibako icitabo cimo iciitwa Baibolo, lelo mu cituntulu taishibe icili conse pa lwa cene. E ico, pa kutendeka pambi tacali maka maka kufwaisha kwa kumfwikisha Baibolo ukwamukuntile. Ilintu aebelwe ukuti aali no kusambilila pa lwa mifwaile ya kwa Lesa ku mutundu wa muntu ne sonde, na kabili amwene cene nge shuko lya mu nshita ilya kuwamyako ukubomfya kwakwe ukwa lulimi lwa cikaya. Mu kwangufyanya, nangu ni fyo, asangile ukuti cintu alesambilila caikwishe ukufuluka kwakwe ukwashikama ukwa ku mupashi. Umutima wakwe walicincimushiwe ku bulayo bwa kwa Lesa ubwa calo cipya umo umutende ukaanana, icalo umo abantu bengekala kuli pe na pe no kuipakisha ubwingi bwa fintu fyonse ifikabilwa ku bumi. Ubuseko bwakwe bwalisumbilwemo lintu asambilile ukuti wene no lupwa lwakwe kuti baba ulubali lwa ici calo cipya. Pa kufilwa ukusungilila iyi mbila nsuma ku mwine eka, atumiine ulupwa lwakwe lamya ku mwabo ku Albania ku kwakana yene na bo.

Aleksei, uwikala mu Russia, na o alipapushiwe pa kwambukila kuntu ukwishiba kwalungikwa ukwa Baibolo kwingakwata pa bumi bwa muntu. Ukucimfiwa ne mpika kabili ukukanaba na maka ya kusanga ubulondoloshi bwa kwikusha ku mifwaile ya bumi, apangile ukuipaya. Intanshi, nangu ni fyo, aile ku Finland ku kutandalila cibusa wakwe. Pa lwendo mwi shitima, alandile pa lwa mpika shakwe ku bayendo banankwe. Pa kati kabo pali umo uwa Nte sha kwa Yehova, uwamucincishe ukusambilila Baibolo pantu ilapeela ukupikulula ku mpika sha musango yo. Aali uwatwishika. Pa lwendo lwa kubweluluka, akwete ica kukumanya cimo cine. Pali iyi nshita ni Nte na umbi e waisosele no kumweba ukuti na o alekwata umusango umo wine uwa mpika lelo ukuti Baibolo yalimwafwile ukushicimfya. Na o alimukoseleshe ukusambilila Baibolo. Lintu afikile ku ŋanda, lamya alililile. Aali ni cibusa wakwe umbi, uwalesambilila Baibolo ne Nte kabili aali uwa nsansa nga nshi. Uyu mwaume alitendeke ukwiluko kuti nakalimo Baibolo mu cituntulu kuti yapayanya cintu alekabila, lelo alishibe ukuti ukwabulo kwaafwa tali na kuyumfwikisha. Alisumine ukukwata isambililo lya Baibolo ilya mu ŋanda ilya lyonse ne Nte sha kwa Yehova, kabili atendeke ukusangwa ku kulongana kwabo. Tacamusendele inshita ntali ku kumfwikisha umulandu abo abamumunga ubumi bwabo ukushinguluka cintu Baibolo isambilisha babele fyo aba nsansa, nangu cingati na bo bene balalolenkana ne mpika ishaseeka ku mutundu wa muntu.

Mu kuba no kwiluka kwa mipangilwe ya buntunse, Yesu Kristu alondolwele ukuti: “Te ku cilyo ceka umuntu ekalila no mweo.” (Mateo 4:4) Na kabili atile: “Ba nsansa abo abaibukila ulwa kukabila kwabo ukwa ku mupashi.” (Mateo 5:3, NW) Insansa shabo shisa pa mulandu wa kuti balibukila mu kuswatuka ulwa kukabila kwabo, balabuula intampulo shalinga ku kwikusha kwene, kabili bakumanye paalo lya kwa Lesa. Nangu cibe fyo, ukukabila kwesu ukwa ku mupashi takwikushiwa fye pa kuilunda kwi calici ilili lyonse nelyo ukusangwa ku mapepo ya butotelo. Ubutotelo ubo bwaba apakalamba ubwa mipepele ya kusefya kwa ntambi kuti pambi bwakwata ukucebusha kwa mu nkuntu, lelo bushe bulapayanya ukupikulula kwashininkishiwa ku mpika sha bumi? Nangu fye nga ubutotelo bwasumbula ifishinte fya myendele fimo ifya citendekelo ifyaba ifisuma, nga ca kuti bwafilwa ukumfwikisha imifwaile ine ine iya bumi, bushe bukekusha ukukabila kobe ukwa ku mupashi? Ica kwangwako kwakulilanako, bushe ukubelesha ubutotelo bwa musango yo kukatungulula ku kwampana kusuma na Lesa? Ukwabula ico, ukwikushiwa kwa cine kukabulila.

Muli kuno kuloshako abantu abengi balesapika icintu cimo cintu bashilati basange.

[Icikope pe bula 3]

Bushe ukukabila kobe ukwa ku mupashi mu cituntulu kukeku- shiwa pa kuilunda kwi calici ilili lyonse?

[Icikope pe bula 4]

Abengi balisanga ukuti lintu baumfwikisha Baibolo, ubumi bwisa ku kukwata ubupilibulo bupya